Evangelium e Matejestar 23 - Romski prevod Novog zaveta - Srbija

Baro vakeripe e lilvarnenge thaj e Farisejenge

¹ Atoska o Isus phenđa e selorese thaj ple sikljovnenge

² vakerindoj: Pe Mojsijeski bešavni bešle e lilvarne thaj e Fariseja.

³ Sa, akana, so tumenge phenen te ikeren, ikeren thaj čeren; aj pe kotora lenge ma đan, kaj vakeren a ni čeren,

⁴ aj phanden e dreza phare thaj bilaćhe baš inđarimaske thaj ladaven po dumo e manušenge, ple najesa ni te mišin len.

⁵ A sa e kotora tire čeren te dikhen len e manuša; kaj buljaren e amajlije pire thaj čeren baro res pe tire fostanja.

⁶ Thaj kamen palune thana pe bijava thaj anglune thana pe sinagoge.

⁷ Thaj lenge te banđol pes pe trgura, thaj e manuša te akharen len: sikamneja!

⁸ A tumen ma te akhardon sikamne; kaj si ana tumende jekh Sikamno, o Hristos, a tumen sen savore phrala.

⁹ Thaj tumare dadesa, ma akharen khanika ki phuv; kaj si ana tumende jekh Dad, savo si pe badalura.

¹⁰ Ni ma te akharen tumen sikavutne; kaj si ana tumende jekh Sikavutno, o Hristos.

¹¹ A o najbaro maškaro tumende te ovel tumenđe kandino.

¹² Kaj savo vazdel pes ka teljarel pes, a savo teljarel pes ka vazdel pes.

¹³ Pharipe tumenge lilvarnalen thaj Farisejalen, e dujemujenge, kaj phandena o Thagaripe e badalesko anglal o manuša; kaj ni tumen den andre, ni na muken te den godola save ka mangen.

¹⁴ Pharipe tumenge lilvarnalen thaj Farisejalen, e dujemujenge, kaj xana o khera e phivljenge, thaj xoxamne ruđin tumen but; godoleske ka oven majbut krisime.

¹⁵ Pharipe tumenge lilvarnalen thaj Farisejalen, e dujemujenge, kaj phiren o derav thaj e phuv zalo derav kaj te lena jekhe sikljovne, thaj kana len les, čeren les ćhavesa e bengenge jagasa duj droma pobare katar tumendar.

¹⁶ Pharipe tumenge, e korore sikamnenge, save vakeren: Te ko xalpes sovli e hramosa, godova naj khanči; a ko xalpes sovli e hramoske sumnajesa, bango si.

¹⁷ Bigođakere thaj kororalen! Kaj so si majbaro: o sumnakaj ja o hramo savo o sumnakaj sumnalil?

¹⁸ Thaj te ko xal sovli viktimutnesa, khanči si godova, a savo xal sovli davimasa pe leste, bango si.

¹⁹ Bigođakere thaj kororalen! Kaj so si majbaro: o davipe ja o viktimutno savo o davipe sumnalil?

²⁰ Savo, akana, xal sovli e viktimutnesa, xal sovli lesa thaj sa so si pe leste.

²¹ Thaj savo xal sovli e hramosa, xal sovli lesa thaj Godolesa savo trail ano leste.

²² A savo xal sovli badalesa, xal sovli skaminasa e Devleski thaj Godolesa savo bešel pe late.

²³ Pharipe tumenge lilvarnalen thaj Farisejalen, e dujemujenge, so den dešoro katar e menta thaj katar e kopra thaj katar e kima, a mekena so si najtrubune ano Kriso: o čačipe thaj mila thaj paćape; a akava trubuja te čerela pe thaj ovate na mukela pe.

²⁴ E hulajeske korore, save stranđin e cincare a e deva xandžvaren.

²⁵ Pharipe tumenge lilvarnalen thaj Farisejalen, e dujemujenge, kaj khosen avral e taxtaja thaj o čaro, a andral si pherde istaripe thaj bičačipe.

²⁶ Farisejo kororeja, khos najanglal andral e taxtaja thaj o čaro, te oven vi avral khosle.

²⁷ Pharipe tumenge lilvarnalen thaj Farisejalen, e dujemujenge, so sijen sar makhle limora, save avral dićhon šuže, a andre si pherde kokala mulikane thaj sakoj bikhoslimata.

²⁸ Ađaar vi tumen: avral mothoven tumen e manušenge čačune, a andral sen pherde dujemujimata thaj bikrisimata.

²⁹ Pharipe tumenge lilvarnalen thaj Farisejalen, e dujemujenge, kaj vazden limora e profetonge thaj prašukaren e bara čačutnenge.

³⁰ Thaj vakeren: Kaj amen te ova ano vaxto amare dadengo, na bi lencar aćhova ano rat e profetosko.

³¹ Godolesa korkore mothona baš tumenge kaj sen čhave godolengere save mudarde e profetonen.

³² Pheren vi tumen e mera tumare dadengi.

³³ E sapa, thaj bijanimata e aspidinenge, sar ka našen katar o krisipe baše bengengi jag?

³⁴ Godolese, ake, me ka bičhalav tumenge e profetonen thaj e bižajutnen thaj e lilvarnen; thaj tumen jekhen ka mudaren thaj buljaren, a e averen ka maren pe tumare sinagoge thaj ka traden katar o foro đi o foro;

³⁵ Te avel pe tumende sa o rat čačuno kaj si ćhordo pe phuv katar o rat e Aveljesko čačunesko đi o rat e Zaharijesko čhavo e Varahijinosko, save mudarden maškar o hramo thaj viktimutno.

³⁶ Čače tumenge phenav kaj sa akava ka avel po bijanipe akava.

³⁷ Jerusalime, Jerusalime, savo mudare e profetonen thaj ućhare barenca e bičhalden tuke, kobor droma mangljem te čidav e čhavoren tiren, sar so e khani čidel e pujen piren telal o phaka, thaj ni mangljen!

³⁸ Eke tumenge ka ačhol o kher tumaro čučo.

³⁹ Kaj tumenge phenav: Ni ka dikhenma akanatar đikaj ni phenen: Baxtarimo savo avel ano anav e Devljutnesko.