Evangelium e Matejestar 8 - Romski prevod Novog zaveta - Srbija

Užaripe e đeramnesko

¹ A kana huljilo katar e plajin, lijepe pala leste bute selora.

² Thaj dikh, avilo o đeramno thaj pelo pe čanga vakerindoj: Devljutnea, te mangljan, šaj te užares ma.

³ Thaj meklja po vas o Isus, astarda le vakerindoj: Mangav, užar tut. Thaj sigo užaras pe katar e đeramni pli.

⁴ Thaj phenđa lese o Isus: Dikh, khanikase ma phen, aj đa thaj mothovtu e rašajese, thaj legar o davipe savo vakerda o Mojsije kotar lengoro mothovipe.

Sastaripe e kapetanosere kandine

⁵ A kana đerdinđa ano Kapernaum, alo đi leste o kapetano ruđindoj le thaj vakerindoj:

⁶ Devljutnea, o kandino mlo pašljol ćhere lindo, thaj daramne mučil pe.

⁷ A o Isus lese phenđa: Me ka avav thaj ka sastarav le.

⁸ Thaj o kapetano irisarda thaj phenđa: Devljutnea, najsem moldino te telal o ćhatlo mlo đerdine, aj numa phen o lafi, thaj ka sastol o kandino mlo.

⁹ Kaj vi me sem manuš telal e zor, thaj isi man telal mande urumnen, ta phenav jekhese: đa, thaj đal: thaj e averese: ava, thaj avel; thaj e kandinese mlese: ćer odova, thaj kerel.

¹⁰ A kana ašunda o Isus, barikane thaj phenđa odolenge so đan palo leste: Čače tumenge phenav: ni ano Izrailj edobor paćape ni arakhljem.

¹¹ A phenav tumenge kaj but đene katar o istoko thaj zapado ka aven thaj ka bešen baš e astala e Avraameja, thaj e Isakeja, thaj e Jakoveja ano Thagaripe e badalesko;

¹² A čhave e thagaripasere ka oven tradine ano tunjariko najteluno; odothe ka ovel rovipe thaj krcope e dandengoro.

¹³ A e kapetanose phenđa o Isus: Đa, thaj sar paćajan tuke nek ovel. Thaj sastilo o kandino lesoro ano odova časo.

Sastaripa ano Kapernaum

¹⁴ Thaj avindoj o Isus ano kher e Petrose, dikhlja e sasuja lesera kaj pašljol thaj i šilali ćinosarela.

¹⁵ Thaj azbavda e vasta lake, thaj mekla la e jag, thaj uštini thaj kandlja le.

¹⁶ A kana sine e rat, ande leste bute diljarden, thaj tradla o đi lafeja, thaj sa e nasvalen sastarda,

¹⁷ kaj te pherel pe so phenđa o Isaija profeto vakerindoj: Ov e bizora amare lija thaj o nasvalipe legarda.

Mangimata e apostolengere

¹⁸ A kana dikhlja o Isus buten selore uzal peste, phenđa te inkljoven pe okoja rig.

¹⁹ Thaj alo đi oleste jek lilvarno phenđa lese: Sikamneja, ka đav pala tute katar kuri đa.

²⁰ Phenđa lese o Isus: E lungeporjaće silen xara thaj e čiriklja e badaleske kujbora, a o Čhavo e Manušesko najle kaj o šero te garavel.

²¹ A o aver katar e sikljovne lesere phenđa lese: Devljutnea, mek mange najanglal te đav thaj te parunav e dade mle.

²² A o Isus lese phenđa: Ava pala mande, a muk e mulen te parunen ple mulen.

Aćhadipe e balvaljako Diljardine ani Gadara

²³ Thaj kana dija ani barka, pala leste dije e sikljovne lesere.

²⁴ Thaj dikh, balval bari mothodili po derav, ađaar kaj e barka učhardili panjesa ćinosardo; a vov sovela.

²⁵ Thaj ale đi leste e sikljovne lesere, džangavde le vakerindoj: Devljutnea, ikal amen, mudardiljam!

²⁶ Thaj phenđa lenge: Sose sijen daramne, zalapaćamne? Teg uštindoj daravda e balvalja ano derav, thaj ulo biašundipe baro.

²⁷ A e manuša ačharisajlje vakerindoj: Ko si akava kaj le šunena vi e balvalja vi o derav?

²⁸ A kana ov avilo pe okoja rig ani phuv e gergesinengi, resle le duj diljarde, iklindoj andar e limora, ađahar đungale kaj naštine khonik te nakhel odole dromeja.

²⁹ Thaj dikh, dije vika vakerindoj: So mange amendar, Isuse, Ćhaveja Devlesereja? Sar avilan akari anglal o vaxto amen te mučine?

³⁰ A dur lendar ćarjona bari gramada e balengiri.

³¹ Thaj o benga ruđinde le vakerindoj: Te amen tradljan, muk amenge te đa ani gramada e balengiri.

³² Thaj phenđa lenge: Đan. Thaj on iklindoj đele ani gramada e balengiri. Thaj dikh, prastandili sa e gramada e balengiri e učimastar ano derav, thaj taslile ano pani.

³³ A e balengere arakhavne našle; thaj avindoj ano foro mothode sa, vi e diljardenge.

³⁴ Thaj dikh, sa o foro iklistilo ano resipe e Isusese; thaj dikhindoj le, ruđisarde te đal kotar lengoro agor.