Lukéstar 18 - Romski prevod Novog zaveta - Srbija

Trajutnipe anglisarel

¹ Mothoda lenge pale vi e paramiči sar trubul sajekh te ruđin pe, thaj te na peren,

² vakerindoj: Ano nesavo foro sine nesavo krisari savo e Devlestar ni darala thaj e manušendar na lađala.

³ A ane odova foro sine jekh phivli, thaj oj avela leste vakerindoj: Arakh man mle opipeutnestar.

⁴ Thaj ni manglja butvahto. A najpalal phenđa ana peste: Te na vi darav e Devlestar vi e manušendar na lađav,

⁵ pale avune kaj man phararel akaja phivli, ka arakhav la, kaj te na avel mange jekhune thaj na phararel.

⁶ Thaj phenđa o Devljutno: Šunen so vakerel o bičačuno krisari!

⁷ A kaj o Devel na ka arakhel ple alosarutnen save lese den krlo dive thaj rat, thaj sar ka meken?

⁸ Phenav tumenge kaj len sigate ka arakhel Aj o Čhavo e Manušesko kana avel, ka arakhel li paćavipe ki phuv?

O farisej thaj o hudutnari

⁹ A vi nesavenge save sine paćavune baš pese kaj si čačutne, a e averen nacaramoldisaren, mothoda e paramiči akaja:

¹⁰ Duj đene đerdinde ano hramo te ruđin pe e Devlese, jekh farisej a o dujto hudutnari.

¹¹ O farisej ačhilo thaj ruđinela pe ana peste ađahar: Devla, nais tuke so najsem sar e avera manuša: xarundutne, bičačutne, anglaćumidutne ja sar akava hudutnari.

¹² Postisarav dujdrom ano kurko; dava dešipe odolestar so sa resav.

¹³ A o hudutnari andaroduripe ačhela, thaj ni manglja ni e jakha te vazdel e badalese, aj marela pe ano kolin plo vakerindoj: Devla, kovljardo ov mange e bezehalese!

¹⁴ Phenav tumenge, akava gelo čačavdo ple khereste, a na okova. Kaj sarsavo savo pes vazdela ka teljarel pe, a savo pes teljarel ka vazdel pe.

O Isus bahtarela e čhavoren O barvalo thaj o thagaripe e Devlesoro

¹⁵ A anena lese vi e čhavoren te len azbavel; a kana dikhle e sikljovne, čhinavde lenge.

¹⁶ A o Isus akharindoj len phenđa: Meken e čhavoren nek aven ke mande, thaj ma ačhaven len; kaj asavkenge si o Thagaripe e Devlesoro.

¹⁷ Čače tumenge phenav: Savo ni lel o Thagaripe e Devlesoro sar čhavoro ni ka del ane leste.

¹⁸ Thaj phučlja le khajekh šeruno vakerindoj: Sikamneja gudleja, so te kerav ta te lungarav o đivdipe bimerimasko?

¹⁹ A o Isus leske phenđa: Sose akhare man gudleja? Khonik naj gudlo sem jekhoro Devel.

²⁰ E čhinavdimata đane: Ma ker lubnipe; ma mudar; ma čor; ma vaker xoxamne; paćivalisar e dade tire thaj e daja tira.

²¹ A ov phenđa: Sa akava garavdem kotar o ternipe mlo.

²² A kana odova šunđa o Isus, phenđa lese: Pana jekh najstalo tuke: bikin sa so si tut thaj ulav e čororenge; thaj ka ovel tut barvalipe po badali; thaj ava pala mande.

²³ A kana ov odova šunđa, ulo dukhavdo; kaj sine but barvalo.

²⁴ A kana le o Isus dikhla kaj ulo dukhavdo, phenđa: Sar si phare odolenge save isilen barvalipe te đerdinen ano Thagaripe e Devlesoro!

²⁵ Kaj poloke si e devake te nakhel andar e suvjakere kana aj li e barvalese te đerdini ano Thagaripe e Devlesoro.

²⁶ A odola save šunđe phenđe: Ta ko si šaj te ikalel pe?

²⁷ A ov phenđa: So si e manušenge bišajine e Devlese si šajine.

²⁸ O Petar pale phenđa: Eke, amen meklam sa thaj lijampe pala tute.

²⁹ A ov lenge phenđa: Čače tumenge phenav: naj khonik savo meklja po kher, ja e bijanden, ja e phraljen, ja e phenjen, ja e romnja, ja e čhavoren ando Thagaripe e Devlesoro,

³⁰ savo ni ka lel butđutino ano akava vaxto thaj bimerimasko đivdipe ano them savo ka avel.

O Isus o trito drom anglalvakerel plo meripe thaj đivdinisaripe Sastaripe e Jerihonoske korore

³¹ Lija pale e Dešudujoren thaj phenđa lenge: Ake ka đa upre ano Jerusalimo, thaj sa ka kerel pe so e profetora hramonđe baš o Čhavo e Manušesko.

³² Kaj ka ovel dindo e butedevljutnengerenge thaj ka maren oleja prasape, thaj ka mučinen le thaj ka čhungaren le.

³³ Thaj kana ka maren le rajenca ka mudaren le, thaj o trito dive ka đivdinisavel.

³⁴ A on khančik kotar odova ni haljarde thaj akava lafi sine garavdino olendar, thaj ni haljarde so lenge vakerel pe.

³⁵ A kana ale paše uzal o Jerihono, o kororo nesavo bešela pašo drom manglindoj.

³⁶ Ta kana šunđa sar o seloro nakhen, phućljape: So si odova?

³⁷ Thaj phenđe lese kaj o Isus Nazarećanino nakhel.

³⁸ Thaj dija vika vakerindoj: Isuso, čhavo e Davidosoro, maznosar ma!

³⁹ A odola so đana anglal dena lese vika te ačhel, a ov pana pozorale dela vika: Čhavo e Davidosoro, maznosar ma!

⁴⁰ A o Isus ačhilo thaj čhinavda ole te anen le; a kana alo paše, phučlja le

⁴¹ vakerindoj: So mange tuke te kerav? A ov phenđa: Devljutnea, te dikhav.

⁴² A o Isus lese phenđa: Dikh! O paćavipe tiro ikalda tut.

⁴³ Thaj sigo dikhla, thaj lijape palo leste ašundindoj e Devle. Thaj sa o seloro save dikhle dinde ašardipe e Devlese.