Evangelium e Matejestar 27 - Romski prevod Novog zaveta - Srbija

O Isus anglal o Pilat

¹ A kana sine sabajle, čerde phurederipe sa e anglunerašaja thaj e phurederutne e seloresere opipe e Isusestar te xasaren le.

² Thaj phanglindoj le legarde, thaj dindo le e Pontijase e Pilatose, e regentose.

³ Teg dićhindoj o Juda, dindo mujesoro lesoro, kaj les krisisarde, xor dukhavdilo, thaj irinđa o trijanda rupa e anglunerašajenge thaj phurederutnenge

⁴ vakerindoj: Ćerdem bezeh kaj dinđum mujal o rat bidošalo. A on phende: So amen hajisara baš odova? Tu ka dikhe.

⁵ Thaj čhudindoj e rupa ano hramo, iklilo, thaj đelo thaj umblavda pe.

⁶ A e anglunerašaja, lindoj e rupa, phenđe: Nane šukar len te čhiva ane hramoski hasna, kaj si molipe baš o rat.

⁷ Aj čerde svato ta ćinde baš lende e pirareski umal baše limora e durutnenge.

⁸ Odolese adaja umal vi akhardili Rateski umal đi avdive.

⁹ Teg pherdilo pe so si phendo prekal o profeto Jeremije savo vakerel: Thaj lije trijanda rupa, o molipe molipeutneso save molisarde e čhave e Izrailjesere;

¹⁰ Thaj dije len bašo umal e pirareski, sar so mange phenđa o Devljutno.

¹¹ A o Isus ačhilo anglal o regento, thaj phučlja le o regento vakerindoj: Tu li sijan o thagar e judejengo? A o Isus lese phenđa: Tu phene.

¹² Thaj kana le došarena o anglunerašaja thaj o phurederutne, khančik ni irisarda.

¹³ Teg lese phenđa o Pilat: Sar ni ašune kobor opipe tutar mothoven?

¹⁴ Thaj ni irisarda lese ni pe jekh lafi, ađahar kaj o regento barikanisajlo but.

¹⁵ A e Bare divese sine siklipe ano regento kaj e selorese te mukel po jekhe phandle save on mangena.

¹⁶ A teg sinelen phandlo pendžarutno po anav Varava.

¹⁷ Thaj kana ćedisajle, phenđa lenge o Pilat: Kas mangen tumenge te mekav? E Varava ja e Isuse akhardo Hristo?

¹⁸ Kaj džanda kaj le kotar o korovanipe dinde.

¹⁹ A kana bešela ane kriso, lese bičhalda vorba e romni lesiri vakerindoj: Ma hamisav tu khančik ano kriso odole čačutnesko, kaj avdive ano suno but mudardilem pašo leste.

²⁰ A e anglunerašaja thaj e phurederutne phukade e selore te roden e Varava, a e Isuse te xasaren.

²¹ A o regento irisarindoj phenđa lenge: Kas mangen akale dujendar tumenge te mekav? A on phenđe: E Varava.

²² Phenđa lenge o Pilat: So te čerav e Isuseja akhardo Hristos? Phenđe lese sare: Te inzarel pe!

²³ O regento pale phenđa: A savo džungalipe čerda? A on andar o krlo dije vika vakerindoj: Te inzarel pe!

²⁴ A kana dikhlja o Pilat kaj khančik ni mažutil, aj vađe pobaro vazdipe avel, lelja o pani thaj thovđa pe vasta anglo seloro vakerindoj: Me sem bidošalo ano rat akale čačutnesko; tumen ka dikhen.

²⁵ Thaj irisarindoj sa o seloro phenđe: O rat lesoro pe amende thaj pe amare čhave!

²⁶ Teg lenge meklja e Varava, a e Isuse, khuvindoj, dija te buhljarel pe.

²⁷ Teg e urumne e regentosere lije e Isuse ani krisuni thaj čedinde pe leste sa e četa urumnengi.

²⁸ Thaj huljavindoj ole, urjavde le purpuresko mantili.

²⁹ Thaj ćerindoj o venco e karendar, čhute lese ko šero, thaj dinđe lese trska ano čačuno vas; thaj perindoj pe čanga anglo leste, marena oleja muj vakerindoj: Sarsan, thagara judejengo!

³⁰ Thaj čhungarindoj pe leste, lije e trska thaj marena le po šero.

³¹ Thaj kana marde muj, uljavde lestar o mantili, thaj urjavdele ane fostanja lesere, thaj legarena te inzaren le.

Inzardipe

³² Thaj inklindoj arakhle e manuše andar e Kirina po anav Simon thaj tradle le te legarel lese o trušul.

