E Jevrejenge 7 - Romski prevod Novog zaveta - Srbija

O Hristos si anglunorašaj po rendo e Melhisedekosoro

¹ Kaj odova Melhisedek, thagar e Salimskoro, rašaj e Devlesoro e ućipeso, savo reslja e Avraame kana irinđa pe palo peradipe e thagarengoro, thaj baxtarda le;

² Kase o Avraam dinđa thaj dešipne kotar sa, ov si po manaipe ple anaveso majangle si thagar hakajipnaso, a napal si thaj thagar e Salimosko, odova va, thagar šalomnipaso,

³ bi dadeso bi dajako, bi njamosoro, ni lesere diven isilen širdipe ni lesoro dživdipe isile agoripe, a sar miazuno e Devlesere Ćhavese aćola rašaj bi ćhinadipnasoro.

⁴ No dikhen kobor si baro akava, kase si thaj korkoro patrijarho o Avraam dija dešipne kotar o alome ćedipe.

⁵ Thaj džikaj o ćhave e Levijevese lindoj o rašajipe isilen čhinavdipe te len po kanuni dešipne kotar o seloro, goda va kotar e phrala ple, iako thaj iklistile andar e kolin e Avraamosere,

⁶ dži odova akava savo nane kotar lengoro njamo, lija o dešipne kotar o Avraam, thaj les, savo sinele dindo lafi, baxtarđa,

⁷ a avral si sako poloćipe kaj o baro te baxtarel potikne.

⁸ Thaj ađahar akate o dešipna lena meripnasere manuša, a odori odova bašo savo mothovela pe kaj dživdini.

⁹ Thaj šaj bi te phenel pe, kaj o Levije savo lela dešipne, dinđa dešipne andar o Avraamo,

¹⁰ poso ov pana sinele ane kolina e dadese kana les reslja o Melhisedek.

¹¹ Te si, akana, o pherdipe sinele reslo andar e levijesoro rašajipe, kaj si o seloro lesa andino telal o Kanuni, sose sinele pana trubuno te vakerelpe kaj ka mothovđol o dujto Rašaj po čino e Melhisedekoso, a na po čino e Aronoso?

¹² Aj kana paruvinela pe o rašajipe, musaj te paruvinel pe thaj o Kanuno.

¹³ Kaj Odova bašo savese akava phenela pe andar aver si njamo, kotar savo nikoj na alo paše e viktimutnese.

¹⁴ Kaj si dikhinutne, kaj o Devljutno amaro inklilo andar o njamo e Judejeso, baše savese o Mojsije niso na phenđa kotar o rašajipe.

¹⁵ Thaj pana si podikhinutne, kana po miazipe e Melhisedekoso ikljola aver Rašaj,

¹⁶ savo na alo po kanuni e truposere čhinavdipnaso, aj pe zor e dživdipaso e namudaripaso.

¹⁷ Kaj o Lil mothovel: Tu sijan Rašaj sajekh po čino e Melhisedekosoro.

¹⁸ Čhinavel pes, akana, o anglaluno čhinavdipe bašo lakoro bizoralipe thaj natheripe –

¹⁹ Kaj o Kanuni niso na anda đi o pherdipe, a anela pe polaćhi adžukertuni andar savi avaja po paše e Devlese.

²⁰ Ane kobor na sinele bi xapesovljakoro,

²¹ kaj odola bi xapesovljako ule rašaja, a Akava e xapesovljaja Okolese savo lese vakerela: Xalja sovli o Devljutno thaj na ka perel pišmani: Tu sijan Rašaj sajekh po čino e Melhisedekosoro –

²² baše odova o Isus ulo garanto e polaćhe Xapesovljakoro.

²³ Thaj odola rašaja sinele but, kaj len o meripe aćhavela te aćhoven,

²⁴ a Akava, poso aćhela sajekh, isile binakhlino rašajipe.

²⁵ Odolese thaj šaj pherdine thaj bašo sajekh te inkalel odolen save andar leste avena e Devlese, poso sajekh dživdinela pa šaj te maškarinel bašo lende.

²⁶ Kaj asavko amenđe Anglunorašaj valjani: sumnalo, nadžungalo, khoslo, ulavdino kotar e bezehale thaj poućo kotar o badalija;

²⁷ Save nanele trubuipe, sar odola anglunerašaja, kaj sako dive te pašljarel viktime, majangle baše ple bezeha, a napal thaj bašo e selorengere, kaj Ov akava ćerđa jekhare bašo sajekh pašljarindoj korkoro pes.

²⁸ Kaj o Kanuni ćhivela bašo anglunerašajen manušen save isilen bizoralipe, a o lafi e xapesovljako palo Kanuni, ćhivela e Ćhave bimeripnasere pherdine.