Lukéstar 12 - Romski prevod Novog zaveta - Srbija

Mukljuno mothovipe

¹ Kana maškarodova, kidinde pe milja thaj milja selore ta aćhile te uštaven jekh avre, lija te vakerel ple sikljovnenge: arakhen tumen e farisejengere majatar, a odova si dujmujipe.

² A khančik nane garavdo so ni ka phučarel pe, ni garavdo so ni ka đanel pe.

³ Odolese, odova so ano kalipe phenden, ka šunel pe po rošlipe; thaj so po kan šušurisarden ane odaje, ka vakerel pe po ćatle.

⁴ A vakerav tumenge, mle amalenge: Ma daran odolendar save mudaren o trupo thaj napal našti khančik najbut te keren.

⁵ Aj tumenge ka sikavav kastar te daran: Daran odolestar savo, kana mudarel, isi le baroderipe te čhudel ane bengengi jag; va, phenav tumenge, lestar daran.

⁶ Na bikinen pe li pandž čirikle baš o duj pare? Thaj nijekh lendar nane bisterdo anglo Devel.

⁷ A ane tumende si sarsavo bal ko šero đendo. Ma daran akana; tumen sijen pošukar kotar e but čirikle.

⁸ Aj tumenge phenav: Savo si man mothovel anglo manuša, ka mothovel vi o Čhavo e Manušesko ole anglo phakale e Devlesere;

⁹ A savo čhudel man anglo manuša, odolestar vi me ka čhudivav anglo phakale e Devlesere.

¹⁰ Thaj sarsavo savo phenela o lafi opipe e Čhavese Manušestar, ka jertinipe lese, a savo ka hulini e Sumnale Đe ni ka jertinipe lese.

¹¹ A kana tumen anen ano sinagoge thaj anglo šerutne thaj baroderipe, ma grižinen tumen sar ka so irisaren ja so ka vakeren;

¹² Kaj tumen o Sumnalo Đi ka sikavel ko odova časo so trubul te phenen.

Dilino barvalo Grižalipe thaj paćavipe

¹³ Phenđa lese pa neko kotar o seloro: Sikamneja, phen mle phralese te ulavel manca o aćhipe.

¹⁴ A ov lese phenđa: Manušeja, ko man čhuta krisarese ja ulavdutnese upral tumende?

¹⁵ A lenge phenđa: Dikhen thaj arakhen pe sarsave lipesko, kaj khonik na đivdini ple lačhalimatar, so si but barvalo.

¹⁶ Mothoda lenge ta e paramiči vakerindoj: Ano jekh barvalo manuš bijanđa e umal.

¹⁷ Thaj delape godi ana peste vakerindoj: So te kerav, kaj nane man ane soste te kedav o nilajipe mlo?

¹⁸ Thaj phenđa: Akava ka kerav: ka peravav e ambara mle thaj ka vazdav pobare; thaj odote ka kedav sa e điva mle thaj lačhimata mla;

¹⁹ Thaj ka phenav mle ođeske: Ođeja; isi tut bute lačhimata čedime baš bute beršenge; sov, xa, pi, lošarin tut.

²⁰ A o Devel lese phenđa: Bigođakereja, akaj rat ka roden o ođi tiro tutar; a odova so gatisardan kasoro ka ovel?

²¹ Ađakar ovela odoleske savo peske čedel barvalipe, a ni barvajol e Devleja.

²² A e sikljovnenge plenđe phenđa: Odoleske tumenge phenav: ma grižin tumen tumare ođesa so ka xan, ni truposa ano so ka urjaven tumen;

²³ O ođi si majšoruno e xamastar thaj o trupo e šejendar.

²⁴ Dikhen e garvajen sar ni sijinen, ni čhinen, ni naj len than garajmaske ni ambara, thaj o Devel len parvarel. A kobor sen tumen majšorune e čiriklendar!

²⁵ A ko tumendar grižindoj šaj te dodel ple barjopnase jekh kuj?

²⁶ Te, akana, naštine ni najhari sose grižinena tumen baš aćhuno?

²⁷ Dikhen e ljiljanura sar barjon: ni munčin pe, ni katen; aj tumenge phenav: ni o Solomon ano sa ašundipe plo ni urjavđa pe sar jekh lendar.

²⁸ Te li e ćar ane umalin, savi si avdije, a tajsa ani kuba frdel pe, O Devel ađahar urjavel, kobor ka ovel majbut tumen, haripaćamnalen!

²⁹ Ni tumen na roden so ka xan thaj so ka pijen, thaj ma te daravđon.

³⁰ Kaj sa akava rodena o bidevlesere akale themestar; a o Dad tumaro đanel kaj tumenge trubul akava.

