E Jakovesiri 3 - Romski prevod Novog zaveta - Srbija

Kotar o inćerdipe e ćhibijako

¹ Phraljalen mle, ma oven bute sikamne, džanglindoj kaj ka amen pobut ka ova krisime,

² kaj sare but keraja bezeh. Ako nekoj ane lafija na kerela bezeh odova si pherdino manuš, zoralo si te ićerel thaj sa o trupo.

³ Dikh, e grastenđe ćhivaja e uzde ano muj kaj amenđe te kanden, thaj sa o trupo lengoro boldaja.

⁴ Eke thaj o barke, vi te si bare thaj e zorale len balvalja prastavena, boldena pe tikne kormiloja odori kuri mangela odova savo vastarela.

⁵ Ađahar si thaj e ćhib tikno kotor, a ašarinela pe kaj si bari. Dikh, tiknori jag, sar bare šeja phabarđa!

⁶ Thaj e ćhib si jag, them bihakajipnaso. Ađahar vi e ćhib arakhela pe maškar amare kotora, meljarindoj sa o trupo, thaj phabarindoj o phiripe amare dživdipnaso, thaj phabarindoj kotar o pakao.

⁷ Kaj sako njamo e divo dživdinutnengo thaj e čiriklengo, thaj reptilengo thaj maćhengo, kovljardola pe thaj kovljardilo e njamose e manušeserese,

⁸ a e ćhib nikoj kotar e manuša našti te kovljarel; odova našandino džungalipe, pherdo drab e meripnasoro.

⁹ Lasa baxtaraja e Devle thaj e Dade, thaj lasa arman daja e manušen ćerdine pe forma e Devlesiri.

¹⁰ Andar e jekhune muja ikljola o baxtaripe thaj arman. Nane laćhe, phraljalen mle, kaj akava ađahar šaj te ovel.

¹¹ Sar šaj andar e jekhuni xajing te đal gudlo thaj ćerko?

¹² Šaj li, phraljalen mle, e sumućin masline te bijanel ja e moljakere drakhalina e sumućina? Ađahar nijekh xajing na dela londo thaj gudlo pani.

Kotar o čaćo džanipe thaj ođi akale themesoro

¹³ Ko si maškar tumende barođando thaj haljovino? Nek mothovela kotar o laćho arakhavdipe ple ćerdipna ano barođando kovlipe.

¹⁴ Te li isitumen ćerko korikanipe thaj ćingaripe ane vile tumare, ma ašarinen tumen thaj ma xoxaven opipe e čaćipnasoro.

¹⁵ Akava nane odova barodžanipe so huljela upral aj phuvljakoro, ašunipnasi, džungale đengiri.

¹⁶ Kaj kote si o korikanipe thaj o ćingara, odothe si o bijekhipe thaj sako džungalo šej.

¹⁷ A o barodžanipe savo si upral, anglune si khoslo, napal glorimo, kovlo, kandino, pherdo dindipe thaj laćhe bijanipa, hakajutno, thaj nadujmujengoro.

¹⁸ A bijanutno e hakajipnaso ane glorija sijinela pe odolenge save glorija ćerena.