E Jevrejenge 10 - Romski prevod Novog zaveta - Srbija

¹ Kaj o Kanuni isipeindoj semo ućhalin e avine laćhipengo, a na semo o muj e šejengo, našti nisar jekhe thaj jekhune viktimencar, save pašljarena pes sajekh sako berš, te pheren odolen save avena anglal.

² Averćhande, sar odola ne bi aćhavena pe te pašljaren pes, poso odola save kandena ne bi maj haćarena pe bezehale, avine jekhare bašo sajekh khoslime?

³ Maškarodova, odola viktime sako berš dengođate ko bezeha.

⁴ Kaj nane šajune kaj o rat e guruvengoro thaj buznengoro thovela o bezeha.

⁵ Odolese dindoj ano them vakerela: E viktima thaj o dindipe na mangljan, aj mange o si trupo gatinđan.

⁶ E saphabarutna thaj o viktime bašo bezeha na sinele tuće laćhe;

⁷ Tegani phenđum: Ake aljum, sar so si ano širdipe e Pustikako hramome baše mange, te ćerav o kamipe klo, Devla.

⁸ Vakerindoj angleder, kaj e viktima thaj o dindipa thaj e saphabarutna thaj e viktime bašo bezeha na mangljan ni na sinele tuće laćhe, odola save si po kanuni pašljarđona;

⁹ Pale odova phenđa: Ake džava te ćerav o kamipe klo, Devla. Ćhinaj o angluno te ćhivel o dujto.

¹⁰ Odole kamipnaja sem sumnarine pašljarindoj o trupo e Isus Hristosoro jekhare bašo sajekh.

¹¹ Thaj sako rašaj terđola sakodive kandindoj thaj but droma pašljarindoj jekhune viktime save nisar našti te xasaren o bezeha;

¹² A Ov, pašljarindoj jekhe viktima bašo bezeha, bimeripnaste bešlo pe daxni rig e Devlesiri,

¹³ adžikerindoj poangle džikaj na pašljarđona o dušmanja lesere bašo telalalipe lesere prenđe.

¹⁴ Kaj Ov jekhe dindipnaja ćerđa pherdine sa e vaktenđe odolen save sumnarena pe.

¹⁵ A mothovela amenđe thaj o Đi Sumnalo; kaj poso anglal vaćerđa:

¹⁶ Akava si Xapesovli savo lenđe ka mekav amaneti pale odola dive, vakerela o Devljutno, dindoj mle kanunija ane vile lengere, thaj ane gndipa lengere ka hramonav len, phenela:

¹⁷ Thaj e bezeha lengere thaj e bikanunija lengere eke na ka vakerav.

¹⁸ A kote si jertipe e bezehenđe, odothe nane više dindinipe bašo lenge.

Zorardipe ko trajipe ano paćape

¹⁹ Sipeindoj akana, phraljalen, o muklipe bašo đerdipe ane Sumnalipni e Isusesere rateja,

²⁰ dromeja neveja thaj dživdineja, savo amenđe Ov phravđa e perdavaja, odova va ple trupoja,

²¹ thaj bare Rašajesa upral o ćher e Devlesoro,

²² te ava paše e čaćine vileja, ano pherdo paćape, vilencar khosle kotar o džungalo gođipe thaj trupoja thovdino khosle panjeja,

²³ te ićeramen zorale ano mothovdipe e adžikertunako bi dujegođencar, kaj si paćavuno Odova savo dinđa o lafi;

²⁴ Thaj te phurederinape jekh e avrestar ano ćeripe ko kamlipe thaj laćhe ćerdipna.

²⁵ Ma te aćhova palal kotar e ćidipa amare, sar so nesaven isilen adeti, aj jek avre te zorarja, thaj baše odova pobut kobor dikhena kaj paše avela o Dive odova.

²⁶ Kaj ako amen ćeraja bezeha iradine thaj palo lindoj pendaripnasoro čaćipe, odothe maj nane viktime bašo bezeha,

²⁷ aj semo daravutno adžikeripe e kriseso thaj bari xoli e jagaki savi ka nakhavel ano muj e opipeutnen.

²⁸ Kana nekoj ritinela o Kanuni e Mojsejesoro, po mothovdipe duje ja trine jaćhencar dikhutnengo, isi te merel bi dindipnasoro;

²⁹ Gndinen kobor ka akana phari globa ka lel odova savo uštavel e Ćhave e Devlesere, thaj o rat e Xapesovljako savaja si sumnardo bašo nasumnali te ićerel, thaj e Đe dindipaso dukhavela?

³⁰ Kaj džana Odole savo phenđa: Mlo si iripe, me ka irinav, vakerela o Devljutno. Thaj palem: o Devljutno ka krisinel ple selorese.

³¹ Baro si daravipe te pere ane vasta e dživde Devlese.

³² A dena tumen godi e anglune divenge, ane save, tek strefisime, legarđen bute bare mudaripa,

³³ mothovdine, pe jekh rig, mahripnase thaj džungalipnase, a pe aver rig, ulindoj kupamudarutne odolenge kola odova jekhune džidživdinena.

³⁴ Kaj vi e verigenđe mlenge haćarena, thaj lošalipnaja legarena o linipe tumare barvalipnasoro, džanglindoj kaj tumen isitumen polaćho thaj binakhlino barvalipe ko badalija.

³⁵ Ma xasaren, akana, o paćape tumaro, savo anela bari padakhutni.

³⁶ Kaj tumenđe si o trpipe trubuno, kaj poso agorinena o kamipe e Devlesoro lena odova so si dindino lafi.

³⁷ Kaj pana hari, but hari, pa ka avel Odova savo valjani te avel thaj na ka aćhol palal.

³⁸ A o hakajutno kotar o paćape ka dživdinel; te li cidinđa pe, na ka avel po kamipe mle ođese.

³⁹ Amen, maškarodova, na sijam kotar odola save cidinena pe po peripe, aj kotar odola save paćana o inkaldipe e đesoro.