E Filipljanenge 1 - Romski prevod Novog zaveta - Srbija

Andripe

¹ O Pavle thaj o Timotej, kandine e Isus Hristosere, sarijenđe e sumnalenđe ano Isuso Hristo save si ano Filipo, e episkonencar thaj đakonencar:

² Dindipe tumenge thaj šalom kotar o Devel Dad amaro thaj Devljutno o Isus Hristo.

³ Ašarinav mle Devlese kana god dav ma godi tumenđe,

⁴ sajekh ane sakoj ruđutni mli lošalipnaja ruđinape baše sa tumenge,

⁵ so tumen uljen khatanićarja ano evangeliumo, kotar o angluno dive ta dži akana;

⁶ Paćavdo ane odova, kaj ka Odova savo počinđa o šukar ćerdipe ane tumende ka agorinel le sa dži o dive e Isus Hristosoro.

⁷ Sar so si thaj hakaj kaj me akava bašo sa tumenge gndinav; kaj tumen isima ano vilo, thaj ane sinđirja mle, thaj ano arakhavdipe thaj čačavdipe e evangeliumosoro, sa tumen save sen mle khatanićarja ano dindipe.

⁸ Kaj o Devel si mange jaćhencadikhutno, kobor zorale mangava pala sarijende tumende ano kamlipe e Isus Hristosoro;

⁹ Thaj baše odova ruđinape e Devlese kaj o kamlipe tumaro sa majbut thaj majbut barvarđola ano penđaripe thaj sako kamlipe,

¹⁰ te moldinen so si najšukar, te oven khosle thaj biperavde ko dive e Hristosoro,

¹¹ pherde bijanune hakajese andar o Isuso Hristo, ki glorija thaj o ašaripe e Devlesoro.

E apostolesoro than thaj o evangelium

¹² Mangav eke te džanen, phraljalen, kaj odova so sinele mancar semo anđa ko anglalšukaripe e evangeliumose,

¹³ ađahar kaj sa e thagareso kris thaj sa e avera džanen kaj sem ane sinđirja bašo Hristo.

¹⁴ Thaj but phralja ano Devljutno, zorarde e sinđirencar mlencar, pana majbut tromalisajle kaj bi darakoro te vakeren o lafi e Devlesoro.

¹⁵ Jekhune, hemčaće, andar o korikanipe thaj čingaripe mothovena e Hristo, a e avera kotar o laćho kamipe;

¹⁶ Ađahar kaj jekhune andar o injati mothovena e Hristo e bikhosle iradaja, gndindoj kaj ka anen dukhavipe mle sinđirenđe.

¹⁷ A e avera andar o kamlipe, džanglindoj kaj sem akate bašo arakhavdipe e evangeliumosoro.

¹⁸ So napal? Sasa sar lese kamle, phandune ja čaćikane, o Hristos mothovela pe; thaj odolese lošalape, a thaj ka lošala ma;

¹⁹ Kaj džanav kaj akava ka irinel pe ko mlo inkaldipe pe tumari ruđutni thaj ažutipe e Đesoro e Isus Hristosoro,

²⁰ sar so paćavune adžikerava thaj paćava kaj ni ane soste na ka ladžav, aj kaj ka o Hristos sar sajekh thaj akana ple tromalipnaja ka barjovel ano trupo mlo, ja dživdipnaja ja meripnaja.

²¹ Kaj si mange o dživdipe Hristos thaj o meripe si šukar leipe.

²² Aj te si o dživdinipe ano trupo bijanimno bašo mlo ćerdipe, tegani na džanav so te alosarav.

²³ A lela man solduj: isima manglipe te merav thaj e Hristosa te ovav, so si but pošukar;

²⁴ Aj te aćholape ano trupo majtrubune si baše tumende.

²⁵ Thaj akava paćavine džanava, kaj ka aćhovav thaj ka bešav sarijencar tumencar bašo tumaro anglipe thaj lošalipe e paćapesoro,

²⁶ te bi e ašaruni tumari ano Hristo Isuso butinela pe prekalo mande kana tumenđe palem ka avav.

Akharipe po jekhipe thaj putaruno paćape

²⁷ Semo dživdinen paćivale e Hristosere evangeliumose, kaj tumen kana ka avav dikhava, ja tumenđe te na aljum, te šunav baše tumenđe kaj terđona ano jekhuno đi, jekhođune marindoj bašo paćape e evangeliumosoro,

²⁸ thaj ni ana soste te na daran e opipeutnestar; odova si lenge semno peripnasoro a tumenge inkaldipe, thaj odova kotar o Devel.

²⁹ Kaj si tumenge dindino aso Hristo, na semo te paćan ano Leste, aj thaj te meren baše Leste.

³⁰ Isindoj odova jekhuno maribe savo ke mande dikhljen thaj akana šunena kotar mande.