E Titose 1 - Romski prevod Novog zaveta - Srbija

Andripe

¹ O Pavle kandino e Devlesoro thaj apostoli e Isus Hristoso po paćape e Devlesere alosardengo thaj penđaripe e čaćipnaso pherdo paćapnasoro,

² bašo adžikeripe e bimeripnasere dživdipnase savo angle e biagorune vaktija dinđa o lafi o Devel savo na xoxavela,

³ a mothovđa ane čhinavdine vaktija o lafi plo mothovdipnaja, kova si maje dindino po čhinavdipe e Inkalutneso amare Devleso.

⁴ E Titose, čaćune ćhavese po khatano paćape: Bahtaripe, dindipe, šalom, kotar o Devel o Dad thaj o Devljutno Isuso Hristo, Inkalutno amaro.

Kotar o rašajipe

⁵ Odolese mukljum tut ko Krit te laćhare so si bilaćhardino, thaj te thanare pe sa foronende šerutnen, sar so tuke me ćhinavđum:

⁶ Te si ko bi manavako, jekhe romnjakoro rom, thaj isile čhavore paćavinde, savenđe na vakerena kaj si mukljardine ja nakandine.

⁷ Kaj o episkopo sar Devlesoro ćhervastarutno valjani te ovel bi manavako, na korkoro-khamuno, na baro xoljarno, na matoro, na mudarutno, na kamatari;

⁸ Aj ašuđarutno, laćhekamutno, gođaver, hakajuno, pherdo paćavino, inćardutno;

⁹ Savo zorale ićerela pe e čaćune lafeste aćhune pe odova sikavipe, kaj bi ovela kabuluno thaj te sikavela ano sasto džanipe thaj te ukorini odolen save opipena pe.

¹⁰ Kaj isi but nakandine, čućelafonengere thaj xoxamne, ulavdine save si andar o sunetime,

¹¹ savenđe valjani e muja te phandljon, save cela ćhera ruminena sikavindoj so na valjani, bašo napaćivalo therdipe.

¹² Phenđa nesavo kotar lendar, lengo korkoro profeto: Krićani, sajekh xoxamne, džungale divutna, xadžvale bibućarne.

¹³ Sadikhutno vakeribe si akava čaćuno.

¹⁴ Te na šunen e judejengere paramića, ni o čhinavdipa e manušengere save teljarena o čaćipe.

¹⁵ E khoslenge sa si khoslo, a e bikhoslenge thaj bipaćamnenge niso nane khoslo, aj si bikhoslo thaj lengiri godi thaj o gindipe.

¹⁶ Vakerena kaj džanen e Devle, a e ćerdipnaja lestar durarđona; kaj si melale thaj bikandine thaj bikaderime bašo ma save laćhe ćerdipna.