Evangelium e Matejestar 3 - Romski prevod Novog zaveta - Srbija

Vakeripe e Jovan Bolipesarutnesoro

¹ Ane odola dive avilo o Jovan Bolipesarutno thaj vakerda ano pusto than e Judejaki.

² Thaj vakerda: Jertin tumen, kaj paše alo o Thagaripe e badalesoro.

³ Kaj goda si odova baš saveske phenđa o profeto Isaija vakerindoj: Krlo riknimasko ano pusto than: laćharen o drom e Devljutnesoro, laćharen e dromora lesere.

⁴ A korkoro o Jovan sine le fostani kotar e devake bala thaj kustik morčhakiri phandli ko kukija ple, a xape sine lese ćar thaj divo avđin.

⁵ Teg ikljolape koro leste o Jerusalim thaj sa e Judeja, thaj sa o trujalipe e jordanosoro.

⁶ Thaj ov len bolela ano Jordan, thaj mothovena e bezeha ple.

⁷ A kana dikhlja bute farisejen thaj sadukejen kaj aven te bolen len, vakerda lenge: Njamura aspidenge, ko tumenge phenđa te našen katar holjanipe kova avel.

⁸ Bijanen, akana, njamo paćivalo jertimasko.

⁹ Thaj ma den godi thaj ma vakeren ana tumende: Isi amen dad o Avraamo; kaj tumenge phenav kaj šaj o Devel vi katar o bar akava te vazdel čhaven e Avraamoske.

¹⁰ A ake thaj o tover ke darhina e kašteske terđol: sako, akana, kaš savo ni bijanel lačho bijanipe, čhinel pe thaj ane jag frdel.

¹¹ Me tumen bolav panjesa baš jertisaripe; a odova so avel pala mande najzuralo si katar mande: me najsem digamo lesko pođipe te ingarav; vov tumen ka bolel Đesa Sumnalesa thaj jagasa.

¹² Leske si o vatralji ano vas ta ka užavel o gumno plo, thaj ka kidel o điv plo an hambari, a e pljeva ka tharel jaga bimudarda.

E Isusesoro bolipe

¹³ Teg alo o Isus kotar e Galileja po Jordan e Jovanose ta akava te bolel le.

¹⁴ A o Jovan le na mukela vakerindoj: Tu trubul man te boles, a tu li ave mange?

¹⁵ A o Isus irisarda thaj vakerda lese: Mek akana, kaj ađahar amenge trubul te pheras sarsavo čačipe. Teg ole meklja.

¹⁶ Thaj bolindoj o Isus inklilo sigo andar o pani; thaj dikh, putardilo lese o badali, thaj dikhlja o Đi e Devlesoro kaj uljol sar golubo thaj avel pe leste.

¹⁷ Thaj dikh, krlo katar o badali savo vakerel: Akava si Čhavo mlo čumidlo savo si pe mlo kamipe.