Lukéstar 10 - Romski prevod Novog zaveta - Srbija

Misija e evftavardešuduj e sikljovnengiri

¹ A atoska alosarda o Devljutno vi averen Eftavardešudujen, thaj bičhalda len duj po duj anglo muj plo pe sa diz thaj than kotar manglja korkoro te đal.

² Thaj phenđa lenge: o čhinipe si but, a e bućarne si hari; odolese ruđin tumen e devljutneserese e ćhinipesko te ikalel e bućarnen po čhinipe plo.

³ Đan; ake me tumen bičhalav sar e bakroren maškar o ruva.

⁴ Ma legaren kesa ni trasta ni pođipe, thaj khanikasa ma te vakeren ko drom.

⁵ An savo god kher đerdinen najangle phenen: Šandipe akale khereste!

⁶ Thaj te ulo othe o čhavo šandipasoro, ka ačhol pe leste o šandipe tumaro; te na li ovel, ka irinelpe tumenđe.

⁷ A ano odova kher oven, thaj xan thaj pijen so olen isi, kaj o bičhaldo si paćivalo e pokindako plakoro; ma nakhen kotar o kher ano kher.

⁸ Thaj ani savi diz đerdinen thaj lena tumen, xan so tumenge ikalelpe.

⁹ Thaj sastaren e nasvalen save si ano kher, thaj vakeren lenge: Paše alo tumenge o Thagaripe e Devlesoro.

¹⁰ Thaj ani savi god diz đerdinen thaj ni meken tumen, iklindoj pe trgura lesere, phenen:

¹¹ Vi o praxo so amenge astardilo tumara dizijatar baš e pre amare ćinosara tumenge. Pale akava te đanen kaj tumenge paše alo o Thagaripe e Devlesoro!

¹² Phenav tumenge kaj e Sodomake ka ovel po lokhe ano Dive odova na li odola dizijake.

¹³ Pharipe tuke, Horazine! Pharipe tuke, Vitsaido! Kaj si ano Tiro thaj Sidona te ovena prašukaripa so sine an tumende, dumutan ka ma, bešindoj ano ostro bala thaj praxo, jertona.

¹⁴ Pale e Tiroske thaj Sidonake ka ovel po lokhe ko Kriso aj tumenge.

¹⁵ Thaj tu, Kapernaume, savo si đi o badali vazdinđan tu, đi ke benđengiri jag ka pere.

¹⁶ Ko tumen šunel, man šunel, thaj ko tumendar čhudel pe, mandar čhudel pe; a ko mandar čhudel pe, čhudel pe Odolestar savo man bičhalda.

¹⁷ Irinđe pe e Eftavardešore lošajmasa vakerindoj: Devljutnea, vi e đungale đe amenge kandinena ano tiro anav.

¹⁸ A ov lenge phenđa: Dikhljum e benge kaj pelo e badalestar sar strefin.

¹⁹ Ake tumenge dav o baroderipe te terđon ko sapa thaj pe škorpije thaj pe sa e zor e bengesiri, thaj khančik tumenge ni ka ovel.

²⁰ Pale odolesa ma lošalen tumen so tumenge e đe kandinenape, aj lošalen tumen so si e anava tumare hramome po badali.

²¹ An odova časo lošajlo pe đesa o Isus thaj phenđa: Ašarav tu, Dade, Devljutno e badalesoro thaj phuvjakoro, so akava garavđan e gođovarendar thaj e haljovnendar, a phućardan odova e bidžungalenge. Va, Dade, kaj ađahar sine o kamipe tiro.

²² Thaj irindoj e sikadenge phenđa: Sa mange dinđa, o Dad mlo, thaj khonik na đanel ko si o Čhavo, sem o Dad, ni ko si o Dad, sem o Čhavo, thaj te o Čhavo manglja kaske te phučarel.

²³ Thaj irindoj e sikljovnenge korkorune phenđa: Bahtardipe e jakhenge save dikhen so tumen dikhen.

²⁴ Kaj tumenge phenav kaj but profetora thaj thagara mangle te dikhen so tumen dikhen, thaj na dikhle; thaj te šunen so tumen šunen, thaj na šunde.

O kovlo Samarjanin

²⁵ Thaj dikh, jekh sikljovno kanunesko uštilo thaj zumavindoj lese phenđa: Sikamneja, so mange trubul te kerav thaj te lav o đivdipe bimerimasoro?

²⁶ A ov leske phenđa: So si hramome ano Kanuni? Sar drabare?

²⁷ A ov irisarindoj phenđa: Čumudin e Devljutne Devle tire sa tire vileja, thaj sa ođesa tirea, thaj sa zorasa tirasa, thaj sa gođasa tirasa; thaj paše tire sar korkore tut.

²⁸ A ov leske phenđa: Čače irisardan; odova ker thaj ka đivdine.

²⁹ A ov, manglindoj pes te čačavel, phenđa e Isusese: A ko si mlo pašuno?

³⁰ A o Isus irisarindoj phenđa: O manuš nesavo huljela kotar o Jerusalim ano Jerihon, thaj zapelo maškar o čora, thaj akala le uljavde thaj marde ole sa ane rane, pa đele, a ole ekvašmule mekle.

³¹ Nekotar pa huljela odole dromeja nesavo rašaj thaj dikhindoj le, nakhlo.

³² A ađahar vi o levit, kana sine pe odova than, pašindoj, dikhlja le thaj nakhlo.

³³ A o Samarjanin nesavo drumarindoj avilo đi leste, ta kana dikhlja le kovlilo pe leste;

³⁴ Thaj pašindoj paćarda lesere rane thaj makhlja le uljea thaj e molja; thaj bešarindoj le pe plo gras, anđa le ane mehana, thaj phurederisajlo trujal leste.

³⁵ Thaj tajsa dive podžindoj ikalđa duj dinarja ta dinđa e mehanđijase, thaj phenđa lese: Phurederisavtu baš oleste, a so pobuter ka trošine me ka pokinav tuke kana ka irinama.

³⁶ So de godi, akana, savo si kotar odola trinendar sine najpašuno odolese so sine zapelo maškar o čora?

³⁷ A ov phenđa: Okova savo lese kovlipe kerda. A o Isus lese phenđa: Đa, ta vi tu ker ađahar.

E Marta thaj e Marija

³⁸ A kana gele po drom thaj ov dija ano jekh gav, a e đuvli nesavi, po anav Marta, priminđale ano plo kher.

³⁹ Thaj ano late sine e phen po anav Marija, savi bešli koro pre e Isusesere thaj šunela o vakeripe lesoro.

⁴⁰ A e Marta lija pe te bi so najlaćhe kandele, thaj pašindoj lese phenđa: Devljutnea, sar tu ni hajisare so mi phen man meklja korkori te kandav? Phen lake, akana, te ažutil man.

⁴¹ A o Isus irisarindoj phenđa lake: Marta, Marta, de tut griža thaj daravejatu butese.

⁴² A numa si jekh trubuno. Pale e Marija lačho kotor alosarda savo olatar na ka lelpe.