E Jakovesiri 1 - Romski prevod Novog zaveta - Srbija

Andripe

¹ O Jakov, kandino e Devleso thaj e Devljutneso e Isuso Hristoso, bićhalela sastipe e dešuduje njamonenđe ćhordarde po them.

Kotar o zumavdipa

² Sako lošalipe te ovel tumen, mle phraljalen, kana perena ane savetane zumavdipa,

³ džanglindoj kaj zumavdipe tumare paćapeso ćerela trpipe;

⁴ A trpipe nek laćharel o ćerdipe, te oven idealine thaj pherdine bi nisavo najstalipe.

⁵ Ako li kase kotar tumende falinela bidžandipe, nek rodel kotar o Devel savo sarijenđe dela jekhenutne thaj bi ćingarako, thaj ka del pe lese.

⁶ Aj nek rodena paćapesa, na sungavindoj niso; kaj savo sungal ov si sar deravesko talasi so les e balval vazdela thaj boldela.

⁷ Kaj asavko manuš ma te gindini kaj ka lel so kotar o Devel.

⁸ Dujeđengo manuš, najstalo si ane sa droma ple.

⁹ A o teljardino phral nek ašarinel pe ple ućipesa;

¹⁰ A o barvalo ple teljardipnaja, kaj ka nakhel sar e luludi e ćarjakiri.

¹¹ Kaj tatarđa o kham žegaja, thaj šućarđa e ćar, thaj e luluđin lakiri peli, thaj o prašukaripe e mujeso lakoro prepelo; ađahar ka vi o barvalo pe droma ple ka šućarel.

¹² Baxtardino si o manuš savo inđarela o zumavdipe, kaj kana ka ovel zumavdo ka lel o khuvdino e dživdipaso, savo o Devljutno dinđa o lafi odolenđe save les ćumudinena.

¹³ Nijekh kana si zumavdo te na vakerel: o Devel man zumavela; kaj o Devel si nalino bašo zumavipe e džungalipnaja, thaj Ov na zumavela nikas,

¹⁴ aj sakone zumavela e korkoruni mangli, savi les akharela thaj xoxavela.

¹⁵ Tegani e mangli kamindoj bijanela o bezeh, a o bezeh ćerdo bijanela meripe.

¹⁶ Ma xoxavdon, o mle kamle phraljalen.

¹⁷ Sako dindipe laćho thaj sako dindinipe pherdino upral si, huljela kotar o Dad e rošipnaso, ane savo nane arlisaripa ni ućhalin e paruvipnasi.

¹⁸ Kaj amen kamle kamipasa bijanđa lafesa e čaćipaso, te ova sar anglune kotar lesere ćeripa.

Kotar o dživdo paćape

¹⁹ Odolese, khamle mle phraljalen, nek ovel sako manuš siguno te šunel a poloćino te vakerel thaj poloćino te xoljanel pe;

²⁰ Kaj e xoli e manušesiri na ćerela hakajipe e Devlesoro.

²¹ Odolese frden sako bikhoslipe thaj aćhipe e džungalipnaso, thaj laćhekovlipasa len o sejime lafi savo šaj te inkalel e ođe tumare.

²² Oven eke ćerutne e lafijengere, a na semo ašunutne, xoxavindoj korkore pes.

²³ Kaj ako ko šunela o lafi a na ćerela, ov si miazuno e manušese savo dikhela po muj ple trupesoro ane ajna;

²⁴ Kaj dikhlja pe, thaj đelo, thaj sigate bisterđa savo sinele.

²⁵ Aj ko inklela ano pherdino kanuni e muklipnaso thaj aćhola ane leste, thaj na ovela bistarutno ašunutno aj ćerutno e ćerdipnaso, odova ka ovel anglabaxtalo ano ćeripe plo.

²⁶ Ako ko kotar tumende gndinela kaj si pherdino paćape, a na inćarela pli ćhib, aj xoxavela plo vilo, leskoro pherdino paćape si andodilipe.

²⁷ Pherdo paćape khoslo thaj paćivalo anglal o Devel thaj o Dad si akava: te dikhljaren pe e ćorore thaj e phivlja ano bibaxtalipe lengoro, thaj te arakhe tut e bimeljardipnastar kotar o them.