³³ Thaj avindoj po than savo akharel pe Golgota, goda va: Than šeresoro kokalo,

³⁴ dije lese te pijel šut hamime ferasa, thaj lindoj ano muj ni manglja te pijel.

³⁵ A kana inzardele, ulavđe o šeja lesere frdindoj barbuti.

³⁶ Thaj beštine odothe thaj arakhena ole.

³⁷ Thaj čhute lese upral o šero e doš lesiri hramosardi: Akava si o Isus thagar e judejengo.

³⁸ Teg buhljarde oleja duje čoren, jekhe po čače thaj jekhe pe zervo rig.

³⁹ A save nakhena mahrinena pe leste ćerindoj ple šerencar.

⁴⁰ Thaj vakerindoj: Tu savo o hramo perave thaj baš o trin dive vazdole, ikal korkore tut; te sijan Čhavo e Devlesoro, uli e trušulestar!

⁴¹ A ađahar vi e anglunerašaja e lilvarnenca, e phurederutnenca thaj e Farisejenca telalasandoj vakerena:

⁴² E averen ikalđa a pes naštil te ikali. Te si thagar e Izrailjesoro, nek uljel akana e trušulestar, ta ka paća ano leste.

⁴³ Paćaja ano Devel, nek les inkalel akana, te si lese po kamipe; kaj vakerela: Me sem o Čhavo e Devlesoro.

⁴⁴ Ađahar pa vi e čora inzarde oleja marena lese muj.

⁴⁵ A kotar o šovto časo sas raći pe sa e phuv đi o časo enjato.

⁴⁶ A trujal o enjato časo, dija vika o Isus andar o sa krlo vakerindoj: Ili, Ili, lima savahtani? Goda va: Devla mleja, Devla mleja, sose mukljan ma?

⁴⁷ A nesave katar akala so ačhena odothe ašundoj adava vakerena: Akava akharel e Ilija.

⁴⁸ Thaj sigate prastandilo jekh kotar olendar ta lija e svonga, thaj pherda šutesa, ta čhuta pe trska, te dija le te pijel.

⁴⁹ A e aver vakerena: Mek te dikha ka avel li o Ilija ole te ikalel.

⁵⁰ A o Isus palem dija vika andar o sa krlo, thaj mekla o đi.

⁵¹ Thaj dikh, e pođa e hramoski pharavdili ko duj, kotar o upruno agor đi o teluno; thaj e phuv izdraja, thaj e bara čhordile;

⁵² Vi e limorja phravdile, thaj uštine but sumnale trupija save mule;

⁵³ Thaj iklindoj andar e limora po đivdisaripe lesko, đele ano sumnalo foro thaj mothodepe butenđe.

⁵⁴ A o kapetano thaj save oleja arakhle e Isuse, dićhindoj kaj e phuv izdraja thaj so sine, darandile but vakerindoj: Čače akava sine o Čhavo e Devlesoro.

⁵⁵ Thaj odothe sine thaj dikhena dural but đuvlja save đana palo Isus kotar e Galileja thaj kandena lese,

⁵⁶ maškar save sine e Marija Magdalina vi e Marija, e daj Jakoveski thaj e Josijinoski, thaj e daj e Zevedejevesere ćhavengiri.

E Isusesoro parunipe

⁵⁷ A kana sine raćate, avilo o manuš barvalo andar e Arimateja, po anav Josif, savo geja sine sikljovno e Isusesoro.

⁵⁸ Akava alo paše uzal o Pilat ruđisarda le baš o trupo e Isusesoro. Teg o Pilat vakerda te den lese o trupo.

⁵⁹ Thaj lindoj o Josif o trupo, paćarda le ano čaršafi khoslo.

⁶⁰ Thaj čhuta le ano plo nevo limori kaj čhindasa ano bar; thaj rupuzindoj baro bar po udar e limorestar, đelo.

⁶¹ A odothe sine e Marija Magdalina thaj e aver Marija, save bešena karing o limori.

⁶² Tajsadive pe paračuj čedisalje e anglunerašaja thaj e Fariseja koro Pilat

⁶³ vakerindoj: Barutnea, dijam amen godi kaj odova xoxamno phenđa vađe baš o đivdipe: Palo trin dive ka uštav.

⁶⁴ Odolese činosar kaj te sikadol o limori đi o trito dive te na aven sar e sikljovne lesere raćasa, te na čoren le thaj ni phenen e selorese: Uštino kotar e mule; thaj ka ovel o paluno xoxavdipe podžungalo e anglunestar.

⁶⁵ Phenđa lenge o Pilat: Isitumen o arakhavne, đan thaj čeren sar đanen.

⁶⁶ A on dželindoj sikade o limori e arakhavnenca thaj khuvde štambilji ko bar.