Lukéstar 14 - Romski prevod Novog zaveta - Srbija

Sastaripe e nasvalengo kotar o panjesoro nasvalipe

¹ Thaj kerdilo pe te đerdini ko savato ano kher jekhe kotar e phureder e farisejengo te xal maro; thaj on dikhena pe leste.

² Thaj dikh, sine anglal leste khajekh manuš savo sine le panjesoro nasvalipe.

³ Thaj irisarindoj o Isus phenđa e kanutnorenge thaj e farisejenge vakerindoj: Aj li muklino ano savato te sastarel pe? A on aćhile.

⁴ Thaj ov astarda pes leste, sastarda le thaj meklja.

⁵ Thaj irisarindoj phenđa lenge: Savo tumendar na ka ma pire here ja guruve, te perel ano bunari, sigo inkalela ano dive e savatosoro?

⁶ Thaj naštisarde lese te irisaren pe odova.

Angluno thaj paluno than

⁷ A e akharutnenge mothoda e paramiči, kana dikhlja sar alosarena e paćivale thana, thaj phenđa lenge:

⁸ Ked ko akharel ko bijav, ma beš ano paćivalo than, te na ovel maškar e akharde khonik majdikhuno tutar;

⁹ Thaj te na avel odova savo akharda vi tut thaj le, thaj phenel tuke: Dode o than akalese. Thaj teg lađasa ka đa te astare paluno than.

¹⁰ Aj kana ove akhardo, avindoj beš po paluno than, kaj odova savo akharda tut phenel kana avel: Amala, cide tu poupre. Teg ka ovel tuke paćiv anglal odola save bešena tusa baš e astalja.

¹¹ Kaj sako savo pes vazdel ka teljarel pe, a savo pes teljarel ka vazdel pe.

¹² A vi odolese so le akharda phenđa: Kana deja divesko xape ja raćako xape, ma akhar e amalen tiren, ni e phralen tiren, ni tiren njamoren, ni e barvale pašunen, te na ma napal vi on tut akharena thaj irinena tuke.

¹³ Aj kana kere xape, akhar e čororen, e sakaten, e langaljen, e kororen;

¹⁴ Thaj baxtardo ka ove so tuke on nanelen sosa te irinen; aj ka iril pes tuke katar o đivdisaripe e čačutnengo.

Baro xape

¹⁵ A kana odova šunđa khajekh odolendar so bešena lenca baš e astalja, phenđa lese: Baxtalo si odova savo ka xal xape ano Thagaripe e Devlesoro!

¹⁶ A ov lese phenđa: Nesavo manuš gatisarda baro raćako xape thaj akharda buten.

¹⁷ Than an vaxto raćake xapesko, bičhalda e kandine ple te phenel e akharutnenge: Aven, kaj si akana sa gatime.

¹⁸ Thaj lije savore redosa te vakeren. O angluno lese phenđa: Ćindem umal, thaj musaj te ikljovav te dikhav la; ruđinav tut, mothov ma.

¹⁹ Vi o dujto phenđa: Ćindem pandž jarmore guruva, thaj đav te dikhav olen; ruđinav tut, mothov ma.

²⁰ Vi o trito phenđa: Prandosajlem, thaj odolese našti te avav.

²¹ Thaj avindoj o kandino odova, mothovda akava ple rajoske. Teg holjanđa o ćherutno thaj phenđa ple kandinese: Ikljov sigo pe trgura thaj dromora e dizjake, thaj ane akari e čororen, vi e sakatimen vi e langaljen, vi e kororen.

²² Thaj phenđa o kandino: Rajo, kerdilo pe sar so phenđan, thaj pana isi than.

²³ Thaj phenđa o rajo e kandinese: Ikljov pe droma thaj maškar e bara, thaj khamisare len te đerdinen te pherelpe mlo ćher.

²⁴ Kaj tumenge vakerav nijekh katar odola akharde manuša na ka xal mle raćake xamata. Kaj si but akharde, aj si hari alosarde.

Popherdo meklipe e Isuse Hristose

²⁵ Thaj kana đana pale leste bute selore, thaj dikhindoj phenđa lenge:

²⁶ Te khonik avel mange thaj ni ritol e dade ple, thaj daja, thaj e romnja, thaj e čhavoren, thaj e phralen, thaj e phenjen, ta vi o đivdipe plo, na ka šaj te ovel mlo sikamno.

²⁷ Thaj ko na igarel o trušul plo thaj pala mande na đal, na ka šaj te ovel mlo sikljovno.

²⁸ Kaj ko tumendar, kana mangel te vazdel e kula, na bešel najangle te kerel e trošipa, ka šaj li te điagorisarel?

²⁹ Te na ka ma, kana čhivel o temelji te naštil te điagorisarel, savore save dikhen ačhen te asan lese.

³⁰ Vakerindoj: Akava manuš lija te vazdel, te naštil te agorisarel.

³¹ Ja savo thagar, kana đal ano maripe te malavel pe avre thagareja, ni bešel najangle thaj ni phurederisarel pe va li si zoralo te malavel pe deše miljenca odolesa so đal pe leste biše miljencar?

³² Te naštisarda, ka bičhalel e bićhalutnen đikaj si odova pana dur thaj ruđil baš o baraštipe.

³³ Geja, akana, sako tumendar savo ni mukel sa so isile, našti te ovel mlo sikljovno.

³⁴ O lon si lačho, aj te vi o lon bihaćarel pe, sosa ka lonđarel pe?

³⁵ Naj lačho ni baš e phuvjake ni baš phubalimaske, aj čhoren le avrijal. Kas isi kana te šunel, nek šunel!