Lukéstar 15 - Romski prevod Novog zaveta - Srbija

Paramiči e našalda bakrijatar

¹ A paše avena leste sa e hudutnara thaj e bezehale te šunen le.

² A e fariseja thaj e lilvarne mrmisarde vakerindoj: Akava lela e bezehalen thaj xala lencar.

³ A ov lenge mothovđa e paramiči akaja vakerindoj:

⁴ Savo manuš tumendar, isindoj le šel bakre thaj našalindoj jekha lendar, na mekela enjavardeš thaj enja ani drmina thaj ni đal pali našaldi đikaj ni arakhela?

⁵ Thaj kana arakhel la, ladavel la piče ple lošalindoj,

⁶ thaj avindoj khere, akharel ple amalen thaj pašunen vakerindoj lenge: Lošalen tumen manca, kaj arakhlem e bakrija mla e našalđa.

⁷ Phenav tumenge kaj ađahar ka ovel pobaro lošalipe po badali aso jekh bezehalo savo jertilpe, nali baš enjavardeš thaj enja čačutne save naj len trubupe baš o jertipe.

Paramiči e našalda drahmatar

⁸ Ja savi romni, isindojla deš drahme, te našalđa jekh drahma, ni phabarda e memeli thaj ni šulavda o kher thaj ni rodel čhutune đikaj na arakhel?

⁹ Thaj arakhindoj akharda e amalinjen thaj e pašutnjen, vakerindoj: Lošalen tumen mancar, kaj arakhlem e drahma savi našalđem.

¹⁰ Ađahar, phenav tumenge, ovel lošalipe anglal e phakale e Devlesere aso jekh bezehalo savo jertil pe.

Paramiči e rumime čhavestar

¹¹ Thaj phenđa: O manuš nesavo sine le duj čhave.

¹² Thaj phenđa o najterno lendar e dadese: Dade, de man kotor e barvalimasko so perel mange. Thaj ov ulavđa lenge o barvalipe.

¹³ Thaj pale nesave dive čedinđa o najterno čhavo sa plo, thaj gelo ani phuv durutni, thaj odothe čhorda o barvalipe plo đivdindoj čhordane.

¹⁴ A kana trošinđa sa, alo baro bokhalipe ani phuv odoja, thaj ov lelja te na ovel le.

¹⁵ Thaj gelindoj avilo ke jekh thanutno odole phuvjako, thaj ov le bičhalda ani pli umalin te arakhel e balen.

¹⁶ Thaj manglja te pherel o vođi plo kiflenca save o bale xana, thaj khonik lese na dela.

¹⁷ A kana alo ane peste, phenđa: Kobor kandine ano dad mlo isi len maro pobuderi, a me merav bokhatar!

¹⁸ Uštindoj ka džav mle dadese, ta lese ka phenav: Dade, kerdem došaripe e badalese thaj tuke,

¹⁹ thaj maj najsem paćavuno te akharav man tire ćhavesa: le man sar jekh kotar tire kandine.

²⁰ Thaj uštindoj gelo ple dadese. A kana vađe podur sine, dikhlja le o dad lesoro thaj kovlilo pe leste, thaj prastandoj lelja le ane angali thaj čumidlja.

²¹ A o čhavo lese phenđa: Dade, kerdem došaripe e badalese thaj tuke, thaj maj najsem paćavuno te akharav ma tire ćhavesa.

²² A o dad phenđa ple kandinenge: Ikalen najšužo fostani thaj hurjaven le, thaj den lese e angustik po vast thaj pođipe ko pre.

²³ Thaj anen e guruvore thuljarde te čhinen, te xas thaj te lošajlivas.

²⁴ Kaj akava čhavo mlo sine mulo, thaj đivdinisajlo; thaj našaldo sine, thaj araklja pe. Thaj aćhile te lošalinen pe.

²⁵ A o čhavo lesoro o phureder sine ani umalin thaj avindoj, kana alo paše uzalo kher, šunđa đilabipe thaj ćhelipe.

²⁶ Thaj akharindoj jekhe e kandinendar phučla: So si odova?

²⁷ A ov lese phenđa: O phral tiro alo; thaj o dad tiro čhinda e thule guruve so saste ole ađićerda.

²⁸ A ov holjanđa pe thaj ni manglja te đerdini. Tegani iklistilo o dad lesoro thaj ruđisarda le.

²⁹ A ov irisarindoj phenđa e dadese: Eke, kandav tut edobor berša thaj nisar na nakhavdem o čhinavdipe tiro, ta mange nisar na dinđan ni buzno te lošalisavav mle amalencar.

³⁰ A kana avilo odova tiro čhavo, savo čhordarda o barvalipe tiro e lubnanca, ćhindan lese guruve thuljarde.

³¹ A ov lese phenđa: Mlo čhavo, tu sijan sajekh mancar, thaj sa mlo si tiro.

³² Trubul te pherđol tiro vilo thaj te lošare tut, kaj akava phral tiro mulo sine, thaj đivdinisajlo; thaj našaldo sine, thaj arakhlja pe.