Evangelium e Matejestar 26 - Romski prevod Novog zaveta - Srbija

Garadino vakeripe opipe e Isusestar Makhlipe ani Vitanija O Juda dija muj

¹ Thaj kana dija agor o Isus sa e lafija akala, phenđa ple sikljovnenge;

² Đanen kaj ka baš o duj dive avel e Pasha, thaj o Čhavo e Manušesko ka ovel dindo te inzarelpe.

³ Teg čedinde pe e anglunerašaja thaj e lilvarne thaj e phurederutne e manušenge ani palata e anglunerašajeso po alav Kajafa;

⁴ Thaj phurederisajlje sar ka e Isuse ko xoxavipe te dolen thaj te mudaren.

⁵ Thaj vakarena: Aj na e bare đivesestar, kaj o seloro te na vazdel pe.

⁶ A kana o Isus sine ani Vitanija ano kher e Simonese e đeramnese,

⁷ ali uzalo leste e đuvli e alavastrosere vasosa kuć sungasa, thaj čhorda ko šero lesoro kana beštino baš o astalja.

⁸ A kana akava dikhle lesere sikljovne, čhudine vakerindoj: Sose akaja globa?

⁹ Kaj šaine akaja sung te bićindol pe kuć thaj te del pe e čororenge.

¹⁰ A haljarindoj o Isus phenđa lenge: Sose azbaven e đuvlja? Oj čerda lačho kotor pe mande.

¹¹ Kaj e čororen isi tumen sajekh tumencar, a man najtumen sajekh.

¹² A oj ćhorindoj e sung akaja po trupo mlo, čerda odova bašo mlo praxope.

¹³ Čače tumenge phenav: Kaj god vakarel pes akava evangelium po sa o them, ka phenel pe baš liparipe lako thaj akava so voj čerda.

¹⁴ Teg jekh e dešudujendar, po anav Juda Iskariotsko, đelo e anglunerašajenge,

¹⁵ thaj phenđa: So ka den mange thaj me tumenge ka dav le muj? A on lese pašljarde trijanda rupa.

¹⁶ Thaj kotar teg rodela lačho vaxto te del le muj.

Garavdo xape

¹⁷ A ano angluno dive e bimavajake marengo, pašile e sikljovne e Isusese vakerindoj lese: Kaj mange te lačhara tuke te xas e Pasha?

¹⁸ A ov phenđa: Đan an foro odova thaj odova, thaj phenen lese: O Sikamno phenel: O vaxto si mlo paše, ke tute ka čerav e Pasha mle sikljovnencar.

¹⁹ Thaj e sikljovne čerde sar lenge vakerda o Isus, thaj lačharde e Pasha.

²⁰ A kana sine raći, bešlo baš o astali e Dešudujore sikljovnenca.

²¹ Thaj đikaj xana phenđa lenge: Čače tumenge phenav: jekh tumendar ka del ma muj.

²² Thaj dukhavindoj but, lija lese sako lendar te vakerel: Te najsem me, Devljutneja?

²³ A ov irisarindoj phenđa: Savo bolel mancar po vas ano čaro odova ka del ma muj.

²⁴ O Čhavo e Manušesko, akana, đal sar so si hramome baš leske; aj pharipe odole manušeske savo del muj e Čhave Manušesere; polačhe ka ma ovel lese te na bijanđol odova manuš.

²⁵ A o Juda, dinde mosoro lesoro, irisarindoj phenđa: Te najsem me, Sikamneja? Phenđa lese: Tu phendan!

²⁶ Thaj kana xale, lija o Isus maro thaj baxtarindoj phaglja le, ta dela e sikljovnenge, thaj phenđa: Len, xan; akava si o trupo mlo.

²⁷ Thaj lija e taxtaj ta baxtarindoj dija lenge vakerindoj: Pijen andar late sare;

²⁸ Kaj akava si o rat mlo e Neve xapesovljako savo čhordol baš butenge bašo mukipe e bezehengo.

