Evangelium e Matejestar 21 - Romski prevod Novog zaveta - Srbija

O Mesija đerdini ano Jerusalim

¹ Thaj kana ale paše e Jurusalimoske thaj avile ano Vitfago karing e Maslinoski plajin, napal o Isus bičhalda duje sikljovnen.

² Vakerindoj lenge: Đan ano gav kaj si karing tumende, thaj sigo ka arakhen e hernja phandli thaj e here lasa; phravenla thaj anenla maj.

³ Thaj te tumenge ko vakerel so, phenen kaj on trubun e Devljutneske; thaj sigo ka bićhalen len.

⁴ A akava sasa sa kaj te pherol pes so si phendo prekal o profeto savo vakerel:

⁵ Phenen e ćhejake e Sionovake: Ake o Thagar ćiro đal tuke kovlo, thaj inklel pe herni, thaj po her, ternoro ladavimasko đuvdinutno.

⁶ A e sikljovne đele thaj čerde sar lenge so vakerda o Isus.

⁷ Ande e hernja thaj e here, thaj čhute pe lende o fostanja ple, thaj bešlo pe lende.

⁸ A o seloro but đene buljarde o fostanja ple po drom, a e avera čhinena e krangore katar e kašta thaj buljarena po drom.

⁹ A o seloro, savo đala anglalo leste thaj palo leste, dena vika vakerindoj: Osana e Ćhaveske e Davidosko! Baxtardo savo avel ano alav e Devljutnesko! Osana po ućipe!

¹⁰ Thaj kana ov dija ano Jerusalim, darandilo soro foro vakerindoj: Ko si godova?

¹¹ A o seloro vakerda: Akava si o Isus, profeto andar o Nazaret e Galilejosko.

¹² Thaj dija o Isus ano hramo e Devlesko, thaj tradla sarijen save bikinena thaj kinena ano hramo, thaj perada e astala godolenge kaj arćhinena e love, thaj e bešalde godolenge so bikinena golubura.

¹³ Thaj phenđa lenge: hramome si: O kher mlo – kher ruđipasko nek akharel pes; a tumen čerden lestar barastuni xuv čorengi.

¹⁴ Thaj ale paše leske e bange thaj e korore ano hramo, thaj sastarda len.

¹⁵ A kana dikhle e anglunerašaja thaj e lilvarne sikavimata save čerda, thaj e čhavoren kaj dena vika ano hramo thaj vakeren: Osana e Ćhaveske e Davidosko, xolisajle pes.

¹⁶ Thaj vakerde leske: Ašune li so akala vakeren? A o Isus lenge phenđa: Va! Sar nisar ni drabarden: Andar e muja e ćhavorenge thaj so pijen čuči ćerdan tuke ašardipe?

¹⁷ Thaj meklindoj len, inklilo avral andar o foro, ani Vitanija, thaj raćarda odothe.

¹⁸ Sabajle irindoj ano foro bokhajlilo;

¹⁹ Thaj dićhindoj e sumučilin jekh pašo drom avilo lake, thaj ni arakhla pe late khanči sem patra, thaj phenđa lake: Kaj nisar te na ovel tutar bijanipe đi šelberšipe! Thaj sigo šućarda pes e sumučilin.

²⁰ Thaj dićhindoj goda e sikade divinde pes vakarindoj: Sar sigo šućarda e sumučilin!

²¹ A o Isus irisarindoj phenđa lenge: Čače tumenge phenav: Te isi tumen paćape thaj ni sungan, ka čeren na numa so ćerdilo pe e sumućilinasa, aj vi e plajinake akalake te vakerden: vazd tut thaj čhud tut ano derav, ka ćerdol pes.

²² Thaj sa so roden ano ruđipe paćavindoj, ka len.

E Isusesoro baroderipe

²³ Thaj kana dijas ano hramo thaj ačhilo te sikavel, ale paše leske e anglunerašaja thaj e phurederutne e selorenge vakerindoj: Save barederimasa godova ćere? Thaj ko tut dija godova baroderipe?

