E Jevrejenge 13 - Romski prevod Novog zaveta - Srbija

Ulavdine ćhuvipe sama

¹ O Phraloćumudipe nek aćhovel.

² Laćho adžikeripe e gostonengoro ma bistren, kaj andar o laćho adžikeripe e gostonengoro nesave thaj na džanglindoj lelje e phakalen.

³ Den tumen godi e robonende sar kaj da olencar sinjen verigime, thaj odolende save dukhavde đungalipnaja, kaj sen thaj korkore ano trupo.

⁴ O romnipe nek ovel ano sa paćivalo thaj o pato e romnipeso khoslo; a e lubnunenge thaj e polubnunenge ka krisinela o Devel.

⁵ Ma oven but kamutne e lovenđe, oven čaljarde odoleja so isitumen, kaj si Ov phenđa: Na ka mekav tut ni kotar tute te cidape.

⁶ Ađahar kaj šaj zorale te vakera: O Devljutno si mlo ažutno, thaj na ka darav; so mange šaj te kerel o manuš?

⁷ Den tumen godi ke tumare šerutne, save tumenđe mothovđe o lafi e Devlesoro; dikhindoj po agoripe lengere dživdipaso, dikhen tumen po paćape lengoro.

⁸ O Isuso Hristo si jekhuno erati thaj avdive thaj ane bimeripa.

⁹ Ma den tumen te xoxavdon savetane thaj averengere sikavipnendar, kaj si laćhe te zorara o vilo dindipnaja a na xapencar, kotar save na sinelen theripe odola save ane lende čaljardile.

¹⁰ Amen isiamen viktimutno kotar savo nanolen hakaja te xan odola save kandena e skinijaće.

¹¹ Kaj e trupora odole dživdinutnengo, savengo rat bašo bezeha pašljarela o anglunorašaj ane sumnali, phabarena pe avrijal o than e bešipnaso.

¹² Odolese thaj o Isus, te bi sumnarela o seloro ple rateja, mudardilo avrijal o foro.

¹³ Akana, te ikljova ke Leste avrijal o than e bešipnaso, o prasape lesoro inđarindoj.

¹⁴ Kaj akate nane amen sajekhtuno foro, kaj rodaja odova savo ka avel.

¹⁵ Andar Leste, akana, bićhinadine te pašljara e Devlese e viktima e ašaripnasi, odova va, bijanutno e voštengo save vakerena o Anav lesoro.

¹⁶ A o laćhokeripe thaj o khatanipe ma bistren; kaj asavke viktimencar ćerela pe po kamipe e Devlese.

¹⁷ Kanden e šerutnen tumaren thaj teljarđon lenge, kaj on si džangade upral e đe tumare, poso ka phućljon baše lende, te bi odova lošalipnaja ćerena a na honđipnaja, kaj tumenđe akava na bi ovela kotar o theripe.

¹⁸ Ruđinen tumen e Devlese baše amenđe. Kaj sam paćavine kaj isiamen laćho gindipe, manglindoj kaj ane sa laćhe te arakhadija.

¹⁹ A ruđinava te ćeren akava pana pobut, te bi tumenđe so poangle irinipe.

Ruđipe

²⁰ A o Devel e šalomnipaso, savo vazdela andar e mule e bare Čobano e bakrengoro, rateja o bimerutno Xapesovljakoro, amaro Devljutno o Isuso Hristo,

²¹ nek tumen pherela ane sako laćho ćerdipe, te agorinen o kamipe lesoro, ćerindoj ane tumende odova so si lese polaćhe, andar o Isuso Hristo, savese glorija ane bimeripasoro bimeripe. Amin.

Agoripasiri bićhaldi, bićhaldo sastipe thaj bahtardipe

²² Ruđinav tumen eke, phraljalen, len akava lafi zoralipnaso, kaj tumenđe xarne thaj hramonđum.

²³ Te džanen kaj o phral amaro o Timotej si muklino, savesa tumen, sigate te avilo, ka dikhav.

²⁴ Bićhalen sastipe sa e šerutnenđe tumarenđe thaj sa e sumnalenđe. Bićhalen tumenđe sastipe e phralja andar e Italija.

²⁵ Dindipe sarijencar tumencar. Amin.