E Jevrejenge 4 - Romski prevod Novog zaveta - Srbija

Šalom vaš o seloro e Devlesoro

¹ Daraja, akana, kaj nekoj tumendar, džikaj pana mol o dindo lafi bašo đerdipe ano pašlipe lesoro, na gndinela kaj si aćhilo palal.

² Kaj thaj amenđe si mothovdino o lošalo nevipe sar thaj odolenđe; aj lenđe na sine kotar o therdipe o lafi savo šunđe, poso odola save ašunđe na linele paćapnaja.

³ A amen save paćajam đerdinaja ano pašlipe, sar so phenđa: Odolese xalem sovli ane bari xoli mli kaj on na ka đerdinen ano pašlip mlo, premte e ćerdipna e Devlesere sinele agordinde kotar o ćerdipe e themesoro.

⁴ Kaj phenđa nekote bašo o eftato dive ađahar: Thaj beštino o Devel ano dive eftato kotar sa e ćerdipna ple.

⁵ A akate palem: Na ka đerdini ano pašlipe mlo.

⁶ Pa poso nesave isilen te đerdinen ane leste, a odola savenđe si majangle mothodo lošalo nevipe na đerdinde bašo nakandipe,

⁷ odova palem čhinada jekh đive, „Avdive”, vakerindoj prekal o David, palo edobor vakti, sar so phenđa: Avdive, te o krlo lesoro šunđen, ma te oven zoraleskorcune e vile tumare.

⁸ Kaj te len o Isus Navin legarela ano pašlipe, na bi pale odova vakerela pe kotar nesavo aver dive.

⁹ Karing odolese, e Devlesere selorese tek anglalavela o pašlipe.

¹⁰ Kaj ko đerdinđa ane leskoro bešlipe thaj korkoro pašlilo kotar ple ćerdipna, sar thaj o Devel kotar ple.

¹¹ Te phurederinape, akana, te đerdina ane odova pašlipe, te na bi ko perela po jekhuno misal e nakandipnasoro.

¹² Kaj si o lafi e Devlesoro dživdo thaj therdino, majostro kotar sako dujćhindino mačo, thaj rinelape sa dži o ulavdipe e ođeso thaj đeso, kunjakonengo thaj mezoso, thaj krisinela o irade thaj o gindipa e vilesere.

¹³ Than nane šeja garavdine anglal o leste, aj si sa užardino thaj phućardo anglal e jakha Odolesere kaste ka phućlija.

O Devel ćhuta e Hristo vaš e Anglunerašajese

¹⁴ Isindoj, akana, bare Anglunerašaje, savo nakhino o badalja, e Isuse Ćhave e Devlesoro, valjani te ićeramen zorale e paćavipnaso sav mothovaja.

¹⁵ Kaj naneamen anglunorašaj savo na bi šaj te mudarela pe amare bizoralipenđe, aj Anglunorašaj savo si ane sa zumavdo sar thah amen, aj bi bezehengo.

¹⁶ Odolese te ava paše tromaline e dindipne astalese, te la o dindipe thaj te arakha o baxtalipe bašo ažutipe ano trubuno vakti.