E Galatenge 4 - Romski prevod Novog zaveta - Srbija

Roboipe e kanunese thaj evangeliumesoro muklipe

¹ Aj phenava, bašo o vakti dži kaj si o kustikutno ćhavoro khanći na ulavel pes kotar o robo, thaj ako si devljutnuno kotar sa.

² Aj si telal e bararutne thaj vastarutne dži o ćhinavdo dive savo o dad ćhinavđa.

³ Ađahar thaj amen, kana sama ćhavore, sama astardine e themesere stihijencar;

⁴ A kana avilo pherdipe e vakteso, bićhalđa o Devel ple Ćhave, savo bijandilo kotar e džuvli, savo sinele telal o kanuni,

⁵ te ćinel odolen save si telal o kanuni, te la o ćindoćhavipe.

⁶ A poso sen ćhave, bićhalđa o Devel o Đi ple Ćhavesoro ane vile tumare, savo vičini: Ava, Dade!

⁷ Ađahar nasijan maj robo, aj ćhavo; te li san ćhavo, thaj kustikutno sijan e Devlesoro andar o Hristo.

⁸ Aj teg na džanglindoj e Devle, roboinđen e devlenge save odola pe natura naine.

⁹ A akana penđarindoj e Devle, ja polaćhe, anglune penđarde kotar o Devel, sar pale irinen tumen ko bizorale thaj ćorore stihije, savenge pale andaronevo mangena te robojinen?

¹⁰ Dikhena ko dive thaj ćhona, thaj vaktija thaj berša!

¹¹ Darava baše tumenge, kaj te na andodilipe trudisajlem uzale tumende.

¹² Oven sar me, kaj sem thaj me sar tumen, phraljalen, ruđinav tumen; niso mange na ćerđen dukhajmase.

¹³ A džanena kaj tumenge bašo bizoralo trupo vakerdem o evangeliumo angluno drom,

¹⁴ thaj o zumavipe mlo ko trupo mlese na teljarđen ni na ćhungarđen, aj leljen ma sar e Devlesere phakale, sar e Hriste Isuse.

¹⁵ Sar li eke sinele teg tumaro bahtarokovlipe? Kaj tumenge mothovava te bi tumen, kana bi ovela šajčine, inkalena e jakha tumare thaj dena len mange.

¹⁶ Odolese li tumenge uljum dušmani, so tumenge o čaćipe vakerava?

¹⁷ On na bućarena šukar tumenđe, aj mangena te ulaven tumen, kaj lenge te bućaren.

¹⁸ A šukar si te bućaren sajekh ano šukaripe, thaj na semo kana sem me ke tumende.

¹⁹ Ćhavoralen mle, saven palem pharipnaja bijanava, džikaj o Hristos na formirinelpe ane tumende!

²⁰ Mangava bi eke akana te ovav ke tumende, thaj te arlinav o krlo mlo, kaj sem ano dujgindipe baše tumende.

²¹ Phenen mange, tumen save mangena telal o kanuni te oven, sar na ašunena o kanuni?

²² Kaj si hramome kaj o Avraam duj ćhave sinele, jekhe kotar e robkinja a jekhe kotar e mukljuni.

²³ Aj odova kotar e robkinja, po trupo bijandilo: a akava kotar e mukljuni, pe dinde lafija.

²⁴ A odova si phendino avere manajipnasa: kaj si odola duj xape sovlja, jekh kotar e plain Sinaj, savo bijanela bašo roboipe, a odova si e Agara.

²⁵ Kaj e Agara si plain Sinaj ane Arabija, thaj avela sar avdisutne Jerusalimose, a ov robuinela ple ćhavorencar;

²⁶ A o upruno Jerusalim mukljuno si, thaj daj si sarijenge amenge.

²⁷ Kaj si hramome: Lošalisavin tut, bibijandutnije savi na bijane, vičin thaj de vika, tu savi nane tut munke e bijanipnasere; kaj e aćhavdi isila but majbut ćhavore, aj odoja savi isila rom.

²⁸ A amen sinjam, phraljalen, po Isako ćhavore e dinde lafijenge.

²⁹ No sar so tegani odova so si po trupo bijando prastavi e bijande po đi, ađahar thaj akana.

³⁰ Aj so o Lil vaćeri? Ikal e robinka thaj e ćhave lakere; kaj o ćhavo e robinkakoro na ka kustikutninel e ćhaveja e mukljutnakereja.

³¹ Ađahar, phraljalen, nasijam ćhavore e robinkakere aj e mukljutnakere.