E Jevrejenge 5 - Romski prevod Novog zaveta - Srbija

¹ Kaj sako anglunorašaj savo lela pe maškar o manuša, ćhivela pe bašo e manušenđe po kandipe e Devlese, te pašljarel o dindipa thaj o viktime bašo bezeha,

² savo šaj te haćarel odolencar save si ano biđanglipe thaj xoxavdipe; kaj si thaj korkoro telalćerdino e bizoralipnase,

³ thaj baše odova si kamuno, sar baš e selorese, ađahar thaj baše korkoro pese te pašljarel o viktime bašo bezeha.

⁴ Thaj nikoj korkoro pese na lela odova paćiv, aj vičimo kotar o Devel, sar thaj o Aron.

⁵ Ađahar thaj o Hristos na dinđa korkoro pese glorija te ovel anglunorašaj, aj Odova savo lese phenđa: O Ćhavo mlo sijan tu me tut avdive bijanđum.

⁶ Sar so thaj pe aver than phenela: Tu sijan Rašaj bimerutno po čino e Melhisedekosoro.

⁷ Ov ano dive ple phuvjakere dživdipnase zorale mangipnaja thaj asvencar pašjarđa e ruđutna thaj e ruđipa Odolese savo šajinđa kaj le te inkalel kotar o meripe, thaj sinele ašundo bašo kandipe ple pherde paćapnesoro.

⁸ Thaj ako sinele Ćhavo, prekal o mudaripe siklilo pe e kandipnase,

⁹ thaj mothovdindoj pe pherdutno, ulo sarijeđe save si lese kandine motivo e bimerutne inkaldipnasoro,

¹⁰ phendino kotar o Devel Anglunorašaj, po čino e Melhisedikosoro.

Ćhivipe sama e lipeutnenge e bićhalutnakere

¹¹ Kotar odova bi ovela amen te vakera but, aj phare si te haljovel pe, kaj tumen uljen nahajutne bašo ašundipe.

¹² Kaj tumen save bi palo berša valjani te oven sikamne, palem valjani te sikljoven e anglune fundone Devlesere lafenge; thaj asavke uljen kaj tumenđe valjani thud, a na zoralo xabe.

¹³ Kaj savo god parvarela pe thudeja, bisikavdo si ano džanipe e hakajutnipaso, kaj si čhavoro.

¹⁴ A o zoralo xabe si bašo e pherdine, kasere si ašunipa siklipnaja džanglino bašo ulavdipe thaj e laćhipnaso thaj e džungalipnaso.