Lukéstar 2 - Romski prevod Novog zaveta - Srbija

E Isusesoro bijandipe

¹ A ko odola dive iklistilo o čhinavdipe e thagaresko e Avgustesko kaj te ramosarenpe pe sa e vasiona.

² Kava sine angluno ramope vaš o vaxto e Kirinijeske vastarimasko e Sirijasa.

³ Thaj gele savore te ramosaren pes, sarsavo ani pli diz.

⁴ A atoska gelo vi o Josif andar e Galileja andar i diz Nazaret ane Judeja ani diz e Davidoski savo akharel pes Vitlejem, kaj vov sine andar o kher thaj njamo e Davidosko.

⁵ Te hramol pe e Marija, mangli vaš leske romnjasa, savi sine khamni.

⁶ Thaj kana odoring sesa, pherdile o dive kaj voj te bijanel.

⁷ Thaj bijanda murše ple Anglune, thaj paćarda les, thaj pašljarda les ane balaja; kaj najsa lenge than ane mehana.

⁸ Thaj sine e čobanja an odova agor bešindoj ane umal thaj arakhavindoj e arakhavni raćasa ke ple bakre.

⁹ Thaj dikh, o phakalo e Devljutnesko ačhilo maškar lende, thaj o ašundipe e Devlesoro strefisarda len; thaj pherdile bari dar.

¹⁰ Thaj phenđa lenge o phakalo: Ma daran; kaj tumenge, ake, mothovav lošalipe baro savo ka ovel sa e selorese.

¹¹ Kaj tumenge avdive bijandilo o Inkalipe, savo si o Hristos Devljutno, ani diz e Davidoski.

¹² Thaj akava si tumenge semno: ka arakhen e ćhavore paćardo kaj si pašljardo ane balaja.

¹³ Thaj jekhedromestar e phakalea mothovdile but urumne e badaleske phakale, save ašarisarde e Devle vakerindoj:

¹⁴ Ašundipe po ućipe e Devlese thaj pe phuv šandipe, maškaro manuša šukar kamipe.

¹⁵ A kana e phakale gele lendar po badali, o manuša čobanja phende jekh avrese: Hajden, akana, đi o Vitlejemo, te dikha adova so kerdilo, so amenge phučarda o Devel.

¹⁶ Thaj siđarindoj, avile thaj arakhle e Marija thaj e Josife thaj e ćhavore pašljardo ane balaja.

¹⁷ A kana dikhle, phučarde sa so lenge phendo odole ćhavorese.

¹⁸ Thaj savore save šunde kerde baripe odoleske so lenge phende e čobanja.

¹⁹ A e Marija garavđa sa e lafija akala thaj čedinđalen ano plo vilo.

²⁰ Thaj irisajle e čobanja ašundoj thaj ašarindoj e Devle baš sa so šunde thaj dikhle sar so lenge phendilo.

²¹ Thaj kana pherdile ofto dive te sunetinen e ćhavore, čhute lesoro anav Isus, dindo katar o phakale anglal so vov ka astardol ano vođi.

E Isuse anena ani khangiri

²² A kana pherdile e dive pe lengoro čistibe pe Mojsijesoro kanuni, Ande le ano Jerusalim te ćhuven les anglal o Devljutno –

²³ Sar so si hramome ano Kanuni e Devljutnesoro, kaj sarsavo čhavoro murš savo najanglal pravel e materica te sfincol e Devljutnese –

²⁴ Thaj te anen viktima sar kaj si phendo ano Kanuni e Devljutnesoro: duj krlore ja duj golubore.

²⁵ Thaj dikh, sine ano Jerusalim manuš po anav Simeon, thaj odova manuš sine čačutno thaj paćavno, savo ađikerela lokipe e Izrailjesko, thaj o Đi Sumnalo sine pe leste.

²⁶ Thaj leske o Đi Sumnalo phučarda kaj ni ka dikhel o meripe đikaj ni dikhel e Hristo Devljutnesere.