³¹ Aj roden o Thagaripe e Devlesoro, thaj sa akava tumenge ka del pe.

³² Ma dara, e tikne paćavnengo, kaj sine o kamipe tumare Dadesoro te del tumenge o Thagaripe.

³³ Bikinen so isi tumen thaj doden kovlipe, keren tumenge traste save ni ka phuravđon o than po badali savo ni ka čučardol, kote o čor ni avel paše, ni e paparugori rumini.

³⁴ Kaj kote si o barvalipe tumaro odothe ka ovel o vilo tumaro.

Sako dive gatime thaj džangavde

³⁵ Nek oven o gruđa tumare phandine thaj o memelja tharde.

³⁶ A tumen miazutne e manušenge save ađikeren e rajo pumare, kana ka irinel pe e bijavestar te lese, sar avel thaj khuvel, sigate te phraven.

³⁷ Baxtaripe e kandinenge odolenge saven o rajo avindoj arakhel džangavde. Čače tumenge phenav kaj ka phanden pe, thaj ka sijisaren len, thaj ka aven paše thaj lenge ka kandel.

³⁸ Thaj te alo ano aver arakhajpe, thaj ano trito arakhajpe avel, thaj arakhel len ađahar, baxtaripe odole kandinenge.

³⁹ Aj akava đanen: kana bi đanela o kherutno ano savo časo ka avel o čor, ka ovel džangavdo, thaj ni ka mekel te hanen lesoro o ćher.

⁴⁰ Thaj tumen, akana, oven gatime, kaj ano savo časo na ka den godi, ka avel o Čhavo e Manušesko.

⁴¹ A o Petar leske phenđa: Devljutneja, vakere li akaja paramiči amenge ja savorenge?

⁴² A o Devljutno phenđa: Ko si, akana, odova paćavno thaj gođaver vastarutno, save ka čhivel o rajo upral ple kherutne te del len xape ko vaxto?

⁴³ Baxtaripe odole kandinese save o rajo lesoro, avindoj, arakhele te kerel ađahar.

⁴⁴ Čače tumenge phenav, upral o sa barvalipe plo ka čhuvel le.

⁴⁵ Te li phenđa o kandino odova ano plo vilo: Ni ka mlo rajo avel pana but vaxto; thaj ačhel te marel e kandinen thaj e kandinjen thaj xal thaj pijel, vi maćovel pe;

⁴⁶ Ka avel o rajo odole kandinesko ano dive kana na ađikerel, thaj ano časo kana ni đanel, thaj ka čhinel le, thaj o kotor lesoro ka čhivel e bipaćavnenca.

⁴⁷ A odova kandino savo đanđa o kamipe ple rajosoro thaj ni laćharda ni kerda po kamipe lesoro, ka ovel but mardo;

⁴⁸ A savo ni đanđa, pa kerda so therinđa mariba, ka ovel hari mardo. A sakonestar kase si but dindo, but vi ka rodel pe; a kase si paćavino but, lestar majbut ka rodel pe.

⁴⁹ Aljum te čhudav e jag ki phuv; thaj sar ka ma mangav te ovela thablini.

⁵⁰ Aj mange trubul te bolav ma bolipnasa, thaj sar mange si phare đikaj odova ni kerel pe!

⁵¹ Den godi li kaj aljum šandipe te dav ki phuv? Na, phenav tumenge, aj ulavdipe.

⁵² Kaj od akana pandžore ano jekh kher ka oven ulavde: trin opipe dujendar, thaj duj opipe trinendar.

⁵³ Ka ulavel pe o dad e čhavestar thaj o čhavo e dadestar; e daj e ćhajatar thaj e ćhaj e dajatar; ka ovel e sasuj opipe ple borjatar thaj e bori opipe ple sasujatar.

⁵⁴ A vi e selorese vakerđa: Kana dikhen e nuvera, kaj uštel katar o zapad, sigate vakeren: Avel zoralo bršin; thaj ovela ađahar.

⁵⁵ Thaj kana dikhen kaj o jugo phurdel vakeren: Ka ovel tatipe; thaj ovel.

⁵⁶ Dujemujengere, o muj e badalesko thaj e phuvjakoro đanen te penđaren, a o vaxto akava sar ni penđaren?

⁵⁷ A sose vi korkore pestar na krisinen odova so si čačutno?

⁵⁸ Kaj kana đa tire opipeutnesa koro šerutno, trudin tu ta vađe po drom inkaletu lestar, te na legareltu e krisose, thaj o krisari te na del tut e čhuvutneske, a o čhuvutno te na frdel tut ano phandipe.

⁵⁹ Vakerav tuke: Ni ka ikljove odothar đikaj na ka de o paluno lovo.