Lukéstar 11 - Romski prevod Novog zaveta - Srbija

Siklipe kotar e ruđutni

¹ Thaj kana ov ruđila pe e Devlese ko jekh than ta ačhavda, phenđa lese jekh kotar e sikljovne lesere: Devljutnea, sikav amen te ruđis amen, sar so vi o Jovan sikavđa e sikljovnen plen.

² A ov lenge phenđa: Kana ruđinen tumen vakeren: Dade amaro savo sijan po badali, te sumnalpe o anav tiro; te avel o thagaripe tiro; te ovel kamipe tiro vi pe phuv sar po badali.

³ Maro amaro prekal trubuno de amenge sarsavo dive.

⁴ Thaj jertisar amenge e bezeha amare, kaj vi amen jertisara sarsavonese udžilutnese amarese; thaj ma legar amen ano zumavipe; aj ikal amen e đungalestar.

⁵ Thaj phenđa lenge: Savo tumendar isi le amal thaj gelo koro leste pe ekvaš rat thaj phenđa lese: Amala, de ma trin mare udžile,

⁶ kaj alo maj o amal dromestar thaj naj ma sova te kaninav le.

⁷ A ov andral irisarindoj te phenel: Ma le mo šandipe; akana o udar si phandlo, thaj e ćhavore si mle manca ano kreveto; našti te uštav tuke te dav.

⁸ Phenav tumenge: Vi te na uštino te del lese odolese kaj si lesoro amal, aj baš lesoro bijakhipe ka uštel thaj ka del kobor trubul lese.

⁹ Thaj me tumenge vakerav: Roden thaj ka delpe tumenge; roden thaj ka arakhen; khuven thaj ka phravelpe tumenge.

¹⁰ Kaj sarsavo savo rodela, lela; thaj savo rodela, arakhi; thaj savo khuvela, phravelape lese.

¹¹ Savo si maškar tumende dad savestar te o čhavo rodel maro, te del lese bar? Ja te rodinđa mačho, te po than e mačhesko del le sape?

¹² Ja te rodinđa jaro, te del lese škorpija?

¹³ Kana akana tumen, e đungale avune, džanen šukar davipe te den e ćhavorenge tumarenge, kobor najbut o Dad tumaro e badalesko ka del Đi Sumnalo odolenge save roden lestar?

O Isus thaj o Veelzevul E Jonesoro semno

¹⁴ Thaj tradena e đungale đen, thaj odova sine laloro; thaj kana iklistilo o đungalo đi, vakerda o laloro; thaj prašukarena pe o seloro.

¹⁵ A nesave lendar phenđe: Ažutimasa e Veelzevulosko, šerutno e đungale đeso, ikalda e đungale đen.

¹⁶ A e aver zumavindoj le rodle lestar semno e badalestar.

¹⁷ A ov đanglindoj lengere dije gođenge phenđa lenge: Sarsavo thagaripe savo ulavel pe korkoro ane peste, ka pustonel, vi o kher savo ulavel pe korkoro ane peste, ka peravđol.

¹⁸ Te vi o beng ulavelpe korkoro ane peste, sar ka ačhol o thagaripe lesoro? Kaj vakaren kaj e Veelzevuleske ažutimasa tradav e đungale đen.

¹⁹ Te li me e Veelzevuleske ažutimasa tradav e đungale đen, e čhave tumare kasera ažutimasa ka traden? Odolese tumenge on ka oven krisara.

²⁰ A me te e Devlesere najea tradlem e bengen, akana, reslo tumenge o Thagaripe Devlesoro.

²¹ Kana o zoralo bandukil pe thaj arakhel boro plo, o barvalipe si lesoro ko šandipe.

²² A kana avel o pozoralo lestar thaj zorarel le, lela sa o bandukipe lesoro ano savo paćaja, thaj ulavel so astarda lestar.

²³ Savo naj manca, opipe si mandar; thaj savo na kedel manca, čhorel.

²⁴ Kana o biužo đi ikljol andar o manuš, nakhel kotar bipanjesere thana rodindoj lačhipe, thaj na arakhindoj vakerel: Ka irinav maje ano kher mlo kotar ikliljem.

²⁵ Thaj avindoj arakhlja šulavdo thaj lačhardo.

²⁶ Teg đelo thaj lelja efta aver đe pođungale pestar, thaj đerdindoj đivdinen odothe; thaj najpalal e trujalipe oven e manušese okolese pođungale e anglunestar.

²⁷ A đikaj ov odova vakerđa, vazdinđa o krlo jekh đuvli kotar o seloro thaj phenđa lese: Baxtardino o vođi savo tut akharđa, thaj čučija save piljan!

