Evangelium e Matejestar 4 - Romski prevod Novog zaveta - Srbija

E Isusesoro zumavipe

¹ Teg e Isuse legarđa o Đi ko pusto than kaj le o beng te zumavel.

² Thaj postindoj saranda dive thaj raća saranda, majpalal bokhajlo.

³ Thaj avilo leske o zumavutno thaj vakerda: Te sijan o Čhavo e Devlesoro, vaker kaj e bara akala te oven mare.

⁴ A ov vakerda thaj phenđa: Hramosardo si: Na đivdini o manuš jeke marestar, aj e sakoj lafestar savo ikljola andar o muj e Devlesoro.

⁵ Teg le o beng legarđa ano Sumnalo foro thaj čhuta le pe phak e hramoski.

⁶ Ta lese phenđa: Te san o Čhavo e Devlesoro, ripin tele, kaj si hramome: E Phakalenge plenge ka vakeren baš tute, thaj ka lel tut ano vasta, kaj sar te na khuvetu ko bar tire preja.

⁷ A o Isus lese phenđa; Vi akava si hramome; Ma zumav tire Devljutne Devle.

⁸ Pale le lelja o beng thaj inđarda pe plajin but uči, thaj sikada lese sa e thagarimata akale themestar thaj baro dive lengo.

⁹ Thaj phenđa lese: Sa akava ka dav tuke te peljan thaj te pere pe duj čanga angla mande.

¹⁰ Teg lese o Isus phenđa: Đa katar mande, Benga, kaj si hramome: E Devljutne Devlese plese per pe čanga thaj lese jekhunese te kande!

¹¹ Teg le o beng meklja, thaj dikh. E phakale ale thaj kandena lese.

Širdipe bućako ane Galileja

¹² A kana ašunda o Isus kaj o Jovan si dindo, đelo ane Galileja.

¹³ Thaj meklindoj o Nazaret, avilo thaj thanardilo ano Kapernaum pe phuv uzalo derav; ane agora e Zavulonovese thaj Neftalimovese.

¹⁴ Te pherdol so phenđa o profeto Isaija vakerindoj:

¹⁵ E phuv Zavulonovosi thaj e phuv Neftalimovesi, po drom karing o derav pe okoja rig e Jordanosiri, Galileja butedevlengiri;

¹⁶ O seloro save bešen ano tunjariko dikhla rošlipe baro, vi odolenge save bešen ano umal thaj učhaljin merimaski, o rošlipe strefisarda.

¹⁷ Kotar akana lija o Isus te mothovel thaj vakerel: Jertin tumen, kaj paše alo o Thagaripe e badalesko.

¹⁸ A džandoj pašo derav e Galilejosko dikhlja dujen phraljen, e Simone, akhardo Petar, thaj e Andreja, phrale lesere, kaj čhuden e safin ano derav, kaj sine maćhara.

¹⁹ Thaj phenđa lenge: Aven pala mande thaj ka kerav tumen maćhara e manušengere.

²⁰ A on sigate mukle e safina thaj lijepe palo leste.

²¹ Thaj dželindoj othar dikhlja avren dujen phraljen, e Jakove Zevedejeve thaj e Jovane phrale lesere, ane barka e Zevedejevesa, lengere dadesa, kaj suvdaren e safina ple, thaj akharda len.

²² A on sigo mekle e barka thaj e dade ple thaj lijepe palo leste.

²³ Thaj phirda o Isus pe sa e Galileja thaj sikavda pe sinagoge lengere, thaj mothovindoj o evangelium katar o Thagaripe, thaj sastarindoj sako nasvalipe thaj sako bizuralipe ano seloro.

²⁴ Thaj gelo o krlo katar leste pe sa e Sirija; thaj ande leske sa e nasvalen, savone nasvalimatar thaj pharimatenca linde, thaj diljarde, thaj čhonaren, thaj linden, thaj sastarda len.

²⁵ Thaj pala leste đana selore but andar e Galileja, thaj andar o Dekapolji, thaj andar o Jerusalim, thaj Judeja vi okole rigatar e Jordanosiri.