E Jevrejenge 1 - Romski prevod Novog zaveta - Srbija

Tema e bićhalutnakiri

¹ O Devel savo andar o dumutanipe but droma thaj savetane ćhandenca vakerđa e dadenđe prekalo Profeto,

² ane akala palune dive vakerđa amenđe prekal o Ćhavo, save ćhuta kustikutnesa kotar sa, andar savo si thaj o šeleberšipa ćerđa;

³ Ov savo si strefipe e glorijako thaj dićhipe Lesere ćeripnaso thaj kova ićerela sa e zorale lafeja pleja, poso korkoro agorinđa o khoslipe amare bezehengo, bešlo pe daxni rig e Barikanipnaso ko ućipe,

⁴ thaj edobor mothovdilo pobaro kotar e phakale kobor si glorisime Anav kustikinđa feri von.

O Hristos si majućuno kotar o phakale

⁵ Kaj kase kotar o phakale ikana phenđa: Ćhavo mlo sijan Tu, me tut avdive bijanđum? Thaj palem: Me lese ka ovav o Dad, a ov maje o Ćhavo.

⁶ Thaj palem, kana anglinđa Anglunebijande ane vasiona, vakerela: Thaj nek lese teljardona sa o phakale e Devlesere.

⁷ A bašo phakale vakerela: Savo ćerela ple phakalen đenca thaj ple kandinen rapesere jagako.

⁸ Bašo Ćhavo eke: E sumnalesri bešalutni si kli, Devla, aso bimeripasoro bimeripe; e rovli e hakajipasiri si rovli kle Thagaripasoro.

⁹ Kamljinđan o hakajipe thaj ritonđan o bikanunipe; bašo odova maznonđum tut, Devla, o Devel klo lošalipne uljesa pobut aj kle amalen.

¹⁰ Thaj palem: Tu, Devljutneja, ano širdipe fundonđan e phuv, thaj o badalija si ćerdipna kotar kle vasta;

¹¹ On ka nakhen, a tu aćhoveja, thaj sa ka puranđol sar o šeja,

¹² thaj ka banđare len sar o fostani, thaj ka parunen pes, a tu san sajekh jekhuno, thaj o berša kle na ka nakhen.

¹³ A kase kotar o phakale ikana phenđa: Beš mange kotar e daxni rig džikote na pašljarav e dušmanjen klen bašo telunipe kle prenđe?

¹⁴ Naj li sa odola đe bašo kandipe, save bićhalena pe te kanden odolenđe save ka kustikutnen o inkaldipe?