E Filimonose 1 - Romski prevod Novog zaveta - Srbija

Andripe

¹ O Pavle, phandino e Hristo Isusoso, thaj o phral Timotej, e Filimonose ćumudinose thaj kupaćerutnese amarese,

² thaj e kamle Apfijaće, thaj e Arhipose, marutnese amarese, thaj kla ćherutna khanđirjaće:

³ Dindipe tumenđe thaj šalom kotar o Devel o Dad amaro thaj Devljutno Isuso Hristo.

E Filimonesoro paćape thaj kamlipe

⁴ Ašarinape e Devlese mlese sajekh liparindoj tut ane mle ruđutna,

⁵ kaj šunava bašo kamlipe klo thaj o paćape savo isi tut premalo Devljutno Isuso thaj premalomsarijende e sumnalende,

⁶ kaj o khatanipe e paćapeso klo ovela ćeruno ano penđaripe sakone laćhipnasoro savo isi ano Hristo Isuso.

⁷ O kamlipe eke klo ćerela amenđe baro lošalipe thaj zoralipe, kaj tu, phrala, o vile e sumnalengere šalominđan.

O Pavle bićhalela e Onosimo

⁸ Baše odova, ako pak isima pherdo muklipe ano Hristo te čhinavav tuće so valjani te ćere,

⁹ bašo kamlipe kamljune ruđinava tut, me korkoro, o Pavle phuro, a akana thaj phandino e Isus Hristosoro,

¹⁰ ruđinav tut bašo ćhavoro mlo e Onisimose, save bijandem ane verige mle;

¹¹ Nekana tuće bitrubune, a akana vi tuće thaj maje trubune. Bićhalđum tuke les napalal;

¹² A tu les, odova čaće o vilo mlo, lole.

¹³ Me le mangljum te ićerav ke mande, kaj mange ko than klo kandel ane verige bašo evangeliumose.

¹⁴ Aj bi klo džanipe na manglem niso te ćerav, kaj klo laćhoćeripe ne bi ovela zoraja aj laćhekhamipnaja.

¹⁵ Kaj šaj odolese thaj ulavdilo tuja bašo xarne te les le bašo bimeripe,

¹⁶ na maj sar robo, aj majbut kotar o robo, phrale ćumudine, ulavdune maje, a kobor majbut tuke, thaj po trupo thaj ano Devljutno.

¹⁷ Te sem tuće, akana, khatanutnari ano paćape, le les sar man.

¹⁸ Te ćerda tuće ane soste doš, ja kamuno aćhilo, odova maje saćidin.

¹⁹ Me, o Pavle, hramonđum mle vasteja, me ka poćinav; te na phenav tuće kaj thaj korkoro pes mange kamea.

²⁰ Va, phrala, lošar ma ano Devljutno; šalomin o vilo mlo ano Devljutno.

²¹ Dandinoj ano klo kandipe, hramonđum tuće, džanglindoj kaj ka ćere majbut semo so phenava.

²² A jekhune gatisar manđe laćho adžikeripe, kaj adžikerava kaj ka tumare ruđipenca ovav tumenđe dindino.

Agoripasere bićhalde sastipa thaj bahtardipe

²³ Bićhalel tuće sastipe o Epafraso savo si mancar phandino ano Hristo Isuso,

²⁴ o Marko, o Aristarho, o Dimas, o Luka, kupaćerutne mle.

²⁵ Dindipe e Devljutneso amareso e Isus Hristoso e đesa tumaresa. Amin.