E Galatenge 1 - Romski prevod Novog zaveta - Srbija

Andripe

¹ O Pavle, apostoli na kotar e manuša ni prekal o manuš, aj andar o Isus Hristo thaj Devel o Dad savo le dživdininđa andar o mule,

² thaj sa e phralja save si mancar, e Khanđirjenge e Galatijakere:

³ Dindipe tumenge thaj šalom kotar o Devel o Dad thaj amare Devljutneso o Isus Hristoso,

⁴ savo dinđa pes bašo bezeha amare te inkalel amen kotar akanutno džungaleso bimeripe, po kamipe e Devlesoro thaj amare Dadesoro,

⁵ savese glorija ane bimeripasere bimeripa. Amin.

⁶ Čudina ma kaj kotar Odova savo vičinđa tumen e Hristosere dindipnaja, ađahar sigate irinena tumen ko aver evangelium,

⁷ savo nane aver, semo so tumen nesave hulavinen thaj mangena te irinen o evangelium e Hristosoro.

⁸ Aj te tumenge thaj amen ja o phakalo e badalestar vakerela o evangelium averćhane aj so tumenge vakerđam, anatema te ovel!

⁹ Sar so eke phenđam, thaj akana pale phenava: te tumenge nesavo vakerela o evangelium avećhane aj so leljen, anatema te ovel!

¹⁰ Sar me akana mangava kaj e manušen te lav ja e Devle? Ja rodava e manušenge te laćharav? Kaj kana bi pana e manušenge laćharava, na bi ovava kandino e Hristosoro.

O Devel akharđa e Pavle vaš apostolese

¹¹ A dava tumenge po džanipe, phraljalen, kaj o evangelium savo me mothovdinđum, nane kotar o manuš;

¹² Ni les me leljum kotar o manuš, a ni sikliljum, aj phućaripnaja e Isus Hristosereja.

¹³ Kaj šunđen mlo dživdipe maškar o Judeja, kaj but tradijem e Khanđiri e Devlesiri thaj derminđum la,

¹⁴ thaj anglalđeljum ano Judejipe pobut kotar e but mle beršengere ano njamo mlo, avune but bućarno baše mle dadengere dindinipa.

¹⁵ A kana bahtarela o Devel, savo man alonđa kotar o vođi mla dajakoro thaj vičinđa pla dindipnaja,

¹⁶ te mothovel ple Ćhave ana mande, le te mothovdijav maškar e nadžangledevlesere, odova časo na phućljum e trupora thaj o rata,

¹⁷ ni na ikliljum ano Jerusalim odolenge save sinele apostolija angleder mande, aj dželem ane Arabija, thaj pale irinđum ano Damask.

¹⁸ A napal, palo e trin berša, ikliljum ano Jerusalim te dikhav e Petre, thaj aćhilem ke leste dešupandž dive.

¹⁹ A avere kotar e apostolija na dikhljum, semo E Jakove phrale e Devljutnesere.

²⁰ A tumenge so hraminav, eke o Devel mange si dikhutno kaj na xoxavav.

²¹ Napal aljum ane agora e Sirijake thaj Kilikijake.

²² A sinjumle korkoro bipenđardo e Hristosere Khanđirjenge ane Judeja,

²³ aj semo ašundesa kaj odova, savo amen nekana tradinđa, akana vakerela o paćape savo nekana peravđa,

²⁴ thaj glorisinena e Devle baše mande.