E Titose 3 - Romski prevod Novog zaveta - Srbija

¹ Lipar lenge te oven telalćerdine thaj kandine e šerutnunenge thaj e thagarutnenge, gatime bašo sako laćho ćerdipe;

² Nikas te na akošen, te na keren čingara, te oven gudle, te mothoven laćhoođipe premalo sa o manuša.

³ Kaj thaj amen sinjamle nekana nahaljovne, bitelalćerdine, xoxavime, robindoj savetane manglipnase thaj čajljardipnase, nakhavindoj o dživdipe ano džungalipe thaj korikanipa, melale, mrzindoj jekh avre.

⁴ A kana mothovđa pe o laćhipe thaj manušesoćumudipe e Devle, amare Inkalutnesoro,

⁵ na bašo ćerdipna hakajutna save amen ćerđam, aj pe sako dindipe inkalda amen banjaja neve bijandipnaso thaj nevljardipnaja e Đesa Sumnalesa,

⁶ save ćhorda pe amende butune andar o Isus Hristo Inkalutno amaro,

⁷ te bi, čačavdine lesere dindipnaja, ovaja kustikutne e bimeripnasere dživdipnase sar so adžikeraja.

⁸ Čaćuno si akava lafi, thaj mangava odova te čačavdine, sar bi odola save paćaje e Devlese phurederina te anglalinen ane laćhe ćerdipna. Akava si e manušenge laćhe thaj therune.

⁹ A diline phućipendar thaj njamonendar thaj poloćipendar thaj ćingarendar e kanunestar durov tu; kaj si odova bitherduno thaj čućo.

¹⁰ Manuše jeretiko po angluno thaj dujtuno phurederipe durov tu,

¹¹ džanglindoj kaj asavko rumisajlo, thaj kerela bezeh; korkoro pes krisinđa.

Agoripasere bićhalutna thaj bićhaldo sastipe

¹² Kana ka bićhalav ke tute e Artemo ja e Tihiko, phurederin tut te ave ke mande ano Nikopolj, kaj čhinavđum kaj odothe te jevendinav.

¹³ O Kanunutno Zinoso thaj e Apoloso bućarnune gatisar, te na najstalipen ni ane soste.

¹⁴ Aj thaj amare nek sikljon te anglaninen ane laćhe ćerdipna kaj goda si trubune, te na oven bi bijanipnaso.

¹⁵ Bićhalen tuke sastipe sare save si mancar. Bićhalav sastipe sarijenđe save amen ćumudinen ano paćape. Dindipe sarijencar tumencar. Amin.