E Jevrejenge 9 - Romski prevod Novog zaveta - Srbija

O Hristos si angluno e bimerutne ikaldipnasoro

¹ Sinela, hemčaće, thaj e angluni skinija regule bašo devlesokandipe, a thaj e Sumnalipni e phuvljakiri.

² Kaj sinele laćhardo angluno kotor e skinijako, ano leste memeljari thaj astalja thaj thovdine mare, thaj odova vičini pe Sumnalipni.

³ A palo e aver perdava o kotor e skinijako, vičimo Sumnalipni upral e sumnalipna,

⁴ sava sinela sumnali kandinuli, thaj mohto ućhardo pe sa e riga sumnakajesa, ane savo sinele sumnakajuno ćaro e manaja, thaj luluđinali rovli e Aronovesi, thaj o ploče e Xapesovljakere,

⁵ a upral leste e heruvimija e glorijakere, save strefinena e užipasoro than; sostar akana na valjani te vakera sarigune.

⁶ A poso akava sinele ađahar laćhardino, đerdinena o rašaja sajekh ano angluno kotor e skinijako te ćeren o kandipe e Devlesoro;

⁷ A ano dujto jekhare ano berš semo anglunorašaj, na bi rateso, savo pašljarela baše peste thaj bašo seloresere bezehenđe andar o bidžanipe.

⁸ Akaleja o Đi Sumnalo sikavela kaj pana nane phravdo o drom ane Sumnalipni, džikaj god e angluni skinija terđola;

⁹ Savi si gindini tasvir bašo akanutno vakti, kana pašljarenape thaj o dindipa thaj o viktime save našti te laćharen o gindipe odolesoro savo kandela,

¹⁰ a ćhinadine si semo bašo xabe thaj pibe thaj savetane thovdipa thaj truposere ritualja dži o vakti e nevljardipnaso.

¹¹ Aj kana alo o Hristos, Anglunorašaj e avine laćharipnase, andar pobari thaj popherdini skinija, navastesaćerdini, odova na kotar akava ćerdipe,

¹² na rateja e buzneso ni e guruveso, aj ple rateja đerdinđa jekhare bašo sajekh ane Sumnalipni ćerindoj bimerutno inkaldipe.

¹³ Kaj te o rat e buznesongoro thaj e guruvengoro thaj o praho kotar e gurumnjori, savaja kana prskinen pe e bikhosle sumnarela len te oven trupune khosle,

¹⁴ kobor li maj ka o rat e Hristosoro, savo Đesa bimerutnesa pašljarela pes paćivalo e Devlese, ka khosel o gindipe tumaro kotar e mule ćerdipna, te bi kandena e dživde thaj čaćine Devlese.

¹⁵ Thaj odolese si Ov maškarutno e Neve Xapesovljakoro, kaj palo lesoro meripe bašo inkaldipe kotar o nakhlipe ane angluni xapesovli, o vičime lena o dindo lafi e bimerutne kustikutnipestar.

¹⁶ Ta kote si xapesovli musaj te ovel thaj o meripe e xapesovljakoro,

¹⁷ kaj si e xapesovli pherdomoldino tek palo meripe, poso nisar ni mol džikaj si o xapesovljakoro ano dživdipe.

¹⁸ Kaj ni o angluno xapesovljakoro na ćerdilo bi ratesoro.

¹⁹ Ađahar, kana o Mojsije mothovđa sa o čhinavdipa ple Kanunesere sa e selorese, tegani lelja o rat kotar e guruva thaj buznora, panjeja thaj lole pošomaja thaj isopoja, ta prskinđa thaj e pustik thaj sa e selore,

²⁰ vakerindoj: Akava si rat e xapesovljakoro savo tumenđe čhinavđa o Devel.

²¹ A ađahar thaj e skinija thaj sa e vasija devlesekandine prskinđa rateja.

²² Thaj pe akava Krisi sa khosela pe rateja thaj bizo ćhoripnasoro rat na ovela jertipe.

O Hristos si čaći viktima

²³ Valjanđa, akana, kaj e tasvira e badalese šejengo ađahar te khosen pe, a e korkore badalese šeja polaćhe viktimencar kotar akala.

²⁴ Kaj o Hristos na đerdinđa ane vastesaćerdi Sumnalipni, savi si anglalmisal e čaćipnase, aj ane semo Badali, kaj akana te sikavel pes anglal o muj e Devlesoro baše amende;

²⁵ Ni na đerdini but droma te pašljarel korkoro pes, sar so o anglunorašaj đerdini ane Sumnalipni sako berš avresere rateja;

²⁶ Averćhande bi Ov musaj but droma te mudarđol poćindoj kotar o ćerdipe e themeso; a akana po agoripe e šeleberšengoro, mothovela pes jekhare bašo sajekh kaj pla viktimasa ta te mudarel o bezeh.

²⁷ Thaj sar so e manušenđe anglalaćhola jekhdrom te meren, a pale odova o kris e Devlesoro,

²⁸ ađahar thaj o Hristos jekhdrom pašljarđa pes pe viktima te lel o bezeha butengere. A aver drom ka mothovđol na bašo bezeh aj bašo inkaldipe odolengoro save le adžikerena.