Lukéstar 1 - Romski prevod Novog zaveta - Srbija

Džangljardo bijandipe e Jovanesoro e Bolipesoro

¹ Sar kaj but zumavde te čhiven mothovipe e ćerimatendar save ćerdile maškar amende,

² sar so amenge mukle godola save katar o anglunipe sine dićhutne thaj kandine Lafenge,

³ dijemgodi vi me, phućindoj čače sa katar o anglunipe, rindosa hramindoj tuke, bareođesko Teofilo,

⁴ te penđare o temelji odole lafjorengo savenca san sikavdo.

⁵ Ano vaxto e Irodosko, thagar e judengo, sine nesavo rašaj katar o rindo e Avijinosko, po anav Zaharija, thaj e romni leskiri katar e ćhaj Aronongi, po anav Jelisaveta.

⁶ A sesa solduj čačutne anglal o Devel, thaj đivdisarde pe sa e vaćerimata thaj prelače e Devljutnesere laćhardimata.

⁷ Thaj najsalen ćhavore, kaj e Jelisaveta sine bibijavni, thaj ine solduj ake purane beršenge.

⁸ Thaj kerdilo pe, kana vov kandla pe piro rindo anglal o Devel,

⁹ kaj po siklipe e rašajengo pelo lese ane kotor te del ani khangiri e Devljutneski thaj te sungarel.

¹⁰ Thaj sa but selore ruđina pes avrijal vaš o vaxto e sungarimasko.

¹¹ A leske mothodilo o phakalo e Devljutnesko aćhindoj pe daxni rig e sungarutne viktimutnesko.

¹² Thaj xasardilo o Zaharija dikhindoj les thaj lija le e dar.

¹³ A o phakalo lese vačerđa: Ma dara, Zaharija, pherdino si o ruđipe tiro; thaj e romni tiri e Jelisaveta ka bijanel tuke čhave, thaj ka čhive lesoro anav Jovan.

¹⁴ Thaj ka ovel tuke lošanipe thaj pherdo vilo, thaj bute ka lošanen pe pe leskoro bijandipe.

¹⁵ Kaj ka ovel baro anglo o Devljutno, thaj ni ka pijel mol thaj jagakoro pipe; thaj ka pherel pes Đi Sumnalo pana ano vođi pe dajakoro;

¹⁶ Thaj bute čhaven e Izrailjiske ka irisarel e Devljutnese lengere Devlese;

¹⁷ Thaj vov angle ka đal anglal leste ano đi thaj zor e Ilijasko te irisarel e vile dadengoro karing e ćhavore, thaj e bikandinen karing o gođaveripe čačutnengo, thaj te laćharen e Devljutnese o seloro gatime.

¹⁸ Thaj phenđa o Zaharija e phakalese: Pe soste me adava ka penđarav? Kaj me sem phuro thaj e romni mli si ano berša.

¹⁹ Thaj irisarindoj o phakalo phenđa lese: Me sem o Gavrilo savo trđovav anglo Devel, thaj bičhaldo sem te vakerav tuke thaj akava te mothovav.

²⁰ Thaj ake, ka ove laloro thaj nakašaj te vakere đi ko odova dive đikaj odova na ka ovel, odolese so ni paćajan mle lafonenge save ka pherdon ano plo vaxto.

²¹ Thaj e selore adžićerena e Zaharija, thaj phučena pe sose ačhilo ane khangiri.

²² A iklindoj naštisarda te vakerel lenge; thaj haljarde kaj sasa le rošlipe ane khangiri, thaj vov lenge dela džanglipnaste, thaj ačhilo laloro.

²³ Thaj kana pherdile e dive lese kandimaske, gelo ple khereste.

²⁴ A pale odola dive aćili khamni e Jelisaveta lesiri romni, thaj garavela pe pandž masek vakerindoj:

²⁵ Geja kerda mange o Devel ane dive akala ane save dikhla pe mande te inkalel man kotar o ladžavipe, maškar e manuša.

Džangljardo bijandipe e Isusesoro

²⁶ A ano šovto masek bičhaldo sine katar o Devel o phakalo o Gavrilo ani diz galilejesko po anav Nazaret,

²⁷ e ćhajake mangli baš romese, po anav Josif, andar o kher e Davidosko; thaj e ćhajako anav sine Marija.

²⁸ Thaj khuvindoj andre late o phakalo phenđa: Lošalisav, baxtalije! O Devel si tusa, baxtardini san tu maškar e romnja!

²⁹ A voj dikhindoj les, darandili kotar e lafija lesere thaj dija godi: savo bi akava arakhadipe ovel?

³⁰ Thaj phenđa lake o phakalo: Ma dara, Marija, kaj arakhlan baxtalipe ano Devel!

³¹ Thaj ake khamnilan thaj ka bijane čhave, thaj ka čhive leso anav Isus.

³² Ov ka ovel baro, thaj ka akharel pes Čhavo e Najućesko, thaj ka del le o Devljutno Devel skamin e Davidoski leske dadeski;

³³ Thaj ka thagaril upral o kher e Jakovesko sajekh, thaj leske thagarimaske ni ka ovel agor.

³⁴ A e Marija phenđa e phakalese: Sar odova ka ovel kana me ni đanav romese?

³⁵ Thaj irisarindoj o phakalo phenđa lake: O Đi Sumnalo ka avel pe tute, thaj e zor e Devlesiri ka strefisarel tut; odolese thaj odova so ka bijandol ka ovel sumnalo, thaj ka akharel pe Čhavo e Devlesoro.

³⁶ Thaj eke, e Jelisaveta tire njamoski, thaj voj khamnili ano phuripe plo, thaj akava si o šovto masek lake, sava akharena bibijavni.

