Lukéstar 16 - Romski prevod Novog zaveta - Srbija

Paramiči e arakhavdune vastarutnestar

¹ A ple sikamnenge vakerđa: Manuš nesavo sine barvalo thaj sine le vastarutno, a akava sasa phukavdo ke leste, kaj lese čhordarel o barvalipe.

² Thaj akharindoj le phenđa lese: So odova šunava baše tute? Pašljar o sačidipe sar vastardan e kheresa, kaj našti vađe lesa te vastare.

³ A o vastarutno e kheresoro phenđa ane peste: So te kerav, kaj o rajo mlo lel mandar o vastaripe? Te hanavav našti, a lađava te mangav.

⁴ Đanav so ka kerav kaj te len man ano khera ple, kana ka lel pe mandar o vastaripe.

⁵ Thaj akharindoj redosa e udžilutnen ple rajoske, phenđa e anglunese: Kobor tu kames mle rajoske?

⁶ A ov phenđa: Šel mere ulja. Thaj phenđa lese: Le o lil tiro aj beš thaj sigo hramosar pinda.

⁷ Pale odova phenđa avrese: Aj tu kobor kames? A ov phenđa: Šel gone điv. Thaj phenđa lese: Le o lil tiro thaj hramosar oftovardeš.

⁸ Thaj ašarisarda o rajo e bičačutne vastarutne so đangle čerda; kaj si e čhave akale šeleberšimasko pođangle kotar e čhave rošlipaske ane pli generacija.

⁹ Thaj me tumenge phenav: Keren tumenge amalen barvalimasa bivortune ta kana ka tumen ovena čorore lena ane biagoresko thanbešipe.

¹⁰ Savo si paćamno ane najtikno thaj ane butuno si paćamno; thaj ko si bičačutno ane najtikno thaj ane butuno si bičačuno.

¹¹ Kaj, akana, ane bičačuno barvalipe paćavne ni ka oven, ko tumenge ka paćavel o čačikano?

¹² Thaj ane avresko ni ka ma oven paćavne, ko tumenge ka del tumaro?

¹³ Nijekh kandino našti duj rajen te kandel; kaj, ja ka jekhe ritol a e avere kamel, ja ka jekheste ka ićarel pe a avere ka teljarel. Našti te kanden e Devlese thaj e mamonose.

¹⁴ A akava sa šunena vi e fariseja, save sine parnerupeske kamutne, thaj marena muj oleja.

¹⁵ Thaj phenđa lenge: Tumen sen odola save keren tumen čačutne anglal e manuša, aj o Devel đanel e vile tumare; kaj so si ane manuša uće, đungalipe si anglal o Devel.

E Mojsijesoro kanuni thaj thagaripe e badalesoro

¹⁶ O Kanuni thaj e Profetura si đi o Jovano; kotar odova o Thagaripe e Devlesoro mothovel lošalo nevipe, thaj sarsavo mučil pe te del ane leste.

¹⁷ A najloke si e badalese thaj e phuvjake te nakhel nali jekhe linijake andar o Kanuni e peripesko.

¹⁸ Sarsavo savo mukel e romnja pla thaj lel avera, lubnipe kerel, thaj sarsavo savo lel pe ulavdine romnjasa, lubnipe kerel.

O barvalo thaj o čororo Lazar

¹⁹ Manuš pa jekh sine barvalo thaj hurjavela pe ano skerleto thaj ani svila, thaj strefune lošarela pe sarsavo dive.

²⁰ A sine nesavo čororo, po anav Lazar, savo pašljola anglal o udar lesoro phumbalo,

²¹ thaj mangla te čajljarel pe prušukenca save perena kotar e astalja e barvaleski; a vađe vi e đućela avena thaj čarena e phub lesiri.

²² A kana mulo o čororo, ingarde le e phakale ane angali e Avraamoski; a mulo vi o barvalo, thaj parunde le.

²³ Vi ane bengesiri jag, arakhadindoj ane muke, vazdinđa e jakha ple thaj dikhlja dural e Avraamo thaj e Lazare ane angali lesiri.

²⁴ Thaj ov dija vika thaj phenđa: Dade Avraamo, kovljov pe mande thaj bičhal e Lazare nek bolel ano pani o ućipe ple najesko te šudrarel mi čhib; kaj munčiv ma ane akaja jag.

²⁵ A o Avraam phenđa: Ćhaveja, detu godi te lesa tu e lačhipa tire ano đivdipe tiro, a ađahar vi o Lazar o bilačhipe; akana pale ov kovljarel pe, a tu mučinetu.

²⁶ Thaj upral pe sa odova, čhivdo si maškar amende thaj tumende xaralipe baro, kaj odola save ka mangen akatar tumende te nakhen, naštisaren; ni okola okotar amende te nakhen.

²⁷ Tegani phenđa: Ruđiv tut pale, dade, te bičhale le mle dadesere khereste;

²⁸ Kaj isi man pandžore phralja: nek lenge čačavel te na bi vi on aven pe kava than mučimasko.

²⁹ Phenđa lese o Avraam: Isilen o Mojsije thaj e profetija, nek len šunen.

³⁰ A ov phenđa: Na, dade Avraamo, aj te lenge avilo khonik andar e mule, ka jertin pes.

³¹ A ov lese phenđa: Te na šunde e Mojsije thaj e profetonen, te khonik vi andar e mule đivdinel, ni ka paćaven pe.