E Jevrejenge 2 - Romski prevod Novog zaveta - Srbija

Baro ikaldipe

¹ Baše odova valjani but te arakha amen pe odova so šunđam, te na irinamen.

² Kaj te si o lafi phendino prekalo phakalo čačavdilo, thaj sako phagipe thaj nakandipe lelja theruni pedepsi,

³ sar amen ka našalala te na hajinđam bašo asavko baro inkaldipe, savo lelja te vakerel o Devljutno, a čačavde les maškar amende odola save šunde,

⁴ so thaj o Devel mothovđa semnencar thaj prašukaripencar, savetane zorale ćerdipnencar thaj dindipnaja o Đi Sumnalo pe plo kamipe.

⁵ Kaj o Devel na telalćerđa e phakalenđe odova them savo avela, kotar savo vakera.

⁶ Nesavo eke neso mothovđa vakerindoj: So si o manuš leste te detu gođi, ja ćhavo e manušesoro te dikhljare le?

⁷ Ćerđan le xarnevaktine pocikne kotar o phakalo, gloripnaja thaj paćipnaja laćhardan les khuvdinesa, thaj ćhutan le upral kle vastengere ćerdipna;

⁸ Sa teljarđan len telal o pre lesere. Thaj poso lese teljarđan sa, niso lese na mekljan biteljardino. Aj akana pana na dikhaja kaj lese si sa teljardino.

⁹ A xarnevaktine pocikne kotar o phakale dikhaja e Isuso, bašo mudaripe sa dži o meripe, laćhardo khuvdine gloripnaja thaj paćipnaja, te bi po dindipe e Devlesoro haćarela o meripe baše sarijende.

¹⁰ Kaj si laćhe e Devlese, bašo Savese si sa thaj andar Savo si sa, Savo anđa bute ćhaven ane glorija, kaj Čikatutne lengere inkalutne ćerela pherdino andar o mudaripe.

¹¹ Kaj thaj Odova savo sumnarela thaj odola save sumnarena pe sare si kotar jekh, odolese na ladžala len te vičini phraljalen, vakerindoj:

¹² Ka mothovav o Anav klo mle phraljenđe, maškar o ćedipe điljaja ka barjarav tut.

¹³ Thaj palem: Me ka dandov man ane Leste. Thaj palem: Eke me thaj e ćhavore saven mange dinđa o Devel.

¹⁴ A poso odola ćhavore isilen khatanipe ano rat thaj o mas, thaj Ov lelja majpašuno ćerdipe ane odova, kaj meripnaja te mudarel odole save isile zor meripnasoro, odova va e benge,

¹⁵ thaj te ikalel odolen save andar e dar kotar o meripe soro dživdipe sinele došale bašo plo robojipe.

¹⁶ Kaj, hemčaće na phandinilo e phakalenđe, aj phandinilo e Avramosere kućinake.

¹⁷ Baše odova valjanđa kaj ano sa te ovel miazuno e phraljenđe, te bi ovela dindino thaj paćavino anglunorašaj ane sevipni e Devlese, sar bi khosela o bezeha e selorese.

¹⁸ Kaj poso si thaj korkoro mudardilo avine zumavdo, odolese šaj te ažutinel odolenđe save ovena zumavde.