E Titose 2 - Romski prevod Novog zaveta - Srbija

Obligacie e jekhengere

¹ A tu vaker so miazinela pe sasto sikljovipe.

² E purane te oven haljovne, aćarune, džande, saste ano paćape, ano kamlipe, ano trpipe.

³ E puranja geja te ićeren pe sar miazinela e sumnalenge; te na mahrinen, kaj but te na robinen e moljaće, te sikljon e laćhipnase,

⁴ te haljovisaren e ternje romnjen: te kamen e romen, te kamen e čhavoren,

⁵ te oven vakerdime, khosle, ćherurotne, laćhe, kandine ple romenđe, te ne bi akušela pe ko lafi e Devlesoro.

⁶ Ađahar thaj e ternen phurederin te oven paćivale.

⁷ Ano sa mothov tut bašo dikhipe ane laćhe ćerdipna: ano sikljope sar valjani, paćivalipe, khoslipe,

⁸ lafi sasto, bidošakoro, te ladžardol o opipeutno ten a ovele niso džungale te phenel baše amende.

⁹ E robija te oven kandine ple devljutnenđe, te oven lenge laćhe ano sa, te na vakeren opipne,

¹⁰ te na ćoren, aj te mothoven pherdino paćape ano sa, te bi o džanipe amare Inkalutnesoro e Devlesoro laćharena ano sa.

¹¹ Kaj mothovdilo o dindipe e Devlesoro inkaldipe sa e manušenđe,

¹² savo amen sikavela te meka o bidevljutnipe thaj e phuvljakere zorale manglipastar, thaj te dživdina haljovine, čaćine thaj pherdine paćape ane akanutno šelberšipe,

¹³ adžikerindoj kovli adžikerutni thaj sikavdipe e glorijako e bare e Devlesere thaj e Inkalutne amare e Isus Hristo,

¹⁴ savo dinđa pes baše amende te bi amen ćinela kotar sako bikanunipe, thaj te khosel bašo peste seloro alosardo savo bućarela ane laćhe ćerdipna.

¹⁵ Akava vaker thaj phurederin thaj mahrin e pherde thagaripnaja; nikoj te na teljarel tut.