Evangelium e Matejestar 2 - Romski prevod Novog zaveta - Srbija

Peripe pe čanga e gođavarengo

¹ A kana o Isus bijandilo ano Vitlejem judejsko ano dive e Irodose e thagarese, dikh, ale e gođavarutne kotar o Istok ano Jerusalim thaj vakerde:

² Kaj si o thagar e judejesko savo bijandilo? Kaj dikhljam lesiri čeren ko Istok thaj avilam lese te pera ko čanga.

³ Kana odova šunda o thagar Irod, darandilo, thaj sa o Jerusalim oleja.

⁴ Thaj ćidindoj sa e anglunerašajen thaj e lilvarnen e manušengeren, phučlja len kaj ka o Hristos bijanđol.

⁵ A on vakerde: Ano Vitlejem judejesko; kaj ađahar o profeto ramosarda:

⁶ Thaj tu Vitlejemo, phuvone Judengiri, ni pe soste naj san najcikno maškar e knezura Judeskere; kaj andar tute ka ikljol Legavno savo ka ćaravel e selore mle e Izrailjesere.

⁷ Atoska o Irod, garandoj thaj akharindoj e gođavarutnen, đangla lendar kana mothovdili e čeren.

⁸ Thaj bićhalindoj len ano Vitlejem, phenđa: Đan thaj Phučen šukar baš o čhavoro, pa kana arakhen le, mothon mange, kaj vi me te avav leske pe čanga te perav.

⁹ A on, ašundoj e thagare, đele po drom, thaj dikh, e čeren, savi dikhle ko Istok, đala anglal lende đikaj ni avili thaj aćhili upral kaj sine o čhavoro.

¹⁰ A kana dikhle e čeren, pherdile lengere vile but bare lošalimasa.

¹¹ Thaj dindoj andre ano kher, dikhle e ćhavore e Marijaja dija lesera, thaj pele pe čanga pe lese, ta putarindoj e sobe ple pašarde leske e dindime: sumnakaj, tamjano thaj izmirna.

¹² Thaj lindoj ano suno o vakeripe te na irinen pe e Irodoske, avere dromeja đele ani pli phuv.

Našipe ano Egipat thaj iripe

¹³ A kana on đele, a odova o phakalo e Devljutnesoro mothovđape e Josifese ano suno thaj phenđa: Ušti, le e ćhavore thaj e dija lesera, ta naš ano Egipat, thaj ov odothe đikaj tuke ni phenav: kaj o Irod ka rodel e ćhavore te xasarel.

¹⁴ Thaj vov uštindoj, lija e ćhavore thaj e dija lesera raćasa ta đelo ano Egipat.

¹⁵ Thaj ine odothe đi o meripe e Irodosoro – te pherel pe so o Devel vakerda prekalo profeto savo vakerel: Andar o Egipat akharda e čhave ple.

¹⁶ Teg o Irod, dikhindoj kaj le o gođavaratne xoxavde, xoljardilo but thaj bičhalda ta xasarda sa e čhavoren ano Vitlejem thaj pe sa o trujalipe plo katar e duj berša thaj najtele, po vaxto savo čače đangla katar e gođavarutne.

¹⁷ Teg pherdilo so phenđa o profeto Jeremija vakerindoj:

¹⁸ O Krlo ani Rama šundilo pe, rovipe thaj rovavdipe thaj dobođipe baro, e Rahilja rovel e čhavoren plen, thaj ni mangel te kovljarel o dukha, kaj len nane.

¹⁹ A po meripe Irodosko, dikh, o phakalo e Devljutnesoro mothovdilo ano suno e Josifese ano Egipto,

²⁰ thaj vakerda: Ušti, le e ćhavore thaj e daja lesera thaj đa ani phuv Izrailjeski; mule odola save rodle o ođi e ćhavoresoro.

²¹ A ov uštindoj, lija e ćhavore thaj e daja lesera, thaj avilo ani phuv e Izrailjeski.

²² Numaj ašundoj kaj o Arhelaj thagaril ane Judeja pothan e Irodosko, ple dadesoro, darandilo odori te đal, sar, lindoj ano suno o vakeripe, đelo ane agora e galilejeske.

²³ Thaj avindoj thanardilo ano foro akhardo Nazaret, te pherđol so vakerde e profetura kaj Nazarećano ka akharelpe.