Lukéstar 17 - Romski prevod Novog zaveta - Srbija

Došalisaripe thaj phurederimata

¹ A vi ple sikljovnenge vakerela: Naj šajine te na aven e tradine po bezeh; aj pharipe odolese prekalo kaste aven.

² Najlaćhe lese ka ovel te lese panjesoro bar umbladol ki men thaj te čhuden le ano derav, aj te na tradel po bezeh jekhe katar akala tikne.

³ Arakhen pe tumende! A te tuke kerel došalipe o phral tiro, mahrisar le, ta te istarđa plo došalipe, jertisar lese.

⁴ Thaj ako tuke efta droma po dive kerel došalipe, thaj efta droma vortolpe tuke thaj phenđa: istarav mo došalipe, jertisar lese.

⁵ Thaj phenđe e apostola e Devljutnese: Pher amenge o paćavipe!

⁶ A o Devljutno phenđa: Kana ka ma ovel tumen paćavipe sode e kučin mojraki, ka ma phenen akale dudoske: Ikal tut thaj sijisav ano derav! – thaj kandola bi tumen.

⁷ A savo tumendar, te isile kandino savo pharavel e phuv ja savo arakhel e bakren, kana avel andar e umalin, ka phenel lese: Phir thaj sigate beš baš e astala?

⁸ Sar lese ni phenel: Gatisar khančik te xav raćako xape thaj ker te kandes mange đikaj xav thaj pijav, thaj pale odova tu xa thaj pi?

⁹ E da li ov ka ašarilpe odole kandinese kana kerda so lese čhinadilo? Ni gndiv.

¹⁰ Ađahar vi tumen kana keren sa so tumenge si čhinadino, vakeren: Amen sam bitrubune kandine, kaj kerdam so sijam kamutne te kera.

Naisipe thaj binaisipe

¹¹ Thaj kana vov đala ano Jerusalim, nakhela maškar e Samarija thaj Galileja.

¹² Thaj kana đerdinela ano jekh gav, resle le deš đeramne manuša, save aćhile dural,

¹³ thaj vazdije o krlo vakerindoj: Isuso, Sikamneja, maznosar amen!

¹⁴ Thaj dikhindoj len, phenđa lenge: Đan thaj mothoven tumen e rašajenge. Thaj kerdilo pe, đikaj đana, te užaren pe.

¹⁵ A jekh lendar, dikhindoj kaj si sastardo, irisajlo ašundindoj e Devle andar o sa krlo.

¹⁶ Thaj pelo tele angle lesere pre thaj ašardisalo lese. Thaj odova sine o Samarjanino.

¹⁷ A o Isus irisarindoj phenđa: Sar na užarde pe e dešore? A kaj si o enjatore?

¹⁸ Sar ni arakhljape nijekh aver te irinelpe thaj te del ašundipe e Devlese, aj numa akava avere njamostar?

¹⁹ Thaj phenđa lese: Ušti thaj đa; o paćavipe tiro ikalda tut.

Avipe thagaripesko e Devlesoro

²⁰ A phućlo e farisejendar, kana ka avel o Thagaripe e Devlesoro, ov lenge irisarda thaj phenđa: Thagaripe e Devlesoro ni avela po dikhlino ćhand.

²¹ Ni ni ka phenel pe: Ake akate si, ja: eke le odori; kaj dikh, Thagaripe e Devlesoro si andre ana tumende.

²² A e sikljovnenge phenđa: Ka aven e dive kana ka mangen te dikhen jekh kotar o dive e Čhave e Manušesere, thaj na ka dikhen.

²³ Thaj ka phenel tumenge: ake ov akate, ja eke ov okote; aj ma đan ni odori prastan!

²⁴ Kaj sar so e munja strefil e badalestar, thaj strefisarel sa so si telal o badali, ađahar ka ovel vi o Čhavo e Manušesko ano Dive plo.

²⁵ Aj lese najanglal trubul but te mudardol, thaj čhudino te ovel kotar o bijanipe akalesoro.

²⁶ Thaj sar sine ano dive e Nojese ađahar ka ovel vi ano dive e Čhavese e Manušeserese:

²⁷ Xana, pijena, lena pe, dindona pe đi odova dive kana o Noje đerdinđa ani barka, thaj alo o tasavipe thaj xasarda sa.

²⁸ Miazutne sar so sine ano dive e Lotose: xale, pile, kinde, bikinde, sijisarde, zidinđe.

²⁹ A ano dive kana iklistilo o Lot andar e Sodoma, čalavda e jag thaj o sumpor e badalestar thaj xasarda sa.

³⁰ Ađahar ka ovel vi ano odova Dive kana ka mothojpe o Čhavo e Manušesko.

³¹ An odova Dive ko ka ovel po ćitlo, a e kherutne lesere ano kher, ma te huljel te le les; a ađahar vi odova ane umalin, ma te irinel pe palal.

³² Den godi e Lotosara romnjaće.

³³ Te khonik mangel te arakhel o đivdipe plo, ka našalel le; a savo le ka našalel, ka đivdinel le.

³⁴ Phenav tumenge: Ane odoja rat duj ka oven ko jekh than, jekh ka lel pe a o dujto ka aćajpe;

³⁵ Duj đenja ka pišen khetane, jekh ka lel pe a e dujto ka aćajpe;

³⁶ Duj ka oven pe umalin, jekh ka lel pe a o dujto ka aćajpe.

³⁷ Thaj irisarindoj phenđe lese: Kaj, Devljutnea? A ov lenge phenđa: Kaj si o kaš odothe vi o barephakengere ka keden pe.