Evangelium e Matejestar 25 - Romski prevod Novog zaveta - Srbija

Deš ćhaja

¹ Atoska ka ovel o Thagaripe e badalesko sar deš ćhaja save lije ple lampe thaj inklile ano malavipe e unsurutneske.

² A pandž lendar sesa gođaver thaj pandž diline.

³ Kaj e diline, lindoj e lampe ni lije pesa o ulje.

⁴ A e gođaver lije o ulje ane vasore ple lampenca.

⁵ A avune kaj o unsurutno ačhilo palal, pašlile sare, thaj zasute.

⁶ A ani ekvaši rat dije vika: Ake o unsurutno avel, inkljen leske ano malavipe.

⁷ Atoska uštile sa e ćhaja godola thaj prašukarde e lampe ple.

⁸ A e diline phende e gođovarenge: Den amenge katar tumaro ulje, kaj amare lampe aćhadon.

⁹ A e gođaver irisarde vakerindoj: Kaj te na ovela vi amenge vi tumenge, majlačhe đan e bikinutnenge thaj kinen tumenge.

¹⁰ A kana von đele te kinen, avilo o unsurutno, thaj e gatime dije lesa ko bijav, thaj phandle o udar.

¹¹ A pala godova avile vi okola aver ćhaja vakerindoj: Barutnea, Barutnea! Phrav amenge.

¹² A ov irisarindoj phenđa lenge: Čače tumenge phenav, ni penđarav tumen.

¹³ Arakhen, akana, kaj ni đanen o dive ni časo ano savo ka avel o Čhavo e Manušesko.

E talantija

¹⁴ Kaj sar o manuš đapeindoj ko drom akharda e kandinen plen thaj dija lenge o barvalipe plo;

¹⁵ Thaj jekheske dija pandž talantija, a e avereske duj, a e tritoneske jekh, savoneske karing leski zor; thaj sigo đelo.

¹⁶ A godova so lija pandž talantija đelo thaj čerda buti lenca, thaj lija pana pandž talantija.

¹⁷ Ađaar vi godova so lija duj, lija vi ov pana duj.

¹⁸ A savo lija jekh, đelo ta les handlja ani phuv thaj garada o rup ple barutnesko.

¹⁹ A palo bute vaxto avilo o barutno akale kandinengo, thaj ačhilo te dikhel o đenipe lenca.

²⁰ Thaj alo paše godova so lija pandž talantija, anda pana pandž talantija vakerindoj: Barutnea, dijan mange pandž talantija; ake pana pandž talantija save lijem lenca.

²¹ A o barutno lesko phenđa leske: Lačhe, kandineja laćheja thaj paćavneja, ano ari sana paćivalo, upral butuno ka ćhuvav tut; de ano lošalipe ple barutnesko.

²² A paše alo vi okova so lija duj talantija thaj phenđa: Barutnea, dijan man duj talantija; ake pana duj talantija save lijem lenca.

²³ A o barutno lesko phenđa leske: Lačhe, kandineja laćheja thaj paćavneja, ano ari sana paćivalo, upral butuno ka ćhuvav tut; de ano lošalipe ple barutnesko.

²⁴ A paše alo vi godova so lija jekh talanti thaj phenđa: Barutnea đangljem kaj san tu zoralo manuš: ćhine kaj ni sijisardan, thaj cide kaj ni vijisardan.

²⁵ Ta darajlem thaj dželem garadem o talanti tiro ani phuv; thaj ake tuće tiro.

²⁶ A o barutno lesko irisarindoj phenđa leske: Đungalo thaj bibućarno kandino, džanglan kaj čhinav kaj ni sijisardem, thaj čidav kaj ni vijisardem.

²⁷ Trubuja godoleske mlo rup te de e paruvutnenge; thaj avindoj, me ka lav mle therimasa.

²⁸ Len, akana, lestar o talanti, thaj den godoleske so sile deš talantia.

²⁹ Kaj sakoneske savo isile ka del pes, thaj ka nakhavel leske; a katar godova savo najlje, thaj so isile ka lel pes lestar.

³⁰ A e bilaćhe kandine čhuden ano phandipe najpaluno; gothe ka ovel rovipe thaj krcope e dandengo.

Krisuno dive

³¹ A kana avilo o Čhavo e Manušesko ano ašundipe plo thaj sa e sumnale phakale lesa, atoska ka bešel pe skamin ple ašundimaski.

³² Thaj ka kiden pes anglal leste sa e selore, thaj ka ulavel len jekh averendar sar o čobano so ulavel e bakren e buznjendar.

³³ Thaj ka čhuvel e bakren pe čači rig peske, a e buznjen pe uči rig.

³⁴ Atoska ka phenel o Thagar godolenge so leske ačhen pe čači rig: Oven baxtarde mle Dadeske; len o Thagaripe savo si tumenge gatime katar o čerdipe e themesko.

³⁵ Kaj bokhajlem, thaj dijen man te xav; trošajlem, thaj dijen man te pijav; duralutno sema, a lijen man;

³⁶ Nango sema, thaj uravđena man; nasvalo sema, thaj dikhljardena man; ano phandipe sema, thaj avilen mande.

³⁷ Atoska ka irisaren leske e čačutne vakerindoj: Barutnea, kana dikhlam tut bokhale, thaj parvardam? Ja trošale, thaj dijam te pije?

³⁸ Kana li dikhlam tut duralutne, thaj lijam? Ja nange, thaj uravdam?

³⁹ Kana li dikhljam tut nasvale ja ano phandipe, thaj avilam tuke?

⁴⁰ Thaj irisarindoj o Thagar ka phenel lenge: Čače tumenge phenav: kana čerden jekheske katar akala mle najcikne phrala, mange čerden.

⁴¹ Atoska ka phenel vi godolenge kaj ačhen pe uči rig: Đan mandar, armandine, ani jag biagorimaski savi si gatime e bengeske thaj leske phakalenge.

⁴² Kaj bokhajlem, thaj ni dijena man te xav; trošajlem, thaj ni dijena man te pijav;

⁴³ Duralutno sema, thaj ni lijena man; nango sema, thaj ni uravdena man; nasvalo thaj ono phandipe sema, thaj ni dikhljardena man.

⁴⁴ Atoska leske ka irisaren thaj von vakerindoj: Devljutneja, kana dikhlam tut bokhale ja trošale, ja duralutne ja nange, ja nasvale ja ano phandipe, thaj ni kandljam tuke?

⁴⁵ Atoska lenge ka irisarel vakerindoj: Čače tumenge phenav: kana ni čerden jekheske katar akala najcikne, ni mange ni čerden.

⁴⁶ Thaj akala ka đan ano pharipe bimerimasko a e čačutne ano đivdipe e bimerimasko.