Evangelium e Matejestar 9 - Romski prevod Novog zaveta - Srbija

Sastaripe e lindesoro

¹ Thaj dindoj ani barka, nakhlo thaj avilo ano plo foro.

² Thaj dikh, ande lese e linde savo pašljola po than. Thaj dikhindoj o Isus o paćape lengo, phenđa e lindese: Ma dara, ćhavoreja, jertisinipe tuke e bezaha tire.

³ Thaj dikh, nesave kotar e lilvarne phende ana peste: Akava mahril po Devel.

⁴ A o Isus, dikhindoj so den godi lenge, phenđa: Sose tumen đungalipe den godi ano vile tumare?

⁵ Kaj so si najloke, te phene: Jertisavon tuke e bezeha; ja te phene: Ušti thaj phir?

⁶ Aj te đanen kaj zor isi e Čhave e Manušesere pe phuv te jertini e bezeha; teg phenđa e lindese: Ušti, le o than tiro thaj đa te ćhereste.

⁷ Thaj uštindoj gelo ple ćhereste.

⁸ A o seloro dićhindoj barikane thaj ašardinde e Devle, savo dinđa asavko zor e manušenge.

E Matejesko akharipe

⁹ Thaj dželoindoj o Isus odothar dikhla e manuše kaj bešel pe šulka, po alav Mateja, thaj phenđa lese: Ava pala mande. Thaj uštindoj đelo palo leste.

¹⁰ Thaj kana xana ano ćher, dikh, bute šulkara thaj došale avile thaj xale e Isuseja thaj lesere sikljovnenca.

¹¹ Thaj dićhindoj odova, e Fariseja phende lesere sikljovnenge: Sose e šulkunencar thaj bezehalencar o sikamno tumaro xal thaj pijel?

¹² A o Isus ašundoj phenđa lenge: Ni trubul e saste doktoren aj e nasvale.

¹³ Aj đan thaj sićon so đanelpe: Kovlipe mangav, a na pašaripe viktimako. Kaj ni avilem te akharav e čačutnen aj e došalen ko jertipe.

¹⁴ Teg lese ale e sikljovne e Jovanosere vakerindoj: Sose amen thaj e Fariseja postina but, a e sikljovne tire ni postinena?

¹⁵ A o Isus lenge phenđa: Da li šaj e abavara te oven dukharde đikaj si lenca o unsurutno? Aj ka aven o dive kana ka ovel čordo lendar o unsurutno, thaj teg ka postinen.

¹⁶ Kaj khonik na čhivela nevo kotor po purano fostani; kaj o kotor zurale čalavel e fostanostar, thaj najdžungale e xuv ka ovel.

¹⁷ Ni kaj čhorel pe mol nevi ane xala morćhatar purane; te na xovardon e xala morćhatar a e mol čhordol pe, thaj e xala morćhatar ka peren. Aj čhorel pe mol nevi ane xala morćhatar neve, thaj solduj arakhen pe.

¹⁸ Đikaj ov ađaar vakerda lenge, dikh, o thagarutno jekh avilo thaj pelo pe čanga leske vakerindoj: E ćhej mli akana merel: aj ava thaj čhiv pe late o vas tiro, thaj ka đivdinel.

¹⁹ Thaj uštindoj o Isus lijape pala leste, thaj e sikljovne lesere.

²⁰ Thaj dikh, e đuvli savi dešuduj berša sine nasvali katar o ćhordipe e ratesoro avili palal thaj dolinđa pe ke pođi leske fostanoski.

²¹ Kaj vakerela ana peste: Te numa dolinđum lesoro fostani, ka sastovav.

²² A o Isus, irindoj thaj dikhindoj, phenđa: Ma dara, mi ćhaj, o paćape tiro ikalda tut. Thaj sastili e đuvli kotar odova časo.

²³ Thaj avindoj o Isus ano ćher e thagarutnesko thaj dikhindoj e bašalnen thaj e seloren tangamime, phenđa lenge:

²⁴ Čiden tumen, kaj e ćhaj ni muli, aj sovel. Thaj asandile lese.

²⁵ A kana tradla e seloren, đerdinđa thaj astardala vastestar, thaj uštini e ćhaj.

²⁶ Thaj legardape o krlo akalestar pe sa odoja phuv.

Sastaripe e duje kororengo

²⁷ A kana o Isus đelo odothar, pala leste đana duj korore vikindoj thaj vakerindoj: Maznosar amen, ćhaveja Davidoserea!

²⁸ A kana avilo ano ćher, ale paše leste e korore, thaj phenđa lenge o Isus: Paćan li kaj šaj odova te kerav? A on lese phenđe: Va, Devljutnea.

²⁹ Teg astarda pe ko lengere jača vakerindoj: Po paćape tumaro nek ovel tumenge.

³⁰ Thaj phravdile lengere jača. Thaj daravda len o Isus vakerindoj: Dikhen khonik te na đanel!

³¹ A on iklindoj, mothovde le pe sa odoja phuv.

Sastaripe e laloresoro thaj e diljarde manušesoro

³² Kana pale on ikljovena, dikh, ande lese e lalore manuše thaj e diljarde.

³³ Thaj kana tradla e benge, vakerda o laloro. Thaj baripe kerela o seloro vakerindoj: Nisar odova na dičhilo ano Izrailj.

³⁴ A e Fariseja vakerena: Mažutimasa e thagarutne bengencar tradla e bengen.

³⁵ Thaj phirda o Isus pe sa e forura thaj e gava sikavindoj pe sinagoge lenge thaj vakerindoj o evangelium e Thagaripastar, thaj sastarindoj sakoj nasvalipe thaj sako bizuralipe ano seloro.

³⁶ A dićhindoj buten seloren, kovljardilo pe lende, kaj sesa xasarde thaj mukle sar o bakre bizo čobano.

³⁷ Teg phenđa e sikljovnenge plenge: Čhinipe si but, a bućarne hari.

³⁸ Ruđin tumen akana e barutne čhinimase kaj te ikalel e bućarnen po čhinipe plo.