E Jakovesiri 5 - Romski prevod Novog zaveta - Srbija

Ćhivipe sama e barvalenge

¹ Phiren akana barvalalen, roven thaj dobođinen bašo belave tumare save avena.

² O barvalipe tumaro ćirnilo, a e šeja tumare xaljelen e cikne paparugora;

³ O sumnakaj tumaro thaj o rup ruđininđa, thaj o ruđinipe lengoro ka ovel mothovdipe opipe tumende, thaj ka xal e trupora tumare, sar jag. Gramadinđen o barvalipe ane palune dive.

⁴ Dikh, o krle e poćindi bućarnengi save ćhinde e aindža tumare, save lenđe ćhinavden; thaj e krle e ćhinutnenđe ale dži o kana e Devljutnese e Savaotese.

⁵ Gudljarđen tumen ki phuv, thaj dživdinđen čhordarine; parvarden e vile tumare, sar ko dive e ćhinipnasoro.

⁶ Krisinđen, mudarđen e hakajutne, thaj ov tumenđe na opipeisajlo pe.

Zorardipe thaj averćhane phurederipa

⁷ Trpinen, akana, phraljalen mle, dži o avipe e Devljutnesoro. Dikh, e phuvljako bućarno adžikerela o kamlomoldino bijando e phuvljakoro, ažućarine les ažućarindoj džikaj na lela o bršin o detharino thaj palalaćhino.

⁸ Oven, akana, thaj tumen ažućarutne, zoraren e vile tumare, kaj o avipe e Devljutnesoro paše alo.

⁹ Ma dobođinen jekh pe avreste, phraljalen, te na oven krisime: dikh, o Krisari terđola anglal o udara.

¹⁰ Bašo paćivalipe e mudaripnaso thaj lunđetrpipnaso, phraljalen mle, len e profetonen save vakerena ano anav e Devljutnesoro.

¹¹ Eke, amen vičinaja pokovljardime odolen save anglatrpinđe.

¹² A angle sa, mle phraljalen, ma xan sovel ni badaleja ni phuvljaja, ni avera nesava xapesovljaja; nek tumaro va ovela va, a na, na; te na peren telal o krisipe.

¹³ Đungarelape li ko maškar tumende? Nek ruđinel pe e Devlese. Te si ko lošalo? Nek đilabel e Devlese.

¹⁴ Nasvalo li si ko maškar tumende? Nek vičinel e prezbiteren e khanđirjakere, thaj nek ruđinena pe upral leste, makhlindoj les uljesa ano anav e Devljutnesoro.

¹⁵ Thaj e ruđutni e paćapesi ka inkalel e nasvale, thaj ka vazdel le o Devljutno; thaj te bezeha ćerda, ka jertinen pe lese.

¹⁶ Mothoven eke jekh e avrenđe e bezeha, thaj ruđinen tumen e Devlese jekh bašo e averenđe, te sasljon. But si zorali e putardi ruđutni e hakajutnesiri.

¹⁷ O Ilija sinele manuš jekhuno sar thaj amen, thaj ruđutnaja ruđisajlo e Devlese te na ovel bršin, thaj na čalavđa o bršin ki phuv bašo trin berš thaj šov ćhon.

¹⁸ Thaj palem ruđinđa pe, thaj o badali dinđa o bršin, thaj e phuv ikalđa plo bijando.

¹⁹ Phraljalen, ako ko tumendar našalđola kotar o drom e čaćipnaso, ta les nekoj iranela,

²⁰ nek džanel kaj odova savo iranela e bezehutne kotar o drom lesere xoxamneso, ka inkalel o ođi kotar o meripe, thaj ka ućharel bute bezeha.