³⁷ Kaj ano Devel si sa šaj so phenel.

³⁸ A e Marija phenđa: Ake kandini e Devlesiri – nek mange ovel pe lafija tire! Thaj o phakalo đelo latar.

Maladipe e Marijako e Jelisavetasa

³⁹ A e Marija uštindoj odole divesa đeli sigate ane plajinako agor, ani diz Judin.

⁴⁰ Thaj dija ano kher e Zaharijasko, thaj arakhavdili e Jelisavetasa.

⁴¹ A kana e Jelisaveta šunda o arakhavdipe e Marijako, ćhelda o čhavoro ano vogi lako, thaj e Jelisaveta pherdili pes Đi Sumnalo,

⁴² thaj dija vika uće krlesa thaj phenđa: Baxtardi san tu maškar e romnja, thaj baxtardo si o čhavoro tiro ano vogi!

⁴³ Thaj kotar mange akava te avel i daj mle Devljutneski pe mande ano vogi mlo?

⁴⁴ Egolese dikh, kana o krlo tiro arakhadimasko avel ane kana mle, ćhelel o čhavoro lošalimastar ano vogi mlo.

⁴⁵ Thaj baxtalipe odolake savi paćal, te ka kerel pe so lake vakerda o Devel.

E Marijakiri himna

⁴⁶ Thaj phenđa e Marija: Barjarel o ođi mlo e Devle;

⁴⁷ Thaj lošalisajlo mlo đi e Devlese, mle Ikalipnaske,

⁴⁸ kaj dikhlja po kovlipe ple kandinako; kaj dikh, akana ka akharen man baxtardinasa sa e generacije;

⁴⁹ So kerdan mange baripe Barezorako, thaj sumnalo anav lesoro.

⁵⁰ Thaj o kovljardipe lesoro katar e čang đi e čang odolenge save lestar daran.

⁵¹ Pire vastesa čerđa e zor, phaglja e barikanen ane gindimata olenge vilenge.

⁵² Frdinđa e zoralen katar o than thaj vazdinđa e teljarden.

⁵³ E bokhalen čaljarda laćhimatenca thaj e barvalen muklja čuče.

⁵⁴ Astarda e Izrailje e kandine ple te turnjivil pes kovlipese;

⁵⁵ Sar so vakerel e dadenge amarenge, e Avraamoske thaj leske semnoske đi šelberšipe.

⁵⁶ Thaj aćhili e Marija lasa trujal e trin masek, thaj irisajli ple khereste.

Bijandipe e Jovanesoro e Bolipesoro

⁵⁷ A e Jelisavetake avilo o vaxto te bijanel, thaj bijanda murše.

⁵⁸ Thaj šunde lake pašutne thaj njamoske kaj o Devljutno mothovđa baro kovlipe plo pe late thaj lošalisajle lasa.

⁵⁹ Thaj ano oftoto dive avile te sunetinen e ćhavore, thaj čhute e dadesoro anav – Zaharija.

⁶⁰ Thaj irisarindoj i daj lesiri phenđa: Na, aj te akharel pes Jovan.

⁶¹ Thaj phenđe lake: Khonik naj an familia tiri te akharel pes asavke anavesa.

⁶² Thaj semnenca phučle e dade lesere sar ka ma vov mangela te akharenle.

⁶³ Thaj rodindoj e phalori hramosarda vakerindoj: Jovan si lesoro anav. Thaj čudisajle sare.

⁶⁴ Thaj sigo pravdilo o muj lesoro thaj e čhib lesiri, thaj vakerela baxtarindoj e Devle.

⁶⁵ Thaj đerdinđa e dar ane sa pašutne lengere; thaj pe sa e plajinaki Judeja buljardilo pe sa akava kerdipe.

⁶⁶ Thaj savore save šunde čhute ano vilo plo vakerindoj: So li ka ovel akava čhavoro? Thaj o vast e Devlesoro sine lesa.

E Zaharijasiri himna thaj anglunovakeribe

⁶⁷ A o Zaharija o dad leskoro pherdilo pes Đi Sumnalo thaj anglamothovđa vakerindoj:

⁶⁸ Baxtardo o Devljutno Devel e Izrailesko so dikhljarda thaj inkalda ple selore.

⁶⁹ Thaj vazdla amenge o šing ikalipnasoro ano kher e Davidosko, ple kandinesoro,

⁷⁰ sar so phenđa mosa e sumnale profetongo lengo e šeleberšimastar.

⁷¹ Kaj amen ka mukljarel amare dušmanondar thaj andar o vasta sarijendar save amen dikhena bange;

⁷² Te kerelpe kovlipe amare dadenge, thaj te čhivel pes sama ple sumnale sovljake,

⁷³ sovljasa savasa xala sovli e Avraamoske amare dadeske, kaj amenge ka del:

⁷⁴ Inkalipe andar e vasta amare dušmanendar, kaj lese bi darako te kandas,

⁷⁵ ano sumnalipe thaj ano čačipe anglo leste ane sa dive amare đivdipase.

⁷⁶ Vi tu, ćhavoreja, ka akhares tut profeto e Devlikanesko; kaj ka đa anglal anglo muj e Devljutnesko te laćhares lesoro drom;

⁷⁷ Te de đandipe ikaldimasko lesere selorese vaš o jertipe lengere bezehendar,

⁷⁸ bašo vilalo kovlipe amare Devlestar, savesa amen dikhljarda o Istok učipestar;

⁷⁹ Te strefisarel odolen save bešena ano raćipe thaj učhaljin merimaski; te vortisarel amare pre po drom šandipesoro.

⁸⁰ A o čhavoro barjola thaj zurardola đesa thaj sine an drmina đi o dive đikaj ni mothovdilo e Izrailjiske.