E Jevrejenge 6 - Romski prevod Novog zaveta - Srbija

¹ Odolese, meklindoj e širdipikano džanipe kotar o Hristo, te siđara karing o pherdipe; thaj ma pale te ćhiva o temelji e jertipnaso kotar e mule ćerdipna, thaj paćape ano Devel,

² thaj džanipe kotar o bolipene, thaj kotar o pašljaripe e vastengoro, thaj kotar dživdinisaripe e mulengoro, thaj kotar o bimerutno kriso.

³ Thaj akava ka ćera, te o Devel meklja.

⁴ Kaj naj šajune odolen save si jekhare sumnalime, thaj haćarde o dindipe e badalesoro, thaj ule khatanićarja e Đeso Sumnalesoro,

⁵ thaj haćarde o laćho lafi e Devlesoro, thaj e zor e avine bimeripnasoro,

⁶ pa kana si peradvile, palem te iranen pe po jertipe, poso on ple rigatar palem kovinena thaj džungarena e Ćhave e Devlesere.

⁷ Kaj e phuv savi pijela o bršin so but puti pe late perela, thaj savi bijanela o ćarja therune odolenđe bašo save thaj ćerela pe, lela bahtaripe kotar o Devel;

⁸ A savi bijanela kanre thaj divo ćar, nane šukar thaj nane dur kotar o bibaxtalipe, thaj lakoro si agor: ane jag!

⁹ Aj so si tumencar phandine, ćumudninalen, aj kaj ađahar vakeraja, čačavdine sinjam kaj e buća terđovena pošukar thaj kaj legarena aso inkaldipe.

¹⁰ Kaj o Devel nane nahakajutno pa te bistrel o ćerdipna tumare thaj ćeripe e kamlipaso savo mothovđen bašo Anav lesoro, sevapeindoj thaj kandindoj e sumnalenge.

¹¹ A mangaja kaj sakoj kotar tumende te mothovela odova jekhuno grižipe bašo ćeripe e adžikerunakoro sa dži o agor.

¹² Te na oven bibućarne, aj te ićeren odolen save paćapnaja thaj trajipnaja kustikutnen o dinde lafija.

Zoralo dindo lafi e Devlesoro

¹³ Kaj kana o Devel dinđa o lafija e Avraamose, naneindoj ni ana kaste pobaro te xal sovel, xalja sovel korkoro peja,

¹⁴ vakerindoj: Hemčaće tut barvale ka baxtarav thaj pherdine ka butisarav.

¹⁵ Thaj ađahar o Avraam trpime adžikerindoj adžikerđa o dindo lafi.

¹⁶ Kaj o manuša xana sovel pobare pestar, thaj sakone lengere ćingaripnase agorisaripe si xape sovli sar mothovipe.

¹⁷ Odolese thaj o Devel, manglindoj kaj e kustikutnenđe e dinde lafija so majpaćavine mothovela o naparuvipe ple čhinavdipenako, te kandela pe xapesovljaja,

¹⁸ te bi ane duj zorale buća, ane save si našajune kaj o Devel te xoxavel, ovel amen zorale lafja amen save naštinjam te ićera men e adžikerutnate savi si anglal amende;

¹⁹ La isi amen sar krligo e ođeso, zoralo thaj paćavuno, savi đerdini andral palal e perdava,

²⁰ kaj sar anglasemno baše amende đerdini o Isus, ćerindoj Anglunorašaj bimerutno po čino e Melhisedekosoro.