E Jevrejenge 3 - Romski prevod Novog zaveta - Srbija

O Hristos, majućuno kotar o Mojsije, rodela o paćape

¹ Odolese, phraljalen sumnalalen, khatanićara akharipase e badalesoro, penđaren e Bićhalutne thaj e Anglunerašaje amare paćapeso savo mothova, e Isus Hristo.

² Savo si paćavino Odolese savo les ćhuta, sar thaj o Mojsije ane sa lesere ćherese,

³ kaj akava paćavilo pobare glorijatar e Mojsijestar, sar so pobari paćiv kotar o ćher isile odova savo les ćerđa.

⁴ Kaj si sako ćher duvarime kotar neko, a odova savo sa ćerđa si o Devel.

⁵ O Mojsije eke sinele paćavino ane sa lesere ćherese sar kandino, bašo mothovdipe odoleso so sinele te phenel pe,

⁶ džikaj si o Hristos sar Ćhavo upral o ćher lesoro; a lesoro ćher sem amen, te zoralo paćape thaj adžikeripe savesa ašarape dži o agor zorardine ićeramen.

⁷ Odolese, sar phenela o Đi Sumnalo: Avdive, te o krlo lesoro šunena,

⁸ ma te oven bimekljutne vile tumare sar kradanatune čerćipaso ano dive e zumavipnaso ane drmina,

⁹ kote man zumavđe e dada tumare, phućena man a dikhle mle ćerdipna saranda berša.

¹⁰ Odolese xolajlem pe generacija odoja, thaj phenđum: sajekh phirena vileja, a korkore na penđarđe e droma mle;

¹¹ Odolese xaljem sovli ane bari xoli mli kaj na ka đerdinen ano pašlipe mlo.

¹² Arakhen, phraljalen, te na ovel ane džikaste kotar tumende džungalo vilo napaćaipnaso, crdindoj kotar o Devel e dživdipnasoro;

¹³ Aj zoraren jekh avre sako dive, džikote odova „avdije” trainel, kaj khajek tumendar na ovela zoralevileso xoxajipnaja e bezeheso.

¹⁴ Kaj uljam khatanićarja e Hristosere, semo te širdipeno paćape dži o agor zorale ićeraja.

¹⁵ Džikaj pana vakerela pe: Avdive, te o krlo lesoro šunena, ma te oven zoralne e vile tumare, sar kradanatune čerćipnaso.

¹⁶ A save si odola so šunđe thaj čerćile? Sar na sare save inklile andar o Egipat legamne e Mojsijesa?

¹⁷ A pe save Ov holjanđa saranda berša? Na li pe odola save ćerde doša, savengere kokala aćhile ane drmina?

¹⁸ Savenđe li xalja sovli kaj na ka đerdinen ano pašlipe lesoro, te na odolenđe save sinele nakandine?

¹⁹ Thaj dikha kaj naštine te đerdinen bašo napaćajipe.