Evangelium e Matejestar 22 - Romski prevod Novog zaveta - Srbija

E bijavesoro xape

¹ Thaj irisarindoj o Isus palem lenge phenđa ano paramiča vakerindoj:

² O Thagaripe e badalesko si sar manuš o thagar, savo čerda bijav ple ćhaveske.

³ Thaj bičhalda e kandinen plen te akharen e manušen ko bijav; thaj ni mangle te aven.

⁴ Palem bičhalda avere kandinen vakerindoj: Phenen e akhardenge: Ake o xape mlo gatisardem, e guruva mle thaj e parvarutne čhinde si, thaj sa si gatime: aven ko bijav.

⁵ A on na hajindoj đele, akava ani umal pli, a okova ani trgovina pli;

⁶ A e avera astarde e kandinen leske, akušle len, thaj mudarde.

⁷ Thaj kana godova šunda o thagar okova, xoljardilo thaj bićhalindoj e urumna pla, xasarda e ratvalen godolen, thaj o foro lengo phabarda.

⁸ Atoska phenđa e kandinenge pirenge: O bijav si gatimo, a e akharde najsesa paćivale.

⁹ Đan, akana, pe trušulime droma thaj kas araćhen, akharen len po bijav.

¹⁰ Thaj iklindoj e kandine godola pe droma, ćidle sa saven arakhle, vi e džungalen vi e laćhen; thaj pherdili e bijaveski palata gostura.

¹¹ A dindoj andre o thagar te dikhel e gostonen, dikhla gothe e manuše biuravdo ane bijaveske šeja.

¹² Thaj phenđa leske: Amala, sar dijan akate bi bijaveske šeja? A ov traini.

¹³ Atoska phenđa o thagar e kandinenge: Phanden leske vasta thaj e pre, ta len les thaj čhuden ano phandipe majpaluno; gothe ka vel rovipe thaj krcope e dandengo.

¹⁴ Kaj si but akharde, aj si zala alosarde.

Pokinipe e haračesko

¹⁵ Atoska đele e Farisaja thaj po čidipe čerde vorba sar te astaren les ano lafi.

¹⁶ Thaj bićhalde leste e sikljovnen plen e Irodovcenca, vakerindoj: Sikamneja, đana kaj san čačutno thaj pe drom e Devlesko čače sikave thaj ni dikhe ni pe kaste, kaj ni dikhe ko si ko e manušendar.

¹⁷ Phen amenge, akana, so tu deš godi: trubul li te da harači e thagareske ja na?

¹⁸ Haljarindoj o Isus bižajipe lengo phenđa: So zumavena man, dujemujengere?

¹⁹ Sikaven mange e love e haračeske. A on leske ande dinari.

²⁰ Thaj phenđa lenge: Kasko si akava muj thaj hramope?

²¹ Phende leske: E Thagaresko. Atoska lenge phenđa: Den, akana, e thagaresko e thagareske, thaj e Devlesko e Devleske.

²² Thaj ašundoj aćharhisajle thaj meklindoj les đele.

Katar o đivdinisaripe e mulengoro

²³ Ano godova jekto dive ale paše leske e sadukeja, save vakeren kaj naj đivdinisaripe, thaj phučle les

²⁴ vakerindoj: Sikamneja, o Mojsije phenđa: Te mulo ko bi ćhavorengo, te lel o phral lesko e romnja leskera thaj te vazdel e kučin ple phraleske.

²⁵ An amende sasa efta phrala; thaj o angluno unsurindoj mulo, thaj najsa les bijanipe, meklja e romnja pla ple phraleske.

²⁶ Thaj ađaar vi o dujto, vi o trito, sa đi o eftato.

²⁷ A pala sarijende muli vi e romni.

²⁸ E đivdinisarimastar, akana, saveski katar o efta ovel romni? Kaj baš sarijenca sine.

²⁹ A o Isus irisarindoj phenđa lenge: Xoxadon, nađanglindoj e Lila ni e zor e Devleski.

³⁰ Kaj e đivdinisarimastar ni ka unsurin pes ni ka len pes, aj si sar phakale e Devleske po badali.

³¹ A baš đivdinisaripe e mulengo ni drabarden li so tumenge phenđa o Devel vakerindoj:

³² Me sem Devel e Avraamosko, thaj Devel e Isakosko, thaj Devel e Jakovesko? O Devel naj Devel e mulengo, aj e đivdengo.

³³ Thaj e manuša ašundoj barjona lengere vile leske džanglipastar.

Najbaro čhinadipe

³⁴ A e Fariseja ašundoj kaj phandla o muj e sadukejengo, čidisajle kethane.

³⁵ Thaj phučla jekh katar lende, o krisi, zumavindoj les thaj vakerindoj:

³⁶ Sikamneja, savo si čhinadipe najbaro ano Krisi?

³⁷ A o Isus leske phenđa: Čumid e Devljutne e Devle tire sa tire vilesa, thaj sa tire vođesa, thaj sa tire gođasa.

³⁸ Akava si angluno thaj najbaro čhinadipe.

³⁹ A o dujto si sar vi akava: Čumid e najpašune tire sar korkoro pes.

⁴⁰ Katar akala duj ćhinadimata umblaldol soro Krisi thaj e Profetura.

O Mesija – E Davidesoro čhavo thaj o Devljutno

⁴¹ A kana čidinisajle e Fariseja, phučla len o Isus

⁴² vakerindoj: So den godi baš o Hristo? Kasko si čhavo? Phende leske: E Davidosko.

⁴³ Phenđa lenge: Sar, akana, o David les ano Đi akharel Devljutnesa vakerindoj:

⁴⁴ Phenđa o Devljutno e Devljutneske mleske: Beš mange pe daxni rig, đikaj pašljarav e dušmajen tiren baš o fundo tire prenđe?

⁴⁵ Kana, akana, o David akharel les Devljutnesa, sar si lesko čhavo?

⁴⁶ Thaj khonik leske naštine te irisarel ni lafi; ni na tromanđa ko katar godova dive te phučel les maj.