Evangelium e Matejestar 18 - Romski prevod Novog zaveta - Srbija

Sikavibe e apostolengoro

¹ Ano godova časo ale e sikljovne đi o Isus vakerindoj: Ko si, akana, najbaro ano Thagaripe e badalesko?

² Thaj akharđa o Isus e ćhavore, thaj čhuta les maškar olende,

³ thaj phenđa: Čače tumenge phenav, te na irisajlen thaj oven sar e ćhavore, ni ka den ano Thagaripe e badalesko.

⁴ Savo, akana, teljardol sar akava čhavoro, godova si najbaro ano Thagaripe e badalesko.

⁵ Thaj savo lel jekhe asavke ćhavore maje ano anav, man lel.

⁶ A savo tradel po bezeh jekhe akale tiknendar save paćan ana mande, majlačhe ka ovel leske kaj te umvlavol o bar e panjeso pese ki men, thaj te tasavdol ano xoripe e deravesko.

⁷ Pharipe e themeske katar o tradipe po bezeh; kaj si trubul te oven tradine po bezeh, numaj pharipe e manušeske godoleske andar savo avel o tradipe po bezeh.

⁸ Te li o vast tiro ja o plo tiro tradel po bezeh, čhin le thaj čhude tutar; majlačhe si te de ano đivdipe bango ja sakato na li te ovel tut duj vasta ja duj pre, a te čhuden tut ani jag biagorimaski.

⁹ Thaj ako tiri jakh tut tradel po bezeh, ikala thaj ćhudla tutar; majlačhe si tuke jekhe jakhasa ano đivdipe te de ja te ovel tut duj jakha, a ta te čhuden tut ane bengesi jag.

¹⁰ Dićhen te na čhon sama jekhe katar akala cikne; kaj tumenge phenav kaj e phakale lenge pe badalura saiekh dićhen o muj mle Dadesko e badalesko.

¹¹ Kaj o Čhavo e Manušesko avela te inkalel so našaldilo.

¹² So tumenge kerel pes? Te jekh manuš isile šel bakre thaj našaldol jekh katar lende na li mekel enjavardeš thaj enja ane plajin, thaj đal ta rodel godoja e xasardi?

¹³ Thaj te kerel pes kaj arakhlala, čače tumenge phenav kaj lake lošalel pes majbut, katar godola enjavardeš thaj enja save ni našaldile.

¹⁴ Ađaar naj o kamipe tumare Dadesko e badalesko te perel jekh katar akala cikne.

¹⁵ Kaj li kerel bezex o phral tiro, đa thaj vaker lese korkoro, ako kandel tut, lijan e phrale tire.

¹⁶ Kaj li ni kandel tut, le tusa pana jekhe ja dujen kaj pe muja duj ja trin dićhutnengo ačhel sakoj lafi.

¹⁷ Kaj li len ni kandel, phen e Khangirjake; a kaj li ni kandel ni e Khangiri, nek ovel tuke sar butedevleskoro thaj šulkari.

¹⁸ Čače tumenge phenav: Sa so phanden pe phuv ka ovel phandlo po badali, thaj sa so putren pe phuv ka ovel putardo po badali.

¹⁹ Palem tumenge čače phenav: Kaj duj katar tumende jekhipe čeren pe phuv ano fijesavo šej baš savo ruđisavon, ka del lenge mlo Dad savo si pe badalura.

²⁰ Kaj si duj ja trin čidime ano alav mlo, gothe sem vi me maškar lende.

²¹ Atoska olese paše alo o Petar thaj phenđa: Devljutneja, kobor droma, te čerda bezeh o phral mlo, te jertisarav lese? Đi efta li droma?

²² Phenđa leske o Isus: Ni phenav tuke đi efta droma, aj đi eftavardeš droma po efta.

²³ Godolese si o Thagaripe badalesko čhutino e manušeske thagareske savo mangla kaj te đenel pes ple kandinenca.

²⁴ Thaj kana lija te đenel, ande leske jekhe kamutne katar e deš milje talanata.

²⁵ Thaj avune kaj ov najsale sosa te iril, čhinada o barutno lesko te bićinen les thaj e romnja leskera vi e čhavoren thaj sa so sinele, thaj te poćinel pes.

²⁶ Aj o kandino godova pelo pe čanga leske vakerindoj: Barutnea, ađučar man, thaj sa ka irinav tuke.

²⁷ A o barutno dukhardilo pes pe okova kandino, thaj mekla les ta o kamipe leske jertisarda.

²⁸ A kana inklilo o kandino godova, arakhla jekhe katar ple amale savo leske kamela šel dinara, thaj astarda les thaj ačhilo te tasavel le vakerindoj: De mange so kames!

²⁹ Pelo o amal leskoro anglal e pre leske thaj ruđila les vakerindoj: Ađučar ma, thaj sa ka iriv tuke.

³⁰ A ov ni mangla, aj les inđarda thaj ćhudla ano phandipe đikaj ni iril o kamipe.

³¹ Dićhindoj e amala leske godova čeripe, dukhardile but, thaj đapeindoj, mothode ple barutnese sa so ćerdilo pes.

³² Atoska les akharda o barutno lesko, thaj phenđa leske: Đungalo kandineja, sa o kamipe godova jertisardem tuke, kaj ruđisardan man.

³³ Naj li trubuja kaj vi tu te kovljardo pe plo amal, sar vi me pe tute so kovljardiljem?

³⁴ Thaj xoljardilo pes o barutno lesko, thaj dija les e mučutnenge đikaj ni irisarda sa so leske kamela.

³⁵ Ađaar vi o Dad mlo e badalesko ka ćerel tumenge, te na jertisarden sakoj ple phraleske katar o vilo plo sa e čerde bezeha lenge.