Evangelium e Matejestar 5 - Romski prevod Novog zaveta - Srbija

Vakeripe pe plajin

¹ A kana ov dikhlja buten seloren, uklilo pe plajin, thaj bešlo, thaj ale paše leste e sikljovne lesere.

² Thaj pravdindoj o muj plo, sikavela len vakerindoj:

³ Baxtarde si e čorore ođesa, kaj si lengo thagaripe e badalesoro.

⁴ Baxtarde save roven, kaj ka kovljardon.

⁵ Baxtarde e kovle kaj ka len e phuv.

⁶ Baxtarde e bokhale thaj e trošale e čačipnase, kaj ka čaljoven.

⁷ Baxtarde e kovleođesere, kaj ka oven maznosarde.

⁸ Baxtarde uže vilesa, kaj e Devle ka dikhen.

⁹ Baxtarde e šandipekerutne, kaj ka e čhave Devleske akhardon.

¹⁰ Baxtarde e tradine baš o čačipe, kaj si lengoro thagaripe e badalesoro.

¹¹ Baxtarde sen kana tumen lađaren thaj traden thaj xoxavindoj vakeren opipe tumendar savetane đungale lafija, paše mande.

¹² Lošalin tumen thaj lošalinen kaj si e bari poćin tumari po badali, kaj ađaar tradena vi e profetonen anglal tumende.

¹³ Tumen sinjen lon e phuvjake; Ako o lon gunđavol sosa ka lonđarol pe? Ov ake na ka ovel ni sose, sem kaj te čhorel pe avri thaj kaj e manuša te uštaven le.

¹⁴ Tumen sen rošlipe e themeske. Naštil o foro te garadol kana pe plajin ačhel;

¹⁵ Ni na thabljola e memeli thaj čhivelpe telal o vaso sar po memeljako, ta te rošinel sarijenđe save si ano ćher.

¹⁶ Ađahar kaj te rošinel tumaro rošlipe anglo manuša, kaj te dikhen tumare lačhe kotora thaj paćivin e Dade tumare savo si po badalija.

¹⁷ Ma den godi kaj avilem te čhinavav o Krisi ja e Profeten; ni avilem te čhinavav aj te pherav.

¹⁸ Kaj čače tumenge vakerav: Đikaj ni nakhel o badali thaj e phuv, ni ka xasavol najcikni grafema ja jek linija andar o Krisi đikaj sa ni ovel pe.

¹⁹ Te, akana, kova čhinavel jekh katar akala najcikne vakerimata thaj sikavel ađahar e manušen, ka akharel pe najcikno ano Thagaripe e badalesko; a kova del agor thaj sićol, odova baro ka akharel pe ano Thagaripe e badalesko.

²⁰ Kaj tumenge vakerav, te na avilo o čačipe tumaro najbaro katar o čačipe e lilvarnengo thaj e Farisejengo, ni ka den ano Thagaripe e badalesko.

²¹ Šunden sar si vakerdo e puranenge: Ma mudar; kaj kova mudarel, ka ovel bango e krisose.

²² A me tumenge vakerav kaj sako savo holjavol po phral plo ni vaš so, ka ovel bango e krisose; a kaj li kova phenel e phralese plese: „Limori” ka ovel bango ćidutnake; a kova phenel: „Dileja!” ka ovel bango e bengesere jagaće.

²³ Te, akana, aneja o dinipe tiro po than viktimako thaj odothe de tut godi kaj o phral tiro isile khančik opipe tutar,

²⁴ mek odothe o dinipe tiro anglal o than viktimako, thaj đa ta majanglal baraštitu tire phralesa, ta teg ava thaj čhiv o dinipe tiro.

²⁵ Lačhardov e opipeutnesa tiresa sig, đikaj sijan ko drom oleja, kaj te o opipeutno ni dela tut e krisarese, a o krisari te na del tut e kandinese thaj ano phandlipe te na frdel tu.

²⁶ Čače tuke vakerav: Na ka ikljove odothar đikaj ni ka de đi o palune love.

²⁷ Ašunden sar si vakerdo e puranenge: Ma ćer angločumidipe.

²⁸ A me tumenge vakerav kaj sako savo dikhel pe đuvli mangimasa pala late, ake čerda angločumidipe lasa ano vilo plo.

²⁹ A kaj e jakh tiri daxni tradel po bezeh, ikal la thaj ćhudla katar tute; kaj tuće si najlaćhe te mudardol jekh katar e kotora tire na li sa o trupo tiro te ovel frdime ane bengesiri jag.

³⁰ Te li o daxno vas tiro tradel po bezeh, čhin le thaj frde katar tute; kaj tuće si najlaćhe te mudardol jekh katar e kotora tire na li sa o trupo tiro te ovel frdimo ane bengesiri jag.

³¹ Ađahar si phendo: Ko mukel e romnja pla, nek lake del vi e pustik muklimasiri.

³² A me tumenge phenav kaj sako savo mukel e romnja pla, sem ando angločumidipe, tradela te ćerel angločumidipe; thaj savo lel pe muklinasa, angločumidipe ćerel.

³³ Pana ašunden sar si phendo e puranenge: Ma xa sovli bange, a pher so e Devljutnese xalan sovli.

³⁴ A me tumenge phenav: Ma xan sovli nisar: ni badalesa, kaj si e skamin e Devlesiri;

³⁵ Ni phuvjasa kaj si telalplainipe e prenđe leserenđe: ni Jerusalimeja, kaj si foro e bare Thagaresoro.

³⁶ Ni tire šereja ma xa sovli, kaj našti ni bal jekh parno ja kalo te ćere.

³⁷ Akana, nek ovel o lafi tumaro: va, va; na, na; a so si pobut odolestar kotar đungalipe si.

³⁸ Ašunden kaj si phendo: Jakh baš e jakh, thaj dand baš o dand.

³⁹ A me tumenge phenav kaj te na opipen tumen e džungalimase, aj te ko čalada pe daxni čham tiri, irin lese vi aver;

⁴⁰ Thaj savo mangel kaj te krisil pe tusa thaj o gad tiro te lel, de lese vi o fostani;

⁴¹ Thaj te ko tradla tut jekh milja, đa oleja duj.

⁴² Savo rodel tutar, de lese; thaj savo mangel tutar te lel love, ma te na dele.

⁴³ Ašunden kaj si phendo: Čumid e pašune tire, thaj ma čumid e biamale tire.

⁴⁴ A me tumenge phenav: Čumiden e biamalen tumaren, baxtaren odolen save dena tumen arman, keren lačhipe odolenge save tumen na čumiden thaj ruđin tumen baš odola save tumen dukhaven thaj traden.

⁴⁵ Te oven čhave e Dadesere tumaresere savo si po badali; kaj Ov ple khameja strefila vi e džungalen vi e laćhen; thaj del bršin e čačunenge thaj e bičačunenge.

⁴⁶ Kaj te čumidljen odolen save tumen čumiden, savi počini isitumen? Na čeren li ađahar vi e šulkara?

⁴⁷ Thaj ake čerden barosastipe numaj phralenđe tumarenđe, so prabut čeren? Ni čeren li ađahar vi e butdevlengere?

⁴⁸ Oven tumen, akana, pramišto, sar so si pramišto o Dad tumaro e badalesoro.