²⁴ A o Isus irisarindoj phenđa lenge: Vi me tumen ka phućav jekh lafi, savo te phenden mange, vi me tumenge ka phenav save barederimasa akava čerav.

²⁵ Bolipe e Jovanosko kotar sasa? E badalestar, ja e manušendar? A on dije godi ana peste vakerindoj: Te phendam: e badalestar, ka phenel amenge: Sose oleske, tad, ni paćajen?

²⁶ A te phendam: e manušendar, dara e selorestar; kaj savore e Jovano inćaren baš o profeto.

²⁷ Thaj irisarindoj e Isusoske phende: Ni đana. Phenđa vi ov lenge: Ni me tumenge na phenav save barederimasa akava čerav.

Duj čhave

²⁸ A so tumenge ćerel pes? O manuš jekh sinele duj čhave, thaj avindoj e angluneske phenđa: Ćhaveja, đa avdive ćer buti an mli drakhalin.

²⁹ A ov irisarindoj phenđa: Na! Thaj pala godova dukhardilo thaj đelo.

³⁰ Thaj alo paše avereste phenđa pale ađaar. A ov irisarindoj phenđa: Mangav, barutnea! Thaj ni đelo.

³¹ Kova si akale dujendar čerda o kamipe e dadesko? Vakerde leske: O Angluno, Phenđa lenge o Isus: Čače tumenge phenav kaj e šulkara thaj e anglačumdlja anglal tumendar ka den ano Thagaripe e Devlesko.

³² Kaj tumenge avilo o Jovan čačune dromesa, thaj ni paćajen leske; a e šulkara thaj e anglačumidlja paćaje leske; a tumen dićhindoj godova, ni jertisaden tumen atoska te paćaven les.

Džungale drakhalinara

³³ Aver paramiči šunen: Sasa o manuš kherutno savo sijisarda drakhalina thaj barada les barasa, thaj handlja ano leste pivnica, thaj čerda kula, thaj dija les e drakhalinarenge, thaj đelo.

³⁴ A kana alo paše o vaxto e ćidimasko, bičhalda e kandinen plen e drakhalinarenge te len o bijanipe lesko.

³⁵ Thaj e drakhalinara, astarindoj e kandinen leskeren, jekhe marde, a jekhe mudarde, a jekhe barenca čhudle.

³⁶ Palem bičhalda avere kandinen, majbut katar anglal, thaj čerde lenge ađaar pale.

³⁷ A majpalal bićhalđa lenge e čhave ple vakerindoj: Ka lađan mle čhavestar.

³⁸ A e drakhalinara dićhindoj e čhave, phende maškar peste: Akava si o avutno pe lesko than; phiren te mudara les, thaj te las o barvalipe lesko.

³⁹ Thaj astarde les, ta inkalde le avral andar e drakhalina, thaj mudarde le.

⁴⁰ Kana, akana, avela o barutno e drakhalinengo so ka ćerel e drakhalinarenge godolenge?

⁴¹ Vakerde leske: E đungalećerutnen đungale merimasa ka mudarel, a e drakhalina ka del avere drakhalinarenge, save leske ka den bijanipe ano plo vaxto.

⁴² Phenđa lenge o Isus: Sar nisar ni drabarden ano Lil: O bar savo čhudle o duvarđije, godova ulo šero e xinzatar; godova si e Devljutnestar thaj prašukar si ane amare jakha.

⁴³ Godolese tumenge phenav kaj tumendar ka lel pes o Thagaripe e Devlesko, thaj ka del pes e selorese savo anela bijanipe leske.

⁴⁴ Thaj kon perel pe akav bar, ka phagel pes; a pe kaste ov perel, ka xurdarel les.

⁴⁵ Thaj ašundoj e anglunerašaja thaj e Fariseja e paramiča leske, haljarde kaj lendar vakerel.

⁴⁶ Thaj zumavindoj te astaren les, darajle e selorestar, kaj inćarena les baš o profeto.