E Jevrejenge 11 - Romski prevod Novog zaveta - Srbija

Sadikhutne e kotorćeripnasere paćapese

¹ A o paćape si fundo kotar o sa so adžikeraja, čačavdipe e šejengo e nadikhlengoro.

² Kaj ane late o purane lelje laćho mothovdipe.

³ Paćapesa džanaja kaj o thema si ćerdine e Devlesere lafeja, ađahar kaj o dikhitutno ulo andar o bidikhutno.

⁴ Paćapesa pašljarđa o Avelj e Devlese polaćhi viktima e Kainostar; lasa sinele mothovdino kaj si hakajutno, kana korkoro o Devel lelja e dindinipa lesere; andar late vov thaj palo meripe pana vakerela.

⁵ Paćapesa o Enoh sinele vazdino te na dikhel o meripe; thaj maj na arakhavdilo, kaj le o Devel lelja, poso angleder e lesoro vazdipe sinele lese čačavdino kaj kamipninđa e Devlese.

⁶ A bi e paćapeso nane šajune te kamnisare e Devlese; kaj odova savo avela paše e Devlese, valjani te paćal kaj o Devel si thaj kaj Ov padakhutnini odolen save les rodena.

⁷ Paćapesa o Noj sinele kotar o Devel džangljardino kotar odova so pana na dikhela pe, thaj andar e devljutnesi dar ćerđa moxto bašo inkaldipe ple ćheresoro; odolesa ov krisinđa sa o them, thaj ulo kustikutno e hakajipnasoro po paćape.

⁸ Paćapesa o Avraam kandlja kana sinele vičimo te đal ane phuv savi sinele te lel ano kustikutnipe, thaj đelo na džanglindoj kaj džala.

⁹ Paćapesa thanardilo ov ane phuv e dinde lafeso sar ane averesi, thaj ane šatora bešena e Isakoja thaj e Jakoveja, kupakustikutnenca e jekhune dindine lafesoro.

¹⁰ Kaj adžićerđe o Foro savo isile temelja, savese si vazdino thaj ćerutno o Devel.

¹¹ Paćapesa thaj korkori Sara lelja e zor te khamninel, thaj inatese e phuripne xorjaće oj bijanđa; kaj paćaja Odolese savo odova dinđa o lafi.

¹² Odolese thaj bijandile nevebijande kotar jekh, thaj odova e butpurane manušestar, butipnaja sar čerenja e badalesere thaj sar pošik biđindi ki phuv e deravesiri.

¹³ Ano paćape mule sare akala na adžikerindoj o pherdipe e dinde lafesoro, aj len dikhle andaroduripe, thaj bićhalđe sastipe, thaj aćhile pe odova kaj si rigune thaj nakahljutne ki phuv.

¹⁴ Kaj odola save ađahar vakerena mothovena kaj rodena e Kherutni.

¹⁵ Thaj kaj gindinđe pe odoja andar savi iklile, ka ma ovel len vakti te irinen pe;

¹⁶ Aj akana mangena polaćhi, odova va e badalesiri.

¹⁷ Paćapesa pašljarđa o Avraam e Isako kana si zumavdo, thaj e jekhore pašljarđa odova savo lelja o dindo lafi,

¹⁸ savese sinele phendino: Ano Isako tuće ka vičinel pe e kućin,

¹⁹ kaj haljovinđa kaj si o Devel kadari thaj andar e mule te dživdinisarel; odolese les thaj lelja sar gindini tasvir.

²⁰ Paćapesa ane odova so ka avel baxtarđa o Isak e Jakove thaj e Isavo.

²¹ Paćapesa o Jakov merindoj baxtarđa sakone ćhave e Josifesere, thaj teljarđa pes prekal o ućipe ple rovljakoro.

²² Paćapesa o Josif ko meripe liparela kotar o iklipe e Izrailjesere ćhavengo, thaj čhinavđa baše e kokala ple.

²³ Paćapesa e Mojseje, poso bijandilo, garavđe le trin ćhon e bijande lesere, kaj dikhle kaj si o čhavoro prašukar, thaj na darandile e thagaresere čhinadipastar.

²⁴ Paćapesa o Mojsej, kana barilo, ćhudinđa kaj te vičinel pe ćhavo e Faraonosere ćhijako;

²⁵ Thaj pobut kamela te mudarđol e Devlesere seloreja aj te ovel le xarnevaktino gudljaripe e bezehesoro,

²⁶ dikhinindoj ane savo pelo bašo Hristo sar pobaro barvalipe kotar egipatesoro barvalipe, kaj dikhela pe ki padakhutni.

²⁷ Paćapesa ov meklja o Egipat, na darandoj e bare thagaresere xoljinatar, kaj zorale ićerdape e Nadikhljutnestar, sar kaj dikhela le.

²⁸ Paćapesa ćerđa e pasha thaj prskipe e rateja, kaj odova savo mudarđa e anglunebijanden te na azbavinela len.

²⁹ Paćapesa nakhle o Lolo derav sar ko šućipe; a kana odova manglinde o Egipćanja, taslile pe.

³⁰ Paćapesa pele o duvarja e jerihonesere, kana trujal lende phiravdilo efta dive.

³¹ Paćapesa e Rava lubnini na mudardili e bipaćamnencar, kaj lelja e phukavnen šalomesa.

³² Thaj so pana te phenav? Kaj mange na bi avelaman vakti kana bi terđovava te mothovav kotar o Gedeono, Varako, Samsono, Jeftaj, David, Samuilo thaj kotar o aver profetija,

³³ save paćapesa peravđe o thagaripna, ćerđe hakajipe, lelje o dinde lafija, phandle o muja e lavonengere,

³⁴ aćhavđe e zor e jagakiri, našle kotar ostruni e mačosi, kotar o bizorale ule zorale, sinele zorale ano maripe, peravđe e averengeren askeren;

³⁵ Nesave romnja lelje ple mulen dživdisaripnaja; a e aver eke sinele munkencar mudarde na manglindoj ko muklipe, te bi lena polaćho dživdinosaripe;

³⁶ A e avera zumavde o prasape thaj o šibipa, ta pana o verige thaj o phandlipa;

³⁷ Barencar mudarde, anglaxarndine, munčime, kotar o mačo mule; phirdinđe ane gunje e morćhakere thaj e buznjengere morćhake ano ćororipe, ane bilaćhipa, ane dukhavipa;

³⁸ Odola savendar o them na sinele dićhutno, phirdinđe pe dermine thaj pe plaine thaj pe barengere xoripa thaj pe xara e phuvljengere.

³⁹ Thaj sare akala, mothovdine ano paćape, na lelje o dindo lafi;

⁴⁰ Odolese so o Devel neso polaćhe anglaldikhlja baše amende, te na bi on bi amaro resena o pherdinipe.