Lukéstar 19 - Romski prevod Novog zaveta - Srbija

O Zakej

¹ Thaj đerdindoj ano Jerihono, nakhena andar leste.

² Thaj dikh, o manuš akhardo anavesa Zakej, aj ov sine phurederutno e hudutnorengo, thaj sine barvalo.

³ Thaj rodinđa te dikhel e Isuse ko si ov; thaj naštisarda e selorestar, kaj sine e cikne barimasko.

⁴ Thaj ov prastandoj anglal, uklinđa pe divo sumućalin te dikhel le; kaj paše late trubuja te nakhel.

⁵ A kana o Isus avilo pe odova than, dikhindoj upre, dikhlja le thaj phenđa lese: Zakejo, hulji sigate; kaj mange avdive trubul te ovav ano kher tiro.

⁶ Thaj huljilo sigate; thaj lija le lošalindoj.

⁷ Thaj savore save dikhle bićajljardine, vakerindoj sar đerdinđa te gostil ke bezahalo manuš.

⁸ A o Zakej ačhilo thaj phenđa e Devljutnese: Devljutnea, ake ekvaš o barvalipe mlo ka dav e čororenge, thaj te kas khanćesa globisardem, ka irisarav štardromune.

⁹ A o Isus lese phenđa: Avdive avilo o inklipe e kherese akalese; kaj vi akava si čhavo e Avraamosoro.

¹⁰ Kaj o Čhavo e Manušesko avilo te rodel thaj te ikalel o našaldino.

Paramiči kotar o deš kese

¹¹ A kana on odova šunđe, lunđarda te mothovel e paramiči, kaj ov sine pašo Jerusalimo, thaj on gindisarde kaj ka sigate ka sikavel pe o Thagaripe e Devlesoro.

¹² Phenđa akana: Manuš khajekh barvaleođesko e njamosko gelo ane duruni phuv te lel pese thagaripe, ta te iril pe.

¹³ Akharindoj ple dešen kandinen, dija lenge deš kese parno rup thaj phenđa lenge: Trgujinen đikaj na irinape.

¹⁴ A lesere dizutne ritona le, thaj bićhalde pala leste bićhaldipe vakerindoj: Na manga ov te thagaril upral amende.

¹⁵ Thaj kerdilo pe, kana ov iranđa pe lindoj o thagaripe, phenđa te leske akharen odole kandinen savenge dija o parno rup, te dikhel so savo therdisarda.

¹⁶ Thaj avilo angluno vakerindoj: Rajona, e kesa tiri anđa deš kese.

¹⁷ Thaj phenđa lese: Lačhe, lačhe kandineja; baš odova so ane najhari sana paćamno, ake tuke o baroderipe upral o deš dizja.

¹⁸ Thaj avilo o dujto vakerindoj: Rajona, e kesa tiri anđa pandž kese.

¹⁹ A ov phenđa vi olese: Vi tu ov upral e pandž dizija.

²⁰ Thaj o trito avilo vakerindoj: Rajona, ake tiri kesa savi inćardem phandli ano mindili;

²¹ Kaj darandiljem tutar, odolese kaj sijan manuš ostro: leja so ni mekljan, thaj ćhines so ni sijinđan, thaj kides kaj ni tradlan.

²² A ov lese phenđa: Pe tire lafija ka krisarav tut, đungalo kandineja! Đangljan kaj sem me manuš ostro, savo lel so ni meklem, thaj čhinel so ni sijinđem, thaj kidav kaj ni tradljem.

²³ Ta sose ni dijan o parno rup mlo ane paruvutnara, thaj avindoj me ka ma lav le therimasa?

²⁴ Thaj phenđa e lipeutnenge: Len lestar e kesa thaj den odolese so sile deš kese.

²⁵ Thaj phenđe lese: Rajona, ole isi deš kese.

²⁶ Vakerav tumenge pale: Sarsavonese save isi le ka del pe; a odolestar save nanole, ka lel pe vi odova so isile.

²⁷ A okole dušmanjen mlen save ni mangle kaj me te thagariv upral lende, anen len akari, thaj čhinen len angla mande.

O Mesija đerdini ano Jerusalim Tradipe e trgovcengoro kotar o hramo

²⁸ Thaj vakerindoj kava o Isus lijape anglal đapeindoj naupre ano Jerusalimo.

²⁹ A kana pašilo e Vitfagake thaj Vitanijake, ke plajin akhardini Maslinska, bičhalda ple dujen sikljovnen.

³⁰ Vakerindoj: Đan ano gav so si anglo tumende, thaj kana đerdinena ane leste, ka arakhen e here phandlo pe savo nisar khonik e manušendar na beštino; phraven le thaj anen.

³¹ Thaj te tumen ko phučlja: Sose pravena? Ađahar lese phenen: Odova trubul e Devlese.

³² A kana gele e bićhalde, arakhle sar so olenđe phenđa.

³³ A kana on phravena e here, phende lenge e rajura lesere: Sose phraven e here?

³⁴ A on vakerde: Odova trubul e Devlese.

³⁵ Thaj ande le e Isusese, thaj frdinde ple fostanja po her, thaj thanarde e Isuse.

³⁶ Thaj kana ov đala buljarela o fostanja ple po drom.

³⁷ A kana ov akana pašilo telalplajin e Plajinako Maslinska, lije sa pobut e sikljovne ano lošaripe te ašarisaren e Devle bare krlesa baš o sa prašukaripa save dikhle.

³⁸ Vakerindoj: Baxtardo thagar savo avel ano anav e Devlesoro! Šandipe po badali thaj ašundipe pe ućimata!

³⁹ Thaj nesave e farisejendar kotar o seloro phende lese: Sikamneja, čhinav tire sikljovnenge.

⁴⁰ Thaj irisarindoj phenđa lenge: Phenav tumenge, te on ačhade, e bara ka den vika.

⁴¹ Thaj kana pašilo, dikhindoj e diz rovđa upro leste.

⁴² Vakerindoj: Kana ka ma vi tu đane, aj ane akav dive tiro, odova so si baš o šandipe tiro! Aj si akana garavdo tire jakhendar.

⁴³ Kaj ka aven pe tute e divesa, thaj ka trujalisaren tut e dušmanja tire honimatenca, thaj ka trujalisaren tut, thaj ka ćićiden tut kotar sa e riga;

⁴⁴ Thaj ka peraven tut thaj e čhavoren tiren ane tute, thaj ni ka meken ane tute ni bar po bar, odolese so ni penđarđan o vaxto ane saveste sijan dikhljardo.

⁴⁵ Thaj đerdindoj ano hramo, ačhilo te tradel odolen so bikinena ane leste thaj ćinena,

⁴⁶ vakerindoj lenge: Hramome si: O kher mlo, o kher si ruđipnasoro, a tumen kerden lestar bareski xuv e čorengiri.

⁴⁷ Thaj sikavda sako dive ano hramo. A e anglunerašaja thaj e lilvarne thaj selorengere anglune dikhena te xasaren le.

⁴⁸ Thaj na arakhena so ka ma lese kerena; kaj sa o seloro sine paš pašavre uzalo leste ašundoj le.