Lukéstar 13 - Romski prevod Novog zaveta - Srbija

Jertipe ja bibaxtalipe

¹ Ano odova pale vaxto avile nesave thaj vakerde lese baš e Galilejenge kaskoro rat o Pilat haminđa e viktimenca lengerenca.

² Thaj irisarindoj o Isus phenđa lenge: Den godi li kaj odola Galileja sine bezehale kotar e sa Galileja, kana ađahar mudardile?

³ Na, phenav tumenge, aj te na jertisajlen, sare ađahar ka mudarđoven.

⁴ Ja odola dešofto so pe lende peli e kula ano Siloam thaj mudarđa len, den godi li kaj on sine najbange kotar e sa manuša so đivdinen ano Jerusalim?

⁵ Na, phenav tumenge, aj te na jertinđen tumen, sare ađahar ka mudarđon.

⁶ Phenđa pale akaja paramiči; Nekas sinele sumučinalin sijime ane ple drakhalina, thaj alo te rodel bijanipe pe late, thaj ni arakhlja.

⁷ Teg phenđa e drakhalinarese: Ake trin berša sar avav thaj rodav bijanipe pe akaja sumučinalin, thaj ni arakhav. Čhin la! Sose vi e phuv te kovljol?

⁸ A ov irisarindoj phenđa lese: Rajona mek la vi akava berš đikaj hanav trujal late thaj čhivav gunoj.

⁹ Ta šaj ka bijanel; te li na, ka čhinela pala odova.

Sastaripe e čidine džuvljakoro ko savato Paramiče e morjakere kućinatar thaj e majatar

¹⁰ A sikavđa ani jekh sinagoga ko savato.

¹¹ Thaj dikh, sine odothe e đuvli sava sine la đi bišaipno dešofto berša, thaj sine ćidimni thaj naštisarda nisar te vortosarel pe.

¹² A kana dikhljala o Isus, akharda la thaj phenđa lake: Đuvlije, mukljardi injan kotar o bizoraljipe tiro.

¹³ Thaj čhuta pe late o vasta, thaj sigate vortisajli thaj ašundinđa e Devle.

¹⁴ A o phurederutno e sinagogako, bičaljarindoj so o Isus sastarđala ko savato, irisarindoj phenđa e selorese: Šov dive si ane save trubul te keras; an akala, akana, aven ta sastaren tumen, a na ano dive e savatosoro.

¹⁵ A o Devljutno lese irinđa thaj phenđa: Dujemujengere, sarsavo tumendar na li phravel ano savato ple guruve ja here e balajatar thaj ingarel le te pijel?

¹⁶ A akala, ćhaja e Avraamosara, sava phandja o beng ake dešofto berša, na li trubuja te phravelpe kotar akava šelo ano dive e savatosoro?

¹⁷ Thaj đikaj ov akava vakerda ladžandile sare save lese opipesajle; a sa o seloro lošalisajle pe baš e sa bare kotora so ov olen kerda.

¹⁸ A ov vakerđa: Soske si miazutno o Thagaripe e Devlesoro, thaj soa le ka đirindosarav?

¹⁹ Miazutne si vi e kućinake mojratar, save lindoj o manuš frdinđa ani bača pli, thaj barilo thaj ulo kaš baro, thaj e čiriklja e badaleske thanardile pe lesere krangora.

²⁰ Palem phenđa: Soa ka đirindosarav o Thagaripe e Devlesoro?

²¹ Miazutne si vi e majake savi lija e đuvli thaj ućhardala ano trin balaje e varese, đikaj na ušlilo sa.

Tanguno udar Rovipe upral o Jerusalim

²² Thaj nakhena pe dizija thaj gava sikavindoj thaj džandoj ano Jerusalim.

²³ Phenđa lese pale nesavo: Devljutnea, si li hari odola save mukljardon pe? A ov lenge phenđa:

²⁴ Maren tumen te đerdinen ko tanguno udar; kaj tumenge phenav: but đene ka roden te đerdinen thaj na ka šaj.

²⁵ Kana uštel o kherutno thaj phandela o udar, thaj len avrijal te terđon thaj te maren ano udar vakerindoj: Devljutnea, Devljutnea, phrav amenge! Thaj irisarindoj ka phenel tumenge: Na penđarav tumen kotar sijen.

²⁶ Atoska ka len te vakeren: Xaljam angla tute thaj piljam, thaj pe trgura amare sikavđan.

²⁷ A ov ka phenel: Vakerav tumenge, na penđarav tumen kotar sijen. Čiden tumen mandar sare save keren bičačipe!

²⁸ Odothe ka ovel rovipe thaj krcope dandengo, kana ka dikhen e Avraame thaj e Isake thaj e Jakove thaj sa e profetonen ano Thagaripe e Devlesoro, a pes avrijal ikalde.

²⁹ Thaj ka aven kotar o istoko thaj o zapado thaj kotar o severo thaj jugo thaj ka bešen baš o astalja ano Thagaripe e Devlesoro.

³⁰ Thaj dikh, isi palune save ka oven anglune, thaj isi anglune save ka oven palune.

³¹ Ano odova dive ale paše nesave fariseja vakerindoj lese: Ikljov thaj đa akatar, kaj o Irod mangela te mudari tu.

³² Thaj phenđa lenge: Đan thaj vakeren odola bareporake: Ake ikalav e bengen thaj kerav sastaripe avdive thaj tajsa, a o trito dive ka agorisarav.

³³ Aj avdive thaj tajsa thaj avertajsa trubul mange te đav; kaj o profeto našti te mudarđol avral kotar o Jerusalim.

³⁴ Jerusalime, Jerusalime, savo mudareja e profetonen thaj frdeja bara pe bičhalden tuke, kobor droma mangljum te čedav e čhavoren tiren sar e khani e pujen plen telal o phaka, thaj na mangljen!

³⁵ Eke, mekelpe tumenge o kher tumaro čučo. A vakerav tumenge: na ka dikhen man đikaj na aven te phenen: Baxtardo savo avel ano anav e Devlesoro!