²⁷ Thaj Đesa legardo alo ani khangiri; thaj kana legarde e bijande e ćhavore e Isuse te keren pe leste odova so si siklino po Kanuni,

²⁸ vov lija les ane angali pli thaj baxtarda e Devle thaj phenđa:

²⁹ Akana mukljare šandipasa e kandine tire, Devljutnea palo lafi tiro;

³⁰ Kaj dikhle o jakha mle o Iklipe tiro.

³¹ Save gatisardan anglal o muja sa e selorenge.

³² Rošlipe, te sikavel e bipaćamnen, thaj ašundipe e seloresoro tire Izrailjesko.

³³ A o Josif thaj e daj lesiri nišuđarde odolestar so vakerena lestar.

³⁴ Thaj baxtarda len o Simeon, thaj phenđa e Marijake, leske dajake: Dikh, akava pašlilo kaj buten te peravel thaj te vazdel ano Izrailj, thaj te ovel semno opipe kastar ka vakerel pes.

³⁵ A vi tuke korkorake ka pharavel e sablja o ođi, kaj te phućardon e gođa bute vilenge.

³⁶ Thaj sine e Ana profetka, ćhej e Fanuiloski, katar o njamo e Asiroveski, ake phure beršengi, savi efta berša đivdinđa e romeja katar o ćhajkanipe plo.

³⁷ Thaj oj, phivli katar e oftovardeš thaj štar berša, ni đeli kotar e khangiri, thaj kandlja e Devle dive thaj rat postimasa thaj ruđipnasa.

³⁸ Thaj oj an odova časo avili, thaj ašundisarda e Devle, thaj vakerda lestar sarijenđe save ađikerde ikaldipe ano Jerusalim.

³⁹ Thaj kana kerde sa po kanuni e Devljutnesoro, irisajle ani Galileja ani diz Nazaret.

⁴⁰ A o čhavoro barjola thaj zurardola đesa, pherdindoj gođaveripe, thaj baxtaripe e Devlesoro sine pe leste.

O Isus sar čhavoro ani khangiri

⁴¹ Thaj e bijande lesere đana sarsavo berš ano Jerusalim ko baro dive Pasha.

⁴² Thaj kana sas le dešuduj berša, đerdinde on ano Jerusalim po siklipe e bare divesoro.

⁴³ Thaj kana nakhavde e dive, thaj irina pes, ačhilo o čhavoro Isus ano Jerusalim; thaj ni đangla o Josif thaj e daj lesiri;

⁴⁴ Aj, dije godi kaj si amalenca, đele jek dive phirindoj, thaj rodle le maškar e njamonenge thaj e pendžarutne.

⁴⁵ Thaj kana ni arakljole, irisajle ano Jerusalim te roden le.

⁴⁶ Thaj pala e trin dive arakhlo le ani khangiri kaj bešel maškar e sikljovne, thaj šunel len, thaj phučel len.

⁴⁷ Thaj savore save šunena le but kerena baripe lesere vakerimastar thaj irisarimastar.

⁴⁸ Thaj dikhindoj les but darandile, thaj e dej lesiri phenđa lese: Ćhavoreja, so amenge adava kerdan? Ake o dad tiro thaj me rodinđam tut dukhasa.

⁴⁹ Thaj phenđa lenge: Sose rodinđen ma? Sar ni đanglen kaj mange trubul te ovav an odova so mle Dadesoro?

⁵⁰ Thaj on ni haljarde o lafji savo lenge phenđa.

⁵¹ Thaj ulilo lenca thaj alo ano Nazaret; thaj sine lenge kandino. Thaj e daj leski garavđa sa e lafija akala ano plo vilo.

⁵² Thaj o Isus anglalisarda ano gođaveripe thaj ano baripe thaj ano kovlipe koro Devel thaj koro manuša.