²⁹ Phenav tumenge kaj akanatar ni ka pijav akava bijanipe e drakhalinako đi odova dive kana ka pijav tumenca nevo ano Thagaripe mle Dadesoro.

Mothovipe e Petresere cidimnastar thaj ruđipe ani Getsimanija

³⁰ Thaj đilabindoj e naisuni, iklile pe Maslinsko plajin.

³¹ Teg lenge phenđa o Isus: Sare tumen ka peravđoven mandar akaja rat; kaj ano Lil terđol: „Ka khuvav e čobano, thaj e gramada e bakrengiri ka našen pes.”

³² A po đivdinisaripe mlo ka đav anglal tumende ani Galileja.

³³ A o Petar irisarindoj phenđa lese: Te sare peravenpe tutar, me ni ka nisar peravama.

³⁴ Phenđa lese o Isus: Čače tuke phenav: Erat, anglal so ka o bašno đilabel, trin droma ka muke man.

³⁵ Phenđa lese o Petar: Ni ka mukav tut te šaj vi te merav tuja! Ađahar phenđe vi sare e sikljovne.

³⁶ Teg o Isus avilo lenca ano than savo akharel pe Getsimanija, thaj phenđa e sikljovnenge: Bešen akate đikaj me đav odori te ruđivma e Devlese.

³⁷ Thaj lindoj e Petre thaj solduj čhaven e Zevedejeveseren, lija te peravelpe thaj te dukhavel pe.

³⁸ Teg lenge phenđa o Isus: Peravdo si o ođi mlo đi o meripe; ačhen akate thaj džangadon manca.

³⁹ Thaj đapeindoj zala, pelo po muj plo ruđindoj thaj vakerindoj: Dade mleja, te si šajine, nek nakhavel man e taxtaj akaja; aj palem na sar me mangav, aj sar tu!

⁴⁰ Thaj avindoj e sikljovnenge, arakhlja len kaj soven, thaj phenđa e Petrese: Sar naštine jekh časo džangavde te oven mancar?

⁴¹ Džangavdon thaj ruđin tumen kaj te na peren ano peripe; kaj si o đi zoralo, aj o trupo si bizoralo.

⁴² Palem vi o dujto drom đelo thaj ruđisajlo pe vakerindoj: Dade mleja, te naštine te nakhavel man akaja taxtaj kaj te na pijav la, nek ovel o kamipe tiro.

⁴³ Thaj avindoj arakhlja len pale kaj soven; kaj lenge jakha sine but phare.

⁴⁴ Thaj meklindoj len, đelo palem ta o trito drom ruđisajlo vakerindoj odola jekhune lafija.

⁴⁵ Teg alo ple sikljovnenge thaj phenđa lenge: Pana soven thaj torđon! Ake alo o časo, thaj o Čhavo e Manušesko dindol ano vasta e bezahenge.

⁴⁶ Ušten, džaja! Ake, alo paše mlo dindine mosoro.

⁴⁷ Thaj đikaj ov vađe ađahar vakerela, dikh, o Juda, jekh kotar e Dešudujore, avilo, thaj lesa manuša but čhurjenca thaj buzenca kotar e anglunerašaja thaj phurederutne e selorestar.

⁴⁸ A lesoro dinde mosoro dija len semno vakerindoj: Kas me čumidav, odova si; dolen le.

⁴⁹ Thaj sigate alo paše e Isusese thaj phenđa: Sar sijan, Sikamneja! Thaj čumidlja le.

⁵⁰ A o Isus lese phenđa: Amala, ano odova li avilan? Teg ale paše, čivđe pe vasta po Isus thaj dolinde le.

⁵¹ Thaj dikh, jekh katar odola, save sine e Isuseja, ćerindoj e vasteja, ikalda pli čhuri ta khuvđa e kandine e anglunerašajesere, thaj čhinda lesoro kan.

