E Filipljanenge 4 - Romski prevod Novog zaveta - Srbija

Šalomkamlipe thaj laćhoarakhadipe si mangljuno

¹ Odolese, phraljalen mle o ćumidle thaj najmangle, lošalipe mlo thaj khuvdinoro mlo, ađahar terđoven ano Devljutno, ćumidle!

² E Evodija ruđinava, thaj e Sintihija ruđinava, kaj jekhune te gndinena ano Devljutno.

³ Va, ruđinava thaj tut, kupaćerutneja paćavineja, ažutisar lenđe save ćerđe manca ano mothovdipe e evangeliumosoro khatane thaj e Klimentoja thaj e avere telalažutnenca mlencar, kasere anava si ane pustik e dživdipasiri.

⁴ Lošalen tumen ano sarsavo vakti ano Devljutno, thaj palem phenava: lošalen tumen!

⁵ O dindipe tumaro nek ovel pinđardo sa e manušenđe. O Devljutno si paše.

⁶ Ma grižinen tumen ni baše soste, aj ane sa e ruđutnaja thaj e ruđipaja e ašardipnaja mothoven e Devlese e mangipa tumare.

⁷ Thaj o šalom e Devlesoro, savo nakhavela sako godi, ka arakhel o vile tumare thaj e gndipa tumare ano Hristo Isuso.

⁸ A poangle, phraljalen, so god si čaćuno, so god si paćavino, so god si hakajuno, so god si khoslo, so god si paćivalo e kamlipase, so god si po laćho krlo, fije savo paćivalipe, fije so ašarinaja e paćivalipnase, odova gndinen;

⁹ So thaj sikliljen, thaj leljen thaj ašunđen thaj dikhljen pe mande, odova ćeren, thaj o Devel e šalomnipaso ka ovel tumencar.

E Apostolesoro ašardipe

¹⁰ A lošalisajlem but ano Devljutno so majpalal palem dijen tumen godi te phurederinen tumen baše mande, sar so thaj phurederisajlen, aj nasine tumen kradanat.

¹¹ Vakerava odova na bašo najstalipe, kaj me sikliljum te ovav ćaljardo odoleja so isima.

¹² Džanava thaj te teljardovav, džanav thaj te barvajovav; ano sa thaj saheste sikliljum; thaj ćalo te ovav thaj bokhalo, thaj te barvajovav thaj te ćororovav.

¹³ Sa šaj ano Hristo savo dela mange zor.

¹⁴ Eke, laćhe ćerđen so leljen lipe ane mle belava.

¹⁵ A džanena thaj tumen, Filipljanija, kaj ano širdipe e mothovipeso e evangeliumosoro, kana iklilem andar e Makedonija, ni jekh mange Khanđiri na lija lipe ano dindipe thaj lipe semo tumen jekhune;

¹⁶ Kaj mange thaj ano Solun bićhalđen angluno thaj o dujto drom baše mlo trubuipe.

¹⁷ Na sar kaj rodava dindipe, aj rodav bijanuno savo butisarel pes po labhipe tumaro.

¹⁸ A me lijem sa thaj isiman butune. Ćajljardino sem lindoj kotar o Epafrodito so mange bićhalđen, gudli sung, viktima ćaljardimasiri, šuži e Devlese.

¹⁹ A o Devel mlo ka pherel sako trubuipe tumaro palo barvalipe plo ane glorija, ano Hristo Isuso.

²⁰ A e Devlese thaj Dadese amarese glorija ane bimeripasoro bimeripe. Amin.

Agoripasere bićhalde sastipa thaj bahtardipe

²¹ Bićhalen sastipe sakone sumnalese ano Hristo Isuso. Bićhalen tumenđe sastipe o phralja kola si mancar.

²² Bićhalen tumenđe sastipe sa e sumnale, a uladune odola andar e thagaresoro kher.

²³ Dindipe amare Devljutnesoro e Isus Hristosoro sarijencar tumencar. Amin.