E Galatenge 5 - Romski prevod Novog zaveta - Srbija

Čaćuno muklipe

¹ Terđoven, eke, ano muklipe saveja amen o Hristos mukljarđa, thaj ma dena tumen palem ano jarmo e roboipnasoro te astarđon.

² Ake me, o Pavle, phenava tumenge kaj te sunetisajlen, o Hristos tumenge niso na ka therdinel.

³ A mothovava palem sakone manušese savo sunetinela pe kaj si kamuno sa o kanuni te ćerel.

⁴ Ulavđen tumen katar o Hristo, tumen save pes e kanuneja čaćaven, thaj katar o dindipe propeljen;

⁵ Kaj amen Đesa, kotar o paćape, adžićeraja o adžaćaripe e hakajipnaso.

⁶ Kaj ano Hristo Isuso ni so mol o sunetipe ni o nasunetipe, aj o paćape savo andar o kamlipe ćerela.

⁷ Prastandiljen šukar! Ko tumen aćhavel kaj te na teljarentumen e čaćipnase?

⁸ Odova bimuklipe nane kotar Odova savo tumen vičini.

⁹ Hari maja ušljarela sa o xumer.

¹⁰ Me dandov ma pe tumende ano Devljutno kaj niso aver na ka gndinen; a odova savo tumen hulavinel ka inđarel krisipe, ma ko te ovel.

¹¹ A me, phraljalen, te pana kotar o sunetipe vakerava, sose man teg prastavena? Eke, ćhinavela pe o peravdipe e trušulesoro.

¹² O, te bi vi ćhindona odola save tumen hulavinen!

¹³ Kaj sen tumen, phraljalen, ko muklipe vičime; semo na muklipe bašo ćeripe po kamlipe e trupose, aj kaj andar o kamlipe te kanden jekh avrenđe.

¹⁴ Kaj pe sa o Kanuni pherela pe ano jekh lafi, ane kava: Ćumudin e majpašutne kle sar tut korkore.

¹⁵ Aj te jekh avre dandarena thaj xana, dikhen kaj maškarpeste te na mudaren tumen.

O Đi thaj o trupo

¹⁶ Phenav eke: po Đi phiren, thaj lubikanipe e trupesoro na ka ćeren.

¹⁷ Kaj o trupo mangela opipe e Đesoro, a o Đi opipe e trupeso; a akava opipinela jekh averese, te ćeren odova so na bi mangena.

¹⁸ A te sen eke Đesa legarde, nasijen telal o kanuni.

¹⁹ A penđarde si o ćerdipna e truposere, save si: anglaćumudipe, rumipe, bikhoslipe, biladžipe,

²⁰ idolokamipe, drabaripe, dušmanlukija, ćingara, džungalipa, bari xoli, bimuklipa, biulavdipa, jeresipa,

²¹ korikanipe, mudaripe, matipe, mukljardipa, thaj miazune akalenge bašo save tumenge anglal phenava, sar so vi angleder vakerđum, kaj odola save ađahar neso ćerena na ka nalen o Thagaripe e Devlesoro.

²² A o bijanipe e Đesoro si: kamlipe, lošalipe, šalomipe, baroingaripe, bahtaripe, šukaripe, paćape,

²³ krotkipe, inćardipe. Bašo asavke nane kanuni.

²⁴ A save si e Hristosere, inzarde o trupo zorale haćaripnasa thaj e manglipanca.

²⁵ Ako Đesa dživdinaja, po Đi thaj te phira.

²⁶ Ma te ova korkorebarikane, akharindoj po iklipe jekh avre, bićaljarde pe jekh avreste.