⁵² Teg lese phenđa o Isus: Irin e čhuri tiri pe lako than; kaj sare save dolenape ki čhuri, kotar e čhuri ka mudarđon.

⁵³ Ja deja godi kaj našti te ruđisarav akana e Dade mle te bičhalel mange najbut kotar e dešuduj legionja phakale?

⁵⁴ Sar ka ma, akana, pherdona e Lila kaj ađahar trubul te ovel?

⁵⁵ An odova časo phenđa o Isus e manušenge: Sar upro čor iklistijen čhurjenca thaj buzenca te dolen man, a sako dive tumende bešljum sikavindoj ano hramo, thaj ni dolinđen man.

⁵⁶ A akava sa sine kaj te pherđon o Lila e profetosere. Teg sa lesere sikljovne ačhavde le thaj našle.

O Isus anglal o sinedriono E Petresoro čidipe

⁵⁷ A okola so dolinde e Isuse legarde le e anglunerašajese o Kajafa, kote o lilvarne thaj e phurederutne čedindepe.

⁵⁸ A o Petar đala palo leste dural đi e avlin e anglunerašajesiri thaj đerdindoj andre bešlo e kandinenca te dikhel o agorisaripe.

⁵⁹ A e anglunerašaja thaj e phurederutne thaj sa o sinedriono rodena xoxamne mothojba kotao o Isus te bi le mudarena,

⁶⁰ thaj ni arakhle; thaj vi but xoxamne mothoutne avena, ni arakhle. Najpalal avile duj xoxamne mothoutne.

⁶¹ Thaj phenđe: Ov phenđa: Me šaj te peravav o hramo e Devlesoro thaj baš o trin dive te vazdav le.

⁶² Thaj uštindoj o anglunorašaj phenđa lese: Sar khanči ni irisare so akala opipe tutar mothoven?

⁶³ A o Isus trajinela. Thaj o anglunorašaj irisarindoj phenđa lese: Dav tut sovel e đivde Devleja amenge te phene injan li tu o Hristos, o Čhavo e Devlesoro?

⁶⁴ Phenđa lese o Isus: Tu phendan. Aj me tumenge phenav: oto akana ka dikhen e Čhave Manušesere kaj bešel pe čači rig e Zorako thaj avel pe nuvere e badaleske.

⁶⁵ Teg o anglunorašaj pharada e šeja ple vakerindoj: Akošel upro Devel! So amenge maj trubun e mothoutne. Eke akana ašunden o akošipe lesoro.

⁶⁶ So den godi? A on irisarindoj phenđe: Therisarda meripe.

⁶⁷ Teg čhungarde lesoro muj thaj khuvena le, a e avera marena le pe čhama.

⁶⁸ Vakerindoj: Anglalmothov amenge, Hristo, ko khuvđa tu?

⁶⁹ A o Petar bešela avri ani avlin, thaj ali paše leste jekh kandini vakerindoj: Thaj em tu injanle e Isuseja e Galilejcoa.

⁷⁰ A ov ćhudla anglal savorende vakerindoj: Ni đanav so vakere.

⁷¹ Thaj kana iklistilo ke udara, dikhlja le aver thaj phenđa odolenge kaj sine odothe: Vi akava sine e Isuseja e Nazarećanineja.

⁷² Thaj palem ćhudla pes e sovljasa: Ni đanav odole manuše.

⁷³ A hari pale odova ale paše odola kaj ačhena thaj phenđe e Petrese: Hemčače vi tu san lendar; kaj vi o vakeripe tiro dela muj.

⁷⁴ Teg lija te ruđil thaj xal sovli kaj ni đanel odole manuše. Thaj sigo đilabda o bašno.

⁷⁵ Thaj liparda o Petar e lafija e Isusesere kaj lese phenđa: Đikaj o bašno ni đilabel, trin drom ka čhudes tu mandar. Thaj inklindoj avrijal, čerkipna runđa.