Lukéstar 20 - Romski prevod Novog zaveta - Srbija

E Isusesoro baroderipe

¹ Thaj kerdilo pe jekh kotar odola dive đikaj ov sikavela e selore ano hramo thaj vakerela o evangelium, avile e rašaja thaj e lilvarne e phurederutnenca.

² Thaj phende lese vakerindoj: Phen amenge, save barederimasa odova kere? Ja ko si odova so tuke dija odova baroderipe?

³ A ov irisarindoj phenđa lenge: Vi me tumen ka phućav jekh lafi, thaj phenen mange:

⁴ Bolipesaripe e Jovanosoro – aj li sine e badalestar ja e manušendar?

⁵ A on gindisarde ana peste vakerindoj: Te phenđam: e badalestar, ka phenen: sose lese, akana, ni paćajen?

⁶ Te li phenđam: e manušendar, sa ka amen e manuša bararen; kaj si paćavino kaj si o Jovan profeto.

⁷ Thaj irisarde kaj ni đanen kotar.

⁸ A o Isus lenge phenđa: Ni me tumenge na ka phenav save baroderimasa akava kerav.

Đungale drakharutnara

⁹ A e selorese lelja te mothovel e paramiči akaja: O manuš nesavo sijisarda drakhalina, thaj dija le e drakharutnenge, ta gelo po lungo vaxto.

¹⁰ Thaj ane plo vaxto bičhalda e drakharutnenge e kandine te den lese kotar o bijanipe e drakhalinango; aj e drakharutne le marde, thaj bićhalde le čuče vastengere.

¹¹ Thaj palem bičhalda e avere kandine; a on vi le marindoj thaj lađarindoj bićhalde čuče vastengere.

¹² Thaj bičhalda palem e tritone; a on vi le ratvarde thaj frdinđe.

¹³ Teg phenđa o rajo e drakhalinengo: So te kerav? Ka bičhalav mle čhave e kamle; bisum ka lađan kana ka dikhen le.

¹⁴ A e drakharutne dikhindoj le gindisarde ana peste vakerindoj jekh avrese: Akava si avutno pe leso than; phiren le te mudara ta amenge te ačhel o barvalipe.

¹⁵ Thaj frdinđe le avrijal andar e drakhalina thaj mudarde. So ka, akana kerel lenge o rajo e drakhalineso?

¹⁶ Ka avel thaj ka xasarel akale drakharutnen, thaj ka del e drakhalina averenge. A on kana odova šunđe phenđe: Te na del o Devel!

¹⁷ A ov dikhindoj pe lende phenđa: So mandarel, akana, odova so si hramome: O bar savo frdinđe e zidarja, ov ulo šero e xnzatar?

¹⁸ Sarsavo savo perel pe odova bar ka phagel pe, a pe kaste ov perel ka xurdarel le.

¹⁹ Thaj rodle e anglunerašaja thaj e lilvarne te ane odova časo vazden pe vast upro leste, aj darandile e selorestar; kaj haljarde kaj baš olenge akaja paramiči mothoda.

Pokinibe e porezesko

²⁰ Thaj vardinena pe leste; thaj bićhalde e phukavnen, save kerena pe kaj si čačutne, na bi li le astarena ano lafi, ta te ka ma le dena najuće phurederimase thaj barederimase e regentosi.

²¹ Thaj phučle le vakerindoj: Sikamneja, đanas kaj vorto vakere thaj sikave, thaj na dikhe ko si ko, aj čače sikaveja e Devlesere dromeja:

²² Aj li si amenge meklo te da porezi e thagareske ja na?

²³ A ov, haljovindoj o bižajipe lengoro, phenđa lenge: So man zumaven?

²⁴ Mothoven mange o dinari; kasoro muj si pe leste thaj telahramope? A on irisarindoj phende: E thagareso.

²⁵ A ov lenge phenđa: Den, akana, e thagaresoro e thagarese, a e Devlesoro e Devlese.

²⁶ Thaj ni šaisarde te astaren le ane lafija anglal e selore; thaj prašukarindoj e irisarimnasoro lesoro ačhade.

Kotar o đivdisaripe e mulengoro

²⁷ Thaj pašile nesave e sadukejendar, save phenen kaj nane đivdisaripe, thaj phučle le,

²⁸ vakerindoj: Sikamneja, o Mojsije amenge hramonđa: Te kaske merel o phral save isile romni, thaj akava merel bi ćhavorengo, kaj o phral lesoro lel e romnja thaj te vazdel e ternen ple phralese.

²⁹ Sine, akana, efta phrala, thaj angluno lija e romnja, thaj mulo bi ćhavorengo;

³⁰ Thaj lelja o dujto e romnja, vi ov mulo bi ćhavorengo;

³¹ Vi o trito lelja la jekhune ađahar; a ađahar vi so efta, ni mekle čhavoren thaj mule.

³² A palo sarijende muli vi e romni.

³³ E đivdinipestar, akana, savesiri romni olendar ka ovel? Kaj so eftangiri romni sine.

³⁴ Thaj irisarindoj o Isus phenđa lenge: E čhave akale themeskere prandonpe thaj dindonpe;

³⁵ A save paćivisajle te len okova them thaj đivdisaripe andar e mule, ni prandonpe ni dindonpe;

³⁶ Kaj našti aj te meren, kaj si sar phakale, thaj čhave si e Devlesere kana si čhave e đivdisaripasere.

³⁷ A te e mule ušten, thaj o Mojsije sikada ke kalin akana akharda e Devljutne Devleja Avraamosereja thaj e Devleja e Isakosereja thaj Devleja e Jakovesereja.

³⁸ A o Devel nane Devel e mulengoro aj e đivdengoro; kaj si lese sare đivde.

³⁹ A nesave e lilvarnendar irisarindoj vakerde: Sikamneja, lačhe vakerdan.

⁴⁰ Thaj ni tromande maj khanči te Phučen le. A ov phenđa lenge:

O Mesija, e Davidesoro čhavo thaj Devljutno

⁴¹ Sar vakerena kaj si o Hristos čhavo e Davidosoro?

⁴² Kana korkoro o David vakerel ane pustik e Psalamengiri: Phenđa o Devljutno mle Devljutnese: beš mange pe daxni rig,

⁴³ đikaj pašljarav e dušmanjen tiren baš o thanipe tire prengere.

⁴⁴ O David, akana, le akharel Devljutnea; ta sar si lese čhavo?

Daravipe e lilvarnendar

⁴⁵ A kana sa e selore šunđe, phenđa ple sikljovnenge:

⁴⁶ Arakhen tumen e lilvarnendar, save vilea đana ane bare fostanja, thaj kamena arakhadipa pe trgura, thaj anglune thana pe sinagoge thaj paćivale thana baš e astalja po xape;

⁴⁷ Save xana o khera e phivljengere, thaj xoxamne ruđinen pe but, on ka pana anglal oven krisime.