E Jevrejenge 12 - Romski prevod Novog zaveta - Srbija

E Hristosoro misal. Devlikano mahripe

¹ Odolese thaj amen, isindoj trujal amende edobor nuvera e jaćhencadikhutne, frdaja sako ladavipe thaj bezeh savo amen lokhe durjarela, thaj trpipnaja te siđara ano baro kotor savo amenge anglalterđola,

² dikhindoj po Isuso, Čekatutne thaj Pherdutne e paćapeso, savo po than e anglalavine lese lošalipnasoro angladukhavđa o trušul, na hajindoj bašo lađavipe, thaj bešlo pe daxni rig e Sumnale Devlesere bešalutnake.

³ Gndinen, akana, pe Leste, savo kotar e bezahutne inđarda asavko opipe turlus peste, te na malaksinen thaj te na xasaren e ođe tumare.

⁴ Pana na opipeisajlen dži o rat marindoj turlus e bezehengo,

⁵ thaj bisterđen o phurederipe savo tumenđe vakerela sar e ćhavenge: Ćhaveja mleja, ma mek o dinipe e vika e Devljutnesiri, ni ma te pere kana ov tuće dela vika.

⁶ Kaj kas ćumidela o Devljutno odolese thaj dela vika; thaj marela sakone ćhave save lela.

⁷ Ako legarena o dinipe e vikako, o Devel ćerela tumencar sar e ćhavencar. Kaj savo si odova ćhavo pe savo o dad na dela vika?

⁸ Te li sijen bi dinipe e vikako, save si sare zumavde, tegani sijen kopilja a na ćhave.

⁹ Poangle, kana amen amare truposere dada dinde vika, amen olen kandljam. Sar na ka pobut kandaja e Dadesere đengonenge thaj te dživdina?

¹⁰ Kaj on amenđe dije vika bašo hari dive premalo plo haljovipe, a Ov po theripe amaro, te ova khatanićarja lesere sumnalipnaso.

¹¹ Kaj sako dinipe vika, džikaj trajinela, na ćerela pes kaj si lošalipe, ja dukhavdipe, aj napal dela šalomno bijanutno e hakajipnaso odolenge save si andar leste sikavdine.

¹² Odolese laćharen e peravde vasta thaj e bizorale koča,

¹³ thaj ortonen e dromora baše tumare pre, kaj odova so si langalo na džungarela pe, aj opipune, te sastarel pe.

Rodelape paćape ane Devlesoro dindipe thaj dindo lafi

¹⁴ Phurederinen te ovel tumen šalom sarijencar thaj sumnalipe, bi saveso nikoj na ka dikhel e Devljutne;

¹⁵ Arakhavindoj kaj ko te na aćhola bi o dindipe e Devlesoro; te na bi nesavi darhin ćerkipnasi barjola thaj kerela bigloripe, thaj odoleja buten ćerkninena;

¹⁶ Kaj ko te na ovel lubno ja poganime, sar o Isav, savo bašo jekhe xapese bićinda plo anglunobijandipe.

¹⁷ Kaj džanena kaj si ov thaj popalal, kana manglja te kustikutnel o baxtaripe, frdimo sinele, kaj na arakhlja o jertipe, vi te les asvencar rodinđa.

¹⁸ Kaj na aljen paše e plainaće e azbavinake, thaj e jagake e rapedunake, thaj e raćipnase thaj e tunjarikose thaj e bare balvaljake,

¹⁹ thaj e trubakere zvukose, thaj e krlesere lafonenge, baše savo on so les ašunđe ruđinena kaj lenge maj te na vakerela pe;

²⁰ Kaj naštine te legaren o čhinavdipe: Ako thaj o divo džuvdinutno azbavinela pe odola plainate, ka ovel barencar frdimi.

²¹ A o dikhipe adahar daramno sinele, kaj o Mojsej phenđa: Daravdino sem thaj izdarav,

²² aj aljen paše e Sionakere Plainake thaj e Forose e dživde Devleserese, e Jerusalimese e badalutnese, thaj mirijade phakalenge,

²³ festuine ćidipnase thaj e Khanđirjakere anglunebijandenđe, hramondine ko badali, thaj e Devlese e Krisarese sarijengerende, thaj e đenđe pherdine hakajutnenđe,

²⁴ thaj e Isusese, Maškarutnese e Neve Xapesovljakoro, thaj rateso e khosipnaso, savi polaćhe vakerela aj e Aveljevesiri.

²⁵ Dikhen te na frden Odole savo vakerela.

²⁶ Kasoro krlo tegani izdrarda e phuv, a akana dela o lafi vakerindoj: Pana jekhare me ka izdrarav na semo e phuv aj thaj o badali.

²⁷ A akava „pana jekhare” mothovela paruvipe odolesoro so čhinavela pe, sar ćerdino, te bi aćhola odova so na čhinavela pe.

²⁸ Odolese, lindoj o Thagaripe o zorardino, te ovel amen dindipe thaj lesa te kanda laćhe e Devlese e paćivalipnaja thaj e daraja.

²⁹ Kaj o Devel amaro si jag savo phabarela.