²⁸ A ov phenđa: Čače, baxtarde si odola save šunena o lafi e Devlesoro thaj ićeren le.

²⁹ A e selorese save čedena pe ačhilo te vakerel: Generacija akaja si džungali generacija; roden o semno, thaj ni ka delpe lenge o semno sem o semno Jonesoro e profetosoro.

³⁰ Kaj sar si o Jona sine semno e Ninevljanenge, ađahar vi o Čhavo e Manušesko ka ovel semno akala generacijake.

³¹ E thagarni kotar jug ka uštel po kriso e manušenca generacijake akalake, thaj ka krisinel len; kaj oj ali agorestar e phuvjako te šunel gođovaripe e Solomonosko, a dikh, akate si pobaro e Solomonostar.

³² E manuša Ninevljaninja ka ušten po kriso akala generacija, thaj ka krisisaren la, kaj jertisajli po vakeripe e Jonesko, a dikh, akate si pobaro e Jonestar.

³³ Khoni ta ni čhivel e thari memeli po garavdo than, ni telal o vaso, aj po memeljako than te dikhen o rošlipe odola save đerdinen.

³⁴ E memeli e trupose si jak. Te, akana, e jak tiri ovel sasti, thaj sa o trupo tiro ka ovel rošlipe; te si e jak tiri ovel rumimi, vi o trupo tiro ka ovel kalipno.

³⁵ Arak, akana, kaj o rošlipe savo si ana tute te ni ovel kalipe.

³⁶ Kaj te si sa o trupo tiro rošlipe te na ovel le nijekh kotor kalipno, ka ovel rošlipe sasto sar kana e memeli strefisarel rošlipnasa.

Daravipe e lilvarnenge thaj e farisejenge

³⁷ A kana ov odova vakerda, ruđisarda le nesavo farisej te xal ke leste. A ov đerdindoj bešlo uzal astalja.

³⁸ A o farisej čudisalo kana dikhlja kaj najanglal ni thovđa pe anglal o xape.

³⁹ A o Devljutno lese phenđa. Akana tumen e fariseja avrijal khosena e taxtaj thaj o čaro, a andral sijen pherde grabibe thaj đungalipe.

⁴⁰ Bigođarengere, na li odova kerda vi andral savo kerda vi avrijal?

⁴¹ Pale den kovlipe odolestar so si andre; thaj dikh, sa ka ovel tumenge užo.

⁴² Aj pharipe tumenge e farisejenge so dena dešoro e taxtajatar thaj ruta thaj katar sarsavo vunatuno, a trujalisaren o čačipe thaj o kamlipe e Devlesoro: akava trubuja te kerolpe, thaj odova te na mukljarelpe.

⁴³ Pharipe tumenge e farisejenge so kamena o paćivalo than pe sinagoge thaj resavnipe pe trgura.

⁴⁴ Pharipe tumenge, lilvarnalen thaj farisejalen, dujemujengere, so sijen sar bihaćarde limora, ta e manuša pe lende upral uštaven a ni đanen.

⁴⁵ A nesave e kanunendar irisarindoj phenđa lese: Sikamneja, vakerindoj odova vi amen dukhave.

⁴⁶ A ov phenđa: Pharipe vi tumenge e kanunonenge so ladaven pe manuša dreza phare baš o legaripe, a tumen ni jekhe najesa tumareja ni mangen te dolen tumen e drezatar.

⁴⁷ Pharipe tumenge so zidonena limorutne e profetonenge, a tumare dada len mudarde.

⁴⁸ Tumen, akana, čačaven thaj ačhen pe odola kotora tumare dadengere; kaj len on mudarde, a tumen lenge limorutne zidonena.

⁴⁹ Odolese o baro đanglipe e Devlesoro phenđa: Ka bičhalav lenge e profetonen thaj apostolen, thaj lendar jekhendar ka mudaren, a averen ka uspudinen;

⁵⁰ Te rodelpe akale bijanimastar o rat sarijengo e profetonengoro čhordi kotar o mothodipe e themesko.

⁵¹ Kotar o rat e Aveljesoro sa đi o rat e Zaharijesoro, savo mudardilo maškar e viktimutne thaj hramo. Va, phenav tumenge, ka rodel pe akale bijanipestar.

⁵² Pharipe tumenge e kanunđijenge, so leljen o klidi e džanipesoro: korkore ni đerdinđen, a odolen save bi đerdinen niden.

⁵³ A đikaj lenge ov akava vakerđa, lelje o lilvarne thaj o fariseja bara xolja te den pe leste thaj te rupuzinen sarsave phućimnasa.

⁵⁴ Ašuđarindoj thaj rodindoj na ka ma li so dolena andar o muj lesoro te